Jeremías 9:24 - Chayahuita (Shahui)

²⁴ Insonquëma tërantaꞌ, ‘Ma noyacha caso ninahuë paya,’ yatopatamaꞌ, Sinioroco ninahuësoꞌ nitotatoma nohuitohuatamaco tëhuënchinsoꞌ, noꞌtën chachin napoaramaꞌ. Casáchin yaꞌipiroꞌpaꞌ huaꞌanëntato nosororanquëmaꞌ. Co noyahuëꞌ nipatamaꞌ noꞌtëquën anaꞌintaranquëmaꞌ. Noya nipatamasoꞌ noya niꞌsaranquëmaꞌ. Cá pochin cancantopisopita paꞌyatarahuë. Ca Sinioroco shaꞌhuitaranquëmaꞌ,” tënin.

Jeremías 9:24 ပူးပေါင်းရင်းမြစ်များ

Salmos 34:2

Sinioro imato: “¡Ma noyacha ninahuë paya!” tënahuë. Sano piyapiroꞌsa natanpachinara, capa cancanchinaꞌ.

Salmos 34:3

Huëco napopináchin Sinioro chinotahuaꞌ. Chini chiníquën nanantërinso marëꞌ inapotahuaꞌ.

Salmos 51:1

Quëmasoꞌ Sinioro noyanquën niꞌton, nosoroco. Nosoromiatatonco oshanëhuë inquitoco.

Salmos 91:14

Sinioro napotërinpoaꞌ: “Nohuitatomaco nosororamaco niꞌton, inapita quëran nichaꞌësaranquëmaꞌ. Co insonta nanitapaponquëmahuëꞌ.

Isaías 41:16

Trico pintiarëso pochin nitohuatamaꞌ, panca ihuani quiquirinso pochin yaꞌipi inimiconëmapita ataꞌhuantapomaꞌ. Canpitaso napoaponahuëꞌ, Sinioro yonquiatoma capa cancantaramaꞌ. Naporahuatomaꞌ: ‘Ma noyacha Sinioro imarai paya,’ tosaramaꞌ. Caso noyasáchin ninahuë niꞌton, Israiro chinotërinco.

Isaías 45:25

Israiroꞌsasoꞌ cari catahuarahuë niꞌton, noꞌtëquën yonquiaponaꞌ: ‘¡Ma noyacha Sinioro imatëhua naporëhua paya!’ tëcaponaꞌ,” tënin.

Isaías 61:8

Ina quëran Sinioro taantarin: “Noꞌtëquënáchin nipisopita nosororahuë. Ihuatopisoꞌ, aꞌnaratipita nicatona tëpatopisoꞌ, inapitaso co quëꞌyarahuëꞌ. Ina pochinco niꞌto piyapinëhuëpitasoꞌ, noꞌtëquënáchin acanapo. Inapitarëꞌco anoyatohuato, anoyatërahuëso yaꞌhuëmiatapon.

Miqueas 6:8

Napopiramahuëꞌ, co inapita Siniorosoꞌ nataninquëmahuëꞌ. Nani inaso maꞌsona nicacasoꞌ shaꞌhuitërinpoaꞌ. Piyapiꞌsa nosoroatëhua paꞌpoyacaso yaꞌhuërin. Maꞌsona nicacasoꞌ shaꞌhuihuatëra, ananicaso yaꞌhuërin. Naporahuaton: “Caora co nanitërahuë noya nicaꞌhuasoꞌ,” taꞌtëhuaꞌ, Sinioroíchin natëcaso yaꞌhuërin.

Miqueas 7:18

Siniorosoꞌ noya niꞌton, ina nontato: “¡Quëmaíchin Yosënquën. Co aꞌna quëma pochin yaꞌhuërinhuëꞌ! Piyapiꞌsa co noyahuëꞌ nipirinahuëꞌ, oshanëna marëꞌ sëtatona nontërinën niꞌton, nichaꞌëran. Caraya israiroꞌsacoi quëparitëraisopita, co natantochináchinhuëꞌ cancantatoi tëhuëtërainquën. Inapopiraihuëꞌ nontërainquën niꞌton, tëhuëtërainquënsoꞌ naniantëran. Noꞌhuípiro nipiraihuëꞌ nosororancoi niꞌton, noꞌhuitëransoꞌ asanoran. Inapoaton catahuantarancoi.

Mateo 11:27

Ina quëran piyapiꞌsaꞌ aꞌchintantarin. “Tata Yosë nohuanton, pënëntarahuë. Yaꞌipi nanamën anitotërinco piyapiꞌsaꞌ aꞌchintacaꞌhuaso marëꞌ. Huiꞌninco niꞌton, inasáchin noya nohuitërinco. Inapochachin Tata Yosë nohuitërahuë. Casáchin noya nohuitërahuë. Aꞌnaquëontaꞌ cari anohuitohuato, nohuitapi antaꞌ.

