Josué 2:9 - Chayahuita (Shahui)

⁹ —Tëhuënchachin Sinioro yaꞌipi iso noꞌpaꞌ canpita quëtaponquëmaꞌ. Ina nohuanton quiyaso paꞌpi tëꞌhuatërainquëmaꞌ. Yaꞌipi isëquë yaꞌhuëraisoꞌ, naporai.

Josué 2:9 ပူးပေါင်းရင်းမြစ်များ

Génesis 35:5

Paꞌpachinara, Yosë nohuanton, nisha nisha ninanoroꞌsaquë yaꞌhuëpisopita paꞌpi tëꞌhuapi. Napoatona co nanitopihuëꞌ Cacopo huiꞌninpita, imatona iꞌhuërëtacaisoꞌ.

2 Samuel 17:10

Napohuachina aꞌnaquën sontaronënpita chiníquën cancantopirinahuënta co huachi nanitapihuëꞌ. Paꞌpini pochin cancantopirinahuë tërantaꞌ, co huachi chiniapihuëꞌ. Naní quëran israiroꞌsasoꞌ: “Tapi, sontaronënpita, inapitaso chiníquën cancantopisopita,” topi.

2 Reyes 5:15

Nani noyatohuachina yaꞌipi caꞌtaninsopitarë chachin Irisio nicapona panantapi. Cantonahuaton: —Yaꞌipi isoroꞌpaquë nisha nisha mamanshi moshapirinahuëꞌ, co inapitaso Yosëhuëꞌ. Isëquësáchin Yosëso yaꞌhuërin tënahuë. Ina nitotato, quëshiranquënsopita maquë topirahuë, itërin.

2 Reyes 7:6

Sinioro nohuanton Siria sontaroꞌsasoꞌ, notohuaroꞌ sontaroꞌsa toronanoꞌsaquë, cahuarioroꞌsaquë, inaquëpita huëꞌsapiso pochin natanpi. Ina natanatonaꞌ: “Israiro copirnosoꞌ, Iquipito copirno, Iti copirno, inapita copirnoroꞌsa sontaronënpitarë chachin pahuërërin. Napoaton inapita ahuëaponpoa huëcapaiarinënpoaꞌ,” topi.

Salmos 115:16

Siniorosoꞌ, piꞌiroꞌtë huaꞌanëntërin. Isoroꞌpaso nipirinhuëꞌ, piyapinpoa ahuaꞌanëntërinpoaꞌ.

Números 20:14

Catisë quëran caraya quëmapiꞌsaꞌ, Moisësëri aꞌparin Itomo copirno nontacaiso marëꞌ. Cantonahuatona itaponaꞌ: “Quiyasoꞌ israiroꞌsacoi, canpita quëmopinëma ninai. Nani nitotëran Iquipitoquë yacapatatoi, parisitëraisoꞌ. Isëquë huarëꞌ canquiaꞌhuaiso marëntaꞌ, naꞌcon parisitërai.

Números 20:24

“Aaronsoꞌ chiminapon huachi. Israiroꞌsa noꞌpaꞌ quëtaꞌhuasoꞌ shaꞌhuitërahuëquë co yaꞌconaponhuëꞌ. Miripa iꞌshataquë camairanquëmaso co natëramahuë niꞌton, Aaronsoꞌ isëquë chiminapon.

Mateo 20:15

Caoranquën coriqui niꞌton, onposona nohuantohuato, inanapo pahuërëtaꞌhuasoꞌ yaꞌhuërin. Inapita nosoroato, pahuërërahuëso marëꞌ ¿noꞌhuiramaco ti?’ itahuaton, aꞌparin huachi.

Deuteronomio 32:8

Chini chiníquën nanantërinsoari, iráca piyapiꞌsa niquë niquë acorin. Nisha nisha nacionoꞌsaquë yaꞌhuëcaiso marëꞌ, acorin. Noꞌpaꞌ mapisoꞌ nanirinsoꞌ, acotëraꞌpiarin. Israiroꞌsanpoaso nipirinhuëꞌ, noya noya noꞌpaꞌ acotërinpoaꞌ. Cacopo shinpitanpoasoꞌ, huaꞌanëntiinpoaso marëꞌ huayoninpoaꞌ.

Hebreos 11:31

Yaꞌipi yaꞌhuëhuanoꞌsaꞌ co Yosë yanatëpihuëꞌ niꞌton, chiminpi. Aꞌna sanapiáchin natëton, chaꞌërin. Oshahuanaꞌpi inasoꞌ, Nacapa itopisoꞌ. Inimico niponahuëꞌ, Israiro comisionënpita huëꞌpachinara, inari poꞌorin ama sontaroꞌsari tëpacaiso marëhuëꞌ.

Josué 2:11

Inapita nitotatoi, paꞌpi tëꞌhuatërainquëma huachi. Napoaton co incoi tëranta nanitëraihuëꞌ, chinitaꞌhuainquëmasoꞌ. Canpita Sinioro imaramasosoꞌ, Yosë chachin. Inápaquë huaꞌanëntërinso pochachin isoroꞌpaquënta huaꞌanëntërin.

Josué 2:24

—Nani huachi Siniorori yaꞌipi ina noꞌpaquë yaꞌhuëpisopita aꞌpayanin. Napoaton co oshatarihuahuëꞌ, inapita minsëcasoꞌ, itopi.

Josué 2:8

Nëhuëtonaꞌpiroꞌsa coꞌhuara huëꞌëshátërasoihuëꞌ, Nacaparisoꞌ nanpëontarahuaton itapon:

Josué 5:1

Cortaniiꞌ quëran piꞌi yaꞌconinso parti noꞌpaquë, nisha nisha copirnoroꞌsa yaꞌhuëpi. Amoro copirnoroꞌsaꞌ, Canaan copirnoroꞌsaꞌ, inapita yaꞌhuëpi. Amororoꞌsasoꞌ, Cortaniiꞌ yonsan parti yaꞌhuëpi. Cananoꞌsantaꞌ, marë Pancaiꞌ parti yaꞌhuëpi. Yaꞌipi inapita natantopi: “Siniorori Cortaniiꞌ ayanirin. Inapotasoꞌ, israiroꞌsanta pëntontopi,” topi. Ina natantatonaꞌ, naꞌcon naꞌcon paꞌyanpi. Napoaton co nanitopihuëꞌ israiroꞌsa chinitacaisoꞌ.

Josué 6:2

Napoaponahuëꞌ, Siniorori Cosoi itapon: “Quirico ninano ataꞌhuantacaso marëꞌ carinquën catahuaranquën. Copirnonënaꞌ, sontaronënpita, inapita minsëaramaꞌ.

Jueces 7:14

Napotohuachina aꞌnariso itapon: —Huaꞌnaransoso nipirinhuëꞌ, Coasë huiꞌnin Quitiono sahuëninën quëran ahuëinpoasoꞌ, tapon huaꞌnaran. Yosëri ina, sontaronënpitarë chachin catahuararin niꞌton, matianoꞌsanpoa minsëarinënpoaꞌ, tënin.