Joel 2:11 - Chayahuita (Shahui)

¹¹ Sinioronta pinën quëran sontaronënpita acorahuaton, huira pochin chiníquën nonsarin. Huaꞌhuayátërahuë sontaronënpita yaꞌhuëtërin. Natërinsopitasoꞌ, co pichichináchinhuëꞌ. Sinioro anaꞌintiinpoaso tahuëri nanihuachin, ¡ma huëhuëpirocha nisarin paya! Ina tahuëri nanihuachin co insonta ahuantarinhuëꞌ.

Joel 2:11 ပူးပေါင်းရင်းမြစ်များ

Salmos 46:6

Ina nonpachina, isoroꞌpaꞌ soquiarin huachi. Nacionoꞌsaquë nisha nisha copirnoroꞌsari huaꞌanëntërinso noꞌhuitapirinahuëꞌ, ropatatona huaꞌya huaꞌyantáponaꞌ.

Isaías 42:13

Míso ahuëtonaꞌpi pochin Siniorosoꞌ paꞌsarin. Ahuëtonaꞌpi chiníquën ahuëtërinso pochin nisarin. “Yai,” tahuaton caniaritarin. Inaporahuaton inimiconënpita minsëarin.

Isaías 7:18

Ina tahuëriꞌsa nanihuachin, Sinioro nohuanton inimicoroꞌsa huëꞌsapi. Iquipito iroꞌsa quëran yon tomontërinso pochin huëcaponaꞌ. Asiria parti quëraonta ninora sanantërinso pochin huëcaponaꞌ.

Joel 1:15

Anaꞌintacaso tahuëri nani naniriarin. Ina tahuëri nanihuachin, ¡maꞌhuántacha nisarëhua paya! Naporoꞌ Siniorosoꞌ ataꞌhuatarinpoaꞌ. Yaꞌipi nanitapaton inapotarinpoa huachi.

Joel 1:6

Sëquërëroꞌsasoꞌ chiníquën sontaroꞌsa huënton pochin nicatonaꞌ, yaꞌhuërëhuaso noꞌpaquë yaꞌconpi. Yaꞌipi yanquërahuatonaꞌ, naramëroꞌsa pëꞌyarin. Paꞌpiniꞌ natëquën quëran mápinën pëꞌyarinso pochin nipi.

Joel 2:1

Quirosarin ninanosoꞌ, Siniorori huayonin. Inaquë pëinën yaꞌhuëcaso marëꞌ huayonin. Inaquë niyátainpichin yaꞌhuëcaiso marëꞌ aꞌpaito sontaroꞌsari, tronpita pihuitona huëhuëpiro huëꞌsarinso shaꞌhuiinaꞌ. Ina natanpisopitantaꞌ, chiníquën “yai,” taꞌtona naporinso aꞌnapita israiroꞌsa shaꞌhuichinaꞌ. Co huaꞌquiya quëranhuë Sinioro anaꞌintiinpoaso tahuëri naniarin. Napoaton yaꞌipi Cota huëntonquë yaꞌhuëpisopita paꞌyanatona ropachinaꞌ.

Joel 2:2

Ina tahuëri nanihuachin huëhuëpiro tashinantápon. Chitorori piꞌiroꞌtë iꞌcopitohuachina tashinantërinso pochin nisarin. Panca sontaroꞌsa huënton chiníquënoꞌsaráchin huëꞌsapi. Motopiroꞌsataquëchin pantërërahuatona huëꞌsapi. Tahuëririahuachina aꞌpininso pochin niriapi. Iráca quëran huarëꞌ co insonta ina pochin niꞌchininhuëꞌ. Aꞌna tahuërinta co huachi ina pochin niꞌsapihuëꞌ.

Joel 2:25

Ina quëran Sinioro taantarin: “Sëquërëroꞌsa aꞌpatáponquëmaꞌ, naꞌa piꞌipi co manta manamahuëꞌ. Inapitasoꞌ sontaroꞌsa huënton ataꞌhuantacaiso marëꞌ aꞌpapiso pochin carima aꞌpatëranquëmaꞌ. Ina piꞌipiroꞌsaquë co manta manamasohuëꞌ iꞌhuërëtaꞌhuanquëmaso marëꞌ naꞌcon naꞌcon quëtaantaponquëmaꞌ.

Joel 2:31

Piꞌintaꞌ tashiarin. Yoquintaꞌ, huënai pochin nisarin. Coꞌhuara anaꞌintaꞌhuaso tahuëri naniyátërasohuëꞌ, napoarin. Ina tahuëri nanihuachin, paꞌpi huëhuëpiro nisarin,” tënin.

Joel 3:14

Paꞌpi notohuaroꞌ piyapiꞌsa ina motopianaquë niyontonaponaꞌ. Naporoꞌ ca Sinioroco maꞌsona onpotacaisoꞌ shaꞌhuipo. Nani anaꞌintaꞌhuaso tahuëri naniriarin niꞌton, napoarahuë.

Joel 3:16

Quirosarin quëran ca Sinioroco camaitato, huira tënëntërinso pochin nisarahuë. Yaꞌipi isoroꞌpaꞌ nacon nacontapon. Piꞌiroꞌtënta nacon nacontapon. Israiroꞌsaso nipirinhuëꞌ, piyapinëhuëpita niꞌton, cari chachin noya paꞌpoyapo.

Amós 5:18

Ina quëran Sinioro taantarin: “Aꞌnaquëma anaꞌintaꞌhuaso tahuëri nanicasoꞌ, naꞌcon nohuantëramaꞌ. Naporamasopitasoꞌ, ¡maꞌhuantacha nisarama paya! Ina tahuëri maꞌsona onpocamasoꞌ ¡co canpita nitotëramahuëꞌ! Ina tahuëri nanihuachin paꞌpi tashinantápon.

Amós 5:20

Tëhuënchachin anaꞌintaꞌhuaso tahuëri nanihuachin, tashinantápon. Paꞌpi tashinantápon niꞌton, co manta yaꞌnoarinhuëꞌ,” tënin.

Malaquías 3:2

Ina oꞌmahuachinso napoaponahuëꞌ, ¡co insoari tërantaꞌ, chinitacaso nanitaponhuëꞌ! ¡Naporosoꞌ, yaꞌipinquëma tëhuëramaso anitotarinquëmaꞌ! Huaꞌna pënquë asoquirahuatonaꞌ, nëꞌhuëtërinso inquitopi. Inapochachin canpitantaꞌ, co noyahuëꞌ ninamaso inquitarinquëmaꞌ. Shapon nëꞌhuë inquitërinso pochin oshanëma inquitarinquëmaꞌ.

Números 24:23

Ina quëran Yosë yonquirinsoꞌ, shaꞌhuiantarin: “¡Maꞌhuantacha nisapi paya! Yosë napohuachin: ¿Inpitacha chaꞌërëꞌpoya?

1 Tesalonicenses 4:16

Chiníquën nanantaton, oꞌmantararin. Anquëni huaꞌaontaꞌ chiníquën shaꞌhuirarin. Yosë nohuanton, tronpita pihuirarin. Naporoꞌ Quisocristo imatonaꞌ chiminpisopitaꞌton nanpiantarapi.

Apocalipsis 18:8

Aꞌnanaya Yosëri anaꞌintarin huachi. Naꞌa piyapiꞌsaꞌ canioponaꞌ, sëtaponaꞌ, tanarotaponaꞌ, napoaponaꞌ. Yosëri chini chiníquën nanantaton, anaꞌintarin. Ahuiquitarin.

Apocalipsis 6:17

Nani anaꞌintacasoꞌ tahuëri nanirin. Anaꞌintohuachincoi, co insonta nanitarinhuë ina chinitacasoꞌ, tosapi.