Jeremías 9:10 - Chayahuita (Shahui)

¹⁰ Motopiroꞌsa paꞌtatoma naꞌnë naꞌnë́rantacoꞌ. Pastoroꞌsantaꞌ paꞌtatoma osha oshaárantacoꞌ. Yaꞌipi huiquitërin niꞌton, co huachi insonta inaëchin paꞌninhuëꞌ. Ohuacaroꞌsanta ‘maaa,’ topisoꞌ, co huachi yaꞌcaninhuëꞌ. Niꞌniroꞌsaꞌ, anpiantëhuanoꞌsaꞌ, inapitanta taꞌapi.

Jeremías 9:10 ပူးပေါင်းရင်းမြစ်များ

Isaías 41:15

Carima catahuaranquëma niꞌton, inimiconëmapita minsëaramaꞌ. Nasha toꞌnoratiinan cato panshin natëhuaninso pochin nisaramaꞌ. Motopiroꞌsa papatatë amocan atarantërëso pochin nitaramaꞌ. Motopiaꞌhuaroꞌsanta papatatomaꞌ, trico shaꞌhuëtë atarantatë pochin nitaramaꞌ.

Isaías 49:19

Canpitaso noꞌpanëma tapimiatopi. Inapotopirinahuëꞌ, notohuaro naꞌasarama niꞌton, noꞌpanëma pahuan pahuantaponquëmaꞌ. Ninanonëma ataꞌhuantopisopitasoꞌ, nani áquë huëshiramaꞌ.

Jeremías 14:6

Tanan moraroꞌsanta tomaroꞌtë panënoꞌsaquë huanitonaꞌ, asaniroꞌsa pochin ihuansaꞌ oꞌhuaconpi. Capa pasto niꞌton, tana tapinantopitërapi,” tënin.

Jeremías 2:15

Paꞌpiniꞌ yamapintohuachina, përaantahuaton niitërin. Inapochachin israiroꞌsantaꞌ, inimiconënpitari nitërin. Inapotatona yaꞌipi noꞌpanëna tapitopi. Ninanonënapitantaꞌ, pënquë ahuiquitëraꞌpiapi. Napoaton tanahuantárin acopi.

Jeremías 2:6

Naniantatonaco, co yonirinacohuëꞌ. Cari Iquipito quëran ocoiato, inotëro parti quënahuë. Inaso noꞌpaꞌ, yaniroꞌ. Notohuaroꞌ ohuatë yaꞌhuërin. Inaquëso co iꞌsha yaꞌhuërinhuëꞌ, paꞌpi huëhuëpiro yaꞌhuërin. Co insonta inaquë yaꞌhuërinhuëꞌ. Co insonta inaëchin iratërinhuëꞌ.

Jeremías 23:10

Yaꞌipi Israiro noꞌpaquë monshihuantëroꞌsa pochin cancantopisopita naꞌamiatërin. Co noyahuëꞌ nicacaisoráchin cancantopisopita naꞌamiatërin. Co noyahuëꞌ ninicatona co nipaꞌpoyapihuëꞌ. Napoaton Siniorosoꞌ ama huachi isoroꞌpaꞌ noyatacaso marëhuëꞌ, shaꞌhuitërin. Inapotërin niꞌton, yanitë pochin ninin. Inotëroquë pastoroꞌsa yaꞌhuërinsopitantaꞌ, huëyarin.

Jeremías 7:29

Naquëranchin Sinioro taantarin: “Quirosarinquë yaꞌhuëramasopita. Naporopi ainëma yaquirahuatomaꞌ, tëꞌyatocoꞌ. Inapoatomaꞌ, tanahuantárin panënoꞌsaquë oshaatoma naꞌnëcoꞌ. Piyapinëhuëpitanquëma nipomarahuëꞌ, noꞌhuitënquëma aꞌporanquëma niꞌton, inapocoꞌ.

Ezequiel 33:28

Ca nohuanton iso noꞌpaꞌ tapimiataponaꞌ. Napoaton tanahuantápon. Noya noꞌpaꞌ huaꞌanëntatomaꞌ: ‘Ma noyacha noꞌpahuanai paya,’ tënamasoꞌ, tapitaranquëmaꞌ. Israiro motopiroꞌsaquë yaꞌhuëpisopitanta tanahuantápon. Co huachi insonta inataquëchin naꞌhuëaponhuëꞌ. Paꞌpi co noyahuëꞌ nicatoma oshahuanamaso marëꞌ ina pochin noꞌpanëma acotaranquëmaꞌ. Naporo huarëꞌ ca Sinioroco ninahuësoꞌ, nitotaramaꞌ,” tënin.

Oseas 4:3

Napoaton yaꞌipi Israiro noꞌpaquë, sëtatona naꞌnërápi. Caniorëso pochin co manta chinipihuëꞌ. Tanan maꞌsharoꞌsa quëran huarëꞌ taquiapi. Inairaroꞌsaꞌ, marë samiroꞌsaꞌ, inapitanta inapoapi,” tënin.

Joel 1:13

Corto huaꞌanoꞌsanquëmaꞌ: Canpitasoꞌ Sinioro artaronënquë sacatëramaꞌ. Yosënënpoa chinotërëhuaso pëiquë, co huachi Sinioro marëꞌ cosharoꞌ, huino, inapita quëpihuëꞌ. Napoaton sëtonëmaquë saꞌcatën aꞌmosahuatomaꞌ, yaꞌipi tashi naꞌnëcoꞌ.

Joel 1:19

Inapoatoi Sinioro nontarainquën. Inotëroquë pastoroꞌsa yaꞌhuërinsoꞌ, pëni ahuiquitëraꞌpiarin. Yaꞌipi nararoꞌsanta yaꞌhuërinso napotërin.

Amós 5:1

Israiroꞌsanquëmaꞌ. Ipora shaꞌhuitaantaranquëmasoꞌ, noya natancoꞌ: Canpita yonquiatënquëmaꞌ, nichimiantohuatëra sëtatë osharëso pochin nisarahuë.

Amós 5:16

Isonta Sinioro shaꞌhuitaantarinquëmaꞌ: “Ca nohuanton nani prasaquë naꞌnëpomaꞌ. Nani cachiquë co napion ancantatomaꞌ, noncaropomaꞌ. Notohuaroꞌ chimipiroꞌsa yaꞌhuëapon niꞌton, canacaiso marëꞌ naꞌnëroꞌsa nipisopita, imin camayoroꞌsaꞌ, inapita naꞌnëcaiso marëꞌ amatapomaꞌ. Yaiꞌpi oparoroꞌsaquë naꞌnëpomaꞌ. Anaꞌintaꞌhuanquëmaso marëꞌ oꞌmahuato, napoaramaꞌ. Ca Sinioroco napotaranquëmaꞌ. Caso Yosëco yaipi nanitaparahuë, tënahuë,” tënin.

Miqueas 2:4

Ina tahuëri nanihuachin, sëtatona oshaapiso pochin tëhuacaiso marëꞌ cantarapiaponënquëmaꞌ: ‘Noyá ataꞌhuantërinënpoachi paya. Sinioro piyapinënpitanpoa nipirëhuahuëꞌ, iporasoꞌ aꞌnapita huaꞌanëntërinënpoaꞌ. Inapotiinënpoaso marëꞌ co incari tëranta yaꞌcopirinhuëꞌ. Noꞌpanënpoapitantaꞌ, canarinënpoasopitari nipatomatatonaꞌ, huaꞌanëntopi huachi,’ itaponëmaꞌ,” tënin Sinioro.

Miqueas 3:12

Naporamaso marëꞌ chinotëramacoso pëi ohuatapona niꞌton, pantatápon. Quirosarin ninanontaꞌ, ina pochachin nitapi,’ tënahuë,” tënin.