Joel 2:26 - Chayahuita (Shahui)

^26-27 Inapotohuatënquëmaꞌ, noyá natëaquë huarëꞌ coshataramaꞌ. Inapoatoma chinotaramaco. Canpita catahuaꞌhuanquëmaso marëꞌ huëhuëpiro nininsopita ninahuë niꞌton, chinotaramaco. Inapotohuatënquëma yaꞌipi israiroꞌsanquëmaꞌ: ‘Tëhuënchachin Sinioronënpoasoꞌ, Yosë. Co aꞌna yaꞌhuërinhuëꞌ ina pochin chinotacasoꞌ. Inasáchin catahuarinpoaꞌ,’ tosaramaꞌ. Naporo quëran huarëꞌ co huachi onporonta tapanapomahuëꞌ,” tënin.

Joel 2:26 ပူးပေါင်းရင်းမြစ်များ

Génesis 33:11

Yosë nohuanton maꞌhuanahuë, co manta pahuantërincohuëꞌ. Napoaton, quëshiranquënsopita, onpopionta maquëꞌ, itërin. Napotápaton Isao anohuantërin. Yaꞌipi aꞌpatërinsopita manin huachi.

Nehemías 9:25

Naꞌa pairahuan ninanoroꞌsa yaꞌhuëpirinhuëꞌ. Noꞌpanënanta noya noya nipirinhuëꞌ. Pëiroꞌsaquënta notohuaroꞌ maꞌsha amëntatopi. Iꞌsha tapainanoꞌsaꞌ, oparoroꞌsaꞌ, oripororoꞌsaꞌ, nisha nisha cashinoꞌsaꞌ, inapita yaꞌhuëpirinhuëꞌ, yaꞌipi mapi. Inapoatona noya coshatopi, oꞌopi, napopi. Inapoatona amonpitërapi. Nosororan niꞌton, capa cancantopi.

Salmos 103:5

Noya cosharoráchin aꞌcarinco. Inapotatonco, panca onian anporonën quëran nitapaantarinso pochin acorinco.

Salmos 116:7

Sinioro nosoroatonco catahuarinco niꞌton, sano cancantaantarahuë.

Salmos 22:26

Aꞌnaquëmantaꞌ, aꞌnapita aparisitápirinënquëmahuëꞌ, noyá natëaquë huarëꞌ coshatoco huachi. Sinioro yoniramasopita huaꞌqui tahuëri nicatomaꞌ, ina chinotocoꞌ.

Salmos 37:19

Parisitacaso tahuëri canquihuachin, co tapanaponahuëꞌ. Tanaro tahuëriꞌsanta nipirinhuëꞌ, natëaquë huarëꞌ coshataponaꞌ.

Salmos 72:18

¡Ma noyacha Yosëso paya! Inasoꞌ Sinioro, israiroꞌsanpoa chinotërëhuasoꞌ. Inasáchin nani maꞌsha ninin.

Isaías 45:17

Israiroꞌsanpoaso nipirinhuëꞌ, Sinioro nichaꞌërinpoaꞌ. Yaꞌhuëmiatacaso marëꞌ nichaꞌërinpoaꞌ. Co onporonta taparo nisarëhuahuëꞌ.

Isaías 49:23

Copirnoroꞌsanta huiꞌninpita pochin nitarinquëmaꞌ. Inahua huiꞌninpita sanapi nipisopitantaꞌ, nocomatënquëma asoꞌsoarinquëmaꞌ. Inapitasoꞌ noya nicatënëmaꞌ, moshaponëmaꞌ. Isonpi quëran noꞌpaquë huarëꞌ monshorahuatonaꞌ, canpitasáchin natëinëmasoꞌ anitotarinënquëmaꞌ. Inapoatonaꞌ: ‘Tëhuënchachin Siniorosoꞌ chini chiníquën nanantërin. Naporahuaton inasáchin ninapisopitasoꞌ, co onporonta taparo nisapihuëꞌ,’ tëcaponaꞌ,” tënin.

Isaías 54:4

Ama tëꞌhuacosohuëꞌ. Co tapanamasoꞌ yaꞌhuëaponhuëꞌ. Co noꞌhuiponënquëmahuëꞌ. Nanon pochin nicapoma tapanamasoꞌ, naniantaramaꞌ. Quëyoron pochin nicapoma taparo ninamasoꞌ, co huachi yonquiaramahuëꞌ.

Isaías 55:2

Noya natanpatamaco, noya coshatërëso pochin acoaranquëmaꞌ. Cosharomia co achinimiatërinquëmahuëꞌ. ¡Co topinan quëran pahuërëtatë maꞌpatacaso yaꞌhuërinhuëꞌ!

Zacarías 9:15

Siniorosoꞌ, yaꞌipi nanitaparin. Inimiconënapitasoꞌ, israiroꞌsa ahuëcaiso marëꞌ naꞌpira tëꞌyatopiquë quëcaponaꞌ. Inanpiquë naꞌpiroꞌsa tëꞌyatopirinahuëꞌ, israiroꞌsaso Siniorori paꞌpoyapon. Inari catahuapon niꞌton, inimiconëna minsëaponaꞌ. Minsëhuachinaꞌ, pita nicaponaꞌ. Naꞌcon huino oꞌopiso pochin noncaroaponaꞌ. Corto huaꞌanoꞌsa maꞌsha tëpahuachinara, tasonoꞌsaquë huënaiꞌ mëntaitopi. Inapotatona artaro aipi opopi. Inapochachin inapitantaꞌ, tasonënaquë huino mëntaitaponaꞌ.

Zacarías 9:17

Naporo quëran huarëꞌ, piyapinënpita noya noya yaꞌhuëaponaꞌ. Notohuaroꞌ cosharoꞌ, huino, inapita yaꞌhuëapon. Napoatona huiꞌnapiꞌsanënpoaꞌ, nanoꞌsanënpoaꞌ, inapitantaꞌ, noya noya soꞌsoponaꞌ.

Romanos 10:11

“Insosona Quisocristo natëhuachin, co sëtarinhuëꞌ. Co aꞌpoarahuëꞌ,” tënin Yosë quiricanënquë.

Romanos 5:5

Inasáchin ninahuatëhuaꞌ, tëhuënchachin co naniantarinpoahuëꞌ niꞌton, co tapanarihuahuëꞌ. Ispirito Santo aꞌpatimarinpoaꞌ. Yaꞌcoancantohuachinpoaꞌ: “Ma noyacha Yosë nosororinpoa paya,” tarihuaꞌ. Ispirito Santo chachin Yosë nosororinpoasoꞌ anitotërinpoaꞌ.

Romanos 9:33

Yosë quiricanën quëran naporin: “Sionquë Cristo aꞌpapirahuëꞌ, co nohuantopihuëꞌ. Inapoatonaꞌ pancaraꞌpiquë iꞌparëso pochin niꞌpi. Co nohuantopihuëꞌ niꞌton, anotërëso pochin nipi. Nipirinhuëꞌ, insosona Cristo nohuantohuachin, co onporontaꞌ atapanarahuëꞌ. Noya niꞌsarahuë huachi,” tënin Yosë.

Deuteronomio 12:12

Naporo tahuëriꞌsaꞌ, Sinioro marëꞌ pita nisaramaꞌ. Huiꞌnamaꞌ, piyapinëmaꞌ, inapitanta canpitarë chachin capa cancantaponaꞌ. Nihuiroꞌsanta canpitarë yaꞌhuërinsoꞌ, naporo capa cancanchinaꞌ. Inapitasoꞌ co canpita pochin noꞌpaꞌ mapihuëꞌ niꞌton, ichicapacancancoꞌ.

Deuteronomio 12:18

Insëquësona Siniorori huayonin niꞌton, ina chinotacaso nëꞌmëtë pëi acoramaꞌ. Inaquësáchin inasoꞌ, quëpatoma caꞌsaramaꞌ. Huiꞌnamaꞌ, piyapinëmaꞌ, inapitanta canpitarë chachin capa cancantaponaꞌ. Nihuiroꞌsanta canpitarë yaꞌhuërinsoꞌ, naporo capa cancanchinaꞌ. Sacatëramaquë, pëꞌtahuatëramaquë, inaquëpita Yosë catahuarinquëmaso yonquiatomaꞌ, capa cancantaramaꞌ.

Deuteronomio 12:7

Inaquë Sinioro yonquiatomaꞌ: Saꞌamaꞌ, huiꞌnamaꞌ, quëmopiroꞌsaꞌ, inapita coshataramaꞌ. Sacatëramaquë, pëꞌtahuatëramaquë, inaquëpita Yosë catahuamiatërinquëmaꞌ. Ina yonquiatoma capa cancantaramaꞌ.

Deuteronomio 8:10

Napoaton nani coshatatoma natëhuatamaꞌ, Sinioro chinotocoꞌ. Chinotatomaꞌ: ‘¡Ma noyacha Yosëso niꞌton, noyaroꞌpaꞌ quëtërinpoa paya!’ tocoꞌ,” itërin.

1 Timoteo 6:17

Aꞌnaquën naꞌcon coriqui yaꞌhuëtërin. Inapitantaꞌ api pënënquëꞌ: “Ama aꞌnapita nocancosohuëꞌ. Ama coriquinëmáchin paꞌyatocosohuëꞌ. Inasoꞌ co yaꞌhuëmiataponhuëꞌ. Yosë naꞌcon naꞌcon paꞌyatocoꞌ. Inasoꞌ co apiratërinpoahuëꞌ. Nani maꞌsha quëtërinpoaꞌ nóya cancantatëhua, yaꞌhuëcaso marëꞌ.

1 Juan 2:28

Ipora quëran huarëꞌ, apiaꞌhuaroꞌsaꞌ, Quisocristo imamiatocoꞌ. Inapohuatamaꞌ, oꞌmantahuachin, co tapan yaꞌhuëtarinquëmahuëꞌ. Co paꞌyanaramahuëꞌ.