Jeremías 37:13 - Chayahuita (Shahui)

¹³ Mincamin yaꞌcoana itopiquë nipatora, Iriasë aꞌpaitoroꞌsa huaꞌan maninco. Inasoꞌ Sirimiasë huiꞌnin. Sirimiasënta paꞌpin Ananiasë itopi. Iriasëso masahuatonco: —¡Quëmasoꞌ papironiaroꞌsa catahuacaso marëꞌ paꞌsaran! itërinco.

Jeremías 37:13 ပူးပေါင်းရင်းမြစ်များ

Jeremías 18:18

Aꞌna tahuëri piyapiꞌsa chinotatonaco: “Huëco paꞌahua Irimiasë tëpacaiso marëꞌ shaꞌhuirapiaꞌhuaꞌ. Ama manta naporinso natëahuasohuëꞌ. Corto huaꞌanoꞌsa Yosë nanamën aꞌchintiinpoasoꞌ, co pahuanaponhuëꞌ. Yonquinahuanoꞌsanta pënënainpoasoꞌ, yaꞌhuëapon. Pënëntonaꞌpiroꞌsanta Yosë naporinsoꞌ anitotiinpoasoꞌ, yaꞌhuëapon,” topi.

Jeremías 20:10

Naní quëran pochin tëhuatonaco: “Yaꞌipi parti paꞌyan yaꞌhuërin” itoninaco. Naporahuaton: “Huëco paꞌahua shaꞌhuirapiahuaꞌ,” tosápi. Amiconëhuëpita quëran huarëꞌ tëhuëcaꞌhuaso ninapi. Monatonaco yacanarinaco. “Canarëhua naporini, iꞌhuërëchitërihuahuëꞌ,” topi.

Jeremías 20:2

Ina natanaton camaitërin: “Irimiasë huihuirahuatomaꞌ, nontëroꞌsaquë nantëquën acatëntocoꞌ,” tënin. Napohuachina inapotërinaco. Ina nontëroꞌsasoꞌ, “inapa Mincamin yaꞌcoana” itopiquë yaꞌhuërin. Ina yaꞌcoanasoꞌ, Yosë chinotacaso pëi pirayan yaꞌhuërin.

Jeremías 36:12

Natanahuaton, copirno huaꞌanëntërinso pëiquë paꞌnin. Quirica ninshitonaꞌpi patoananënquë, chiníquën nanantopisopita huaꞌanoꞌsa nani niyontonpi. Irisama ninshitonaꞌpi, Simaiasë huiꞌnin Piraia, Acaporo huiꞌnin Irnatan, Sahuin huiꞌnin Quimariasë, Ananiasë huiꞌnin Sitiquiasë, inapita. Nisahuaton, aꞌnapita huaꞌanoꞌsanta nani niyontonpi.

Jeremías 38:1

Aꞌna tahuëri yaꞌhuëhuanoꞌsa pënënahuë: “Sinioro anitotiinpoaso marëꞌ naporin: ‘Iso ninanoquëranchin nisápatamaꞌ, quira quëran, tana quëran, canio quëranhuë nipon chiminapomaꞌ. Napoaponahuëꞌ, papironiaroꞌsa paaparahuatoma inapitarëꞌquëma anoyatohuatamaꞌ, maꞌshanëma ayatapomarahuëꞌ, co chiminapomahuëꞌ. Quirosarin ninanosoꞌ, Papironia copirno sontaronënpitari canapon. Co insoari tëranta nanitarinhuëꞌ yaꞌcopicasoꞌ,’ tënin Sinioro,” itërahuë. Naporahuësoꞌ, isopita huaꞌanoꞌsanta natanarinaco: Matan huiꞌnin Sihuatiasë itopisoꞌ, Pasoro huiꞌnin Quitariasë itopisoꞌ, Sirimiasë huiꞌnin Ocaro itopisoꞌ, Marquiasë huiꞌnin Pasoro itopisoꞌ, inapita.

Jeremías 38:4

Inapita huaꞌanoꞌsasoꞌ, copirno nontapona paꞌpi: —Irimiasësoꞌ, yaꞌipi sontaroꞌsa iso ninanoquë yaꞌhuëpiso pënënaton aꞌpayanin. Yaꞌhuëhuanoꞌsanta inapotërin. Inaso co yacatahuarinpoahuëꞌ. Canainënpoaso nohuantaton napoarin niꞌton, chiminacaso yaꞌhuërin, itoonpi.

Jeremías 38:7

Copirnosoꞌ aꞌnara piyapinën natërinsoꞌ yaꞌhuëtërin. Inasoꞌ, Itiopia quëmapi Ipiti-mirico, itopi. Inantaꞌ, iꞌsha tapainanquë poꞌmorinacoso natantërin. Napