Joel 2:17 - Chayahuita (Shahui)

¹⁷ Sinioro marëꞌ sacatopisoꞌ corto huaꞌanoꞌsantaꞌ, naꞌnëinaꞌ. Yosë pëinën ishpanamën notënanquë artaro yaꞌhuërinsoꞌ, co aquëyahuëꞌ. Ina huáncana huanirahuatonaꞌ, piyapiꞌsa marëꞌ Sinioro nonchinaꞌ: “Piyapinënpita Sinioro tëhuëtatënën oshahuanpisoꞌ, inquitëquëꞌ. Piyapinënpitacoi nipiraihuëꞌ co catahuahuatancoihuëꞌ, aꞌnapitaso tëhuaponacoi. Ama aꞌnapita nacionoꞌsa canarahuatonacoi, huaꞌanënchinacoisohuëꞌ. Inapitaso co chinotopirinënhuëꞌ, canarahuatonacoi: ‘¿Inata nipachin israiroꞌsa Yosënënari catahuarinhuëꞌ?’ tosapi,” ichinaꞌ.

Joel 2:17 ပူးပေါင်းရင်းမြစ်များ

1 Reyes 6:3

Yaꞌcoana parti quëran ishpanamën pochin nininsoꞌ yaꞌhuëtërin. Pëiꞌ pancanatërinsoꞌ nani chachin iscon mitro naporopitërin. Pancanatërinsosoꞌ catapini mitro miria yaꞌhuëtërin.

Nehemías 9:36

Napoaton iporasoꞌ, topinan quëran asacatárinacoi. Shimashonëhuëipita noꞌpaꞌ quëtëran. Shaꞌtatona capacaiso marëꞌ quëtopiranhuëꞌ, inaquë chachin topinan quëran asacatárinacoi.

Salmos 115:2

Inpioroꞌsasoꞌ, tëhuatona nataninacoi: “¿Insëquëta ipora Yosënëmasoꞌ?” itërinacoi.

Salmos 42:10

Inimicoroꞌsa noꞌhuirinacosoꞌ yonquiato, co napion cancantërahuëꞌ. Nani tahuëri piyapiꞌsa tëhuarinaco: ‘¿Inso huachi Yosë chinotëransoꞌ?’ itárinaco,” itërahuë.

Salmos 42:11

Parisitapirahuëꞌ, ¡ama huachi sëchisohuëꞌ! ¡Ama huachi napoin ancanchisohuëꞌ! Sinioro catahuaantaponco. Ina nohuanton noya chinotaantapo. Inasáchin Yosënëhuë niꞌton, nichaꞌësarinco.

Salmos 42:3

Nani tahuëri piyapiꞌsa tëhuarinaco: “¿Inso huachi Yosë chinotëransoꞌ?” itërinaco. Napotërinacoso marëꞌ tahuëri tashirë chachin sëtato naꞌnërahuë.

Salmos 42:4

Ina yonquihuatora, paꞌpi sëtërahuë. Iráca naꞌa niyontonahuatoi, Yosë chinotërai. Pëinënquë yapaꞌpatoira, cari piyapiꞌsa quëparahuë. Capa cancantatoi nonca nonca tërarai. “Yosparinquën Sinioro,” tëcatoi, panca pita ninai. Iporaso napoaponahuëꞌ, parisitárahuë.

Salmos 89:41

Inapotopi niꞌton, naꞌhuëroꞌsari nohuantopisoꞌ mapi. Napotopiso marëꞌ yaꞌcaria yaꞌhuëpisopitari tëhuayatopi.

Salmos 89:51

Inapochin inimiconënpita nitárinacoi. ¡Huayonanso shinpitacoi nipiraihuëꞌ, noꞌhuirárinacoi!

Joel 1:13

Corto huaꞌanoꞌsanquëmaꞌ: Canpitasoꞌ Sinioro artaronënquë sacatëramaꞌ. Yosënënpoa chinotërëhuaso pëiquë, co huachi Sinioro marëꞌ cosharoꞌ, huino, inapita quëpihuëꞌ. Napoaton sëtonëmaquë saꞌcatën aꞌmosahuatomaꞌ, yaꞌipi tashi naꞌnëcoꞌ.

Joel 1:9

Inapochachin corto huaꞌanoꞌsanta naꞌnëpi. Co huachi Yosë marëꞌ tëranta cosharoꞌ, huino, inapita quëpihuëꞌ niꞌton, napopi.

Amós 7:2

Ina quëran sëquëroroꞌsasoꞌ, sharoꞌsaꞌ, pacatoroꞌ, inapita pëꞌyarantararin. Naporahuachinara: —Sinioro, tëhuënchachin oshahuanpiraihuëꞌ, oshanëhuëi inquitocoi. Israiroꞌsa inapotaton anaꞌintohuatan, co chiniapihuëꞌ. Huaꞌhuaroꞌsa pochin nisapi nichinapon chachin taꞌhuantaponaꞌ, itërahuë ina nontato.

Amós 7:5

Naporahuachina: —Sinioro, ama ina pochin anaꞌintocoisohuëꞌ. Israiroꞌsa inapotaton anaꞌintohuatan, co chiniapihuëꞌ. Huaꞌhuaroꞌsa pochin nisapi nichinapon chachin taꞌhuantaponaꞌ, itaantarahuë.

Malaquías 1:9

Corto huaꞌanoꞌsanquëmaꞌ. Nosoroatënquëma catahuaꞌhuanquëmaso marëꞌ nontoco. Ina marëꞌ canpitaso yaꞌhuërama nipirinhuëꞌ. Ina pochin maꞌsha nininsopita aꞌnotëramaco. Ina pochin nipatamaꞌ, co carimanta noya nicaꞌhuanquëmaso yaꞌhuërinhuëꞌ. Caso Sinioroco yaꞌipi nanitapato shaꞌhuitaranquëmaꞌ:

Mateo 23:35

Iráca quëran huarëꞌ noya quëmapiꞌsaꞌ pënëntopirinahuëꞌ, naꞌa tëpapi. Apiriꞌton noya quëmapi nipirinhuëꞌ, iini tëparin. Ina piquëran aꞌnaya aꞌnaya noya pënëntopirinahuëꞌ, tëparaꞌpiapi. Naꞌa piꞌipi napopi. Napoin quëran Sacariasë tëpapi antaꞌ. Piriquiasë huiꞌnin inasoꞌ. Yosë chinotopiso pëi iꞌiratëquë artaro yaꞌhuërinso aquëcha tëpapi. Canpitasoꞌ ina nitotapomarahuëꞌ, co natantochináchinhuëꞌ cancantëramaꞌ. Napoaton Yosë chiníquën anaꞌintarinquëmaꞌ.

Mateo 27:43

“Yosë huiꞌninco chachin niꞌton, catahuarinco,” topirinhuëꞌ. Yacatahuahuachin, apiramiáchin nichaꞌëin, nitopi.

Deuteronomio 32:27

Inapotohuatoso nipirinhuëꞌ, inimicoroꞌsa tëhuaponaco: “Quiyasoꞌ chini chiníquën nanantërai. Co Sinioro nohuantopirinhuëꞌ, israiroꞌsa tiquirai. ¡Ma noyacha ninai quiyaso paya!” tosapi. Napoaton co israiroꞌsa tiquicaisoꞌ nohuantërahuëꞌ.