Lucas 10:22

Ina quëran aꞌparinsopita itantarin. “Tata Yosë nohuanton, chiníquën nanantërahuë. Yaꞌipi nanamën anitotërinco piyapiꞌsaꞌ aꞌchintaꞌhuaso marëꞌ. Huiꞌninco niꞌto, tatahuësáchin noyá nohuitërinco. Inapochachin cantaꞌ Tata Yosë nohuitërahuë. Casáchin noyá nohuitërahuë. Aꞌnaquën piyapiꞌsantaꞌ caora nohuanto, anohuitërahuë. Inapitantaꞌ Yosë nohuitapi huachi,” itërin.

Juan 17:3

Quëmasáchin Yosënquën. Isoroꞌpaquë aꞌpaimaranco. Piyapiꞌsaꞌ nohuitahuatënënquën, cantaꞌ nohuitohuachinaco, nanpimiatapi.

Romanos 5:11

Naporahuaton, “Yosë nosororinpoaꞌ,” taꞌtëhuaꞌ, ina paꞌyatërëhuaꞌ. Huiꞌnin chachin nanan anoyatërinpoaꞌ niꞌton, noya cancantërëhuaꞌ.

1 Corintios 1:31

“ ‘Ma noyacha Yosësoꞌ niꞌton, anoyacancantërinpoa paya,’ nitahuaꞌ. ‘Quiyasoꞌ noya noyacoi,’ ama tocosohuëꞌ,” tënin Yosë quiricanënquë.

2 Corintios 10:17

Yosë quiricanënquë naporin: “ ‘Noya noya ninahuë,’ co taꞌcasoꞌ yaꞌhuërinhuëꞌ. ‘Ma noyacha Yosë catahuarinco paya,’ taꞌcasoꞌ yaꞌhuërin,” tënin.

2 Corintios 4:6

Yaꞌnan isoroꞌpaꞌ acoapon yaꞌipi parti tashipirinhuëꞌ: “Niiꞌsohuanchin huachi,” tënin Yosë. Napohuachina, tahuëri yaꞌhuërin. Inapochachin iporasoꞌ cancanënpoaquë aꞌpintërinpoaꞌ ina nohuitacaso marëꞌ. Inasoꞌ noya noya. Quisocristo yaꞌpirin quëran aꞌpintërinpoaso pochin ninin. Ina yonquihuatëhuaꞌ, Yosë chachin anohuitarinpoa huachi.

Gálatas 6:14

Caso nipirinhuëꞌ piyapiꞌsaꞌ paꞌyataꞌhuasoꞌ co yonquirahuëꞌ. Quisocristo chimininsoáchin yonquirahuë. Corosëquë chiminaton, anoyacancantërinpoaꞌ. Niꞌton, inaroꞌco chiminahuëso pochin co maꞌsha isoroꞌpaquë yaꞌhuërinsoꞌ yonquirahuëꞌ. Naporahuaton, isoroꞌparáchin paꞌyatopisopita co huachi noya niꞌninacohuëꞌ.

Filipenses 3:3

Yosë marcanën co nonënpoaquë niacotërëhuahuëꞌ. Cancanënpoaꞌ Yosë anoyacancantërinpoaꞌ. Cancanënpoa quëran ina chinotarëhuaꞌ. Ispirito Santo chachin catahuarinpoaꞌ noya chinotacaso marëꞌ. Co canpoara nanitërëhuahuëꞌ noya cancantacasoꞌ. Quisocristoíchin anoyacancantohuachinpoaꞌ, nichaꞌësarinpoaꞌ, tënëhuaꞌ. Napoaton canpoasoꞌ Yosë piyapinënpita ninëhuaꞌ.

1 Juan 5:20

Yosë huiꞌnin chachin oꞌmaton, noꞌtëquën Yosë anohuitërinpoaꞌ. Inasáchin noꞌtëquën yonquirin. Yosë nohuitatëhuaꞌ, yonquirinsoráchin imasarëhuaꞌ. Quisocristo nohuitërëhuaꞌ niꞌton, catahuarinpoaꞌ noꞌtëquën yonquicaso marëꞌ. Inaíchin Yosësoꞌ niꞌton, chinotacasoꞌ yaꞌhuërin. Ina nohuitohuatëhuaꞌ, nanpimiatarihuaꞌ.

1 Samuel 15:22

Napotohuachina Samoirori itapon: “Maꞌsha Sinioro marëꞌ tëpatona piꞌpian ahuiquitacaisoꞌ, noya. Yaꞌipi ahuiquitacaisontaꞌ, noya. Sinioro camaitërinso natëcasoso nipirinhuëꞌ, noya noya. Maꞌsha Sinioro marëꞌ tëpatona piꞌpian ahuiquitacaisoꞌ, noya. Carniro tomaquën ahuiquitasontaꞌ, noya. Camaitërinso noya natanatë natëcasoso nipirinhuëꞌ, noya noya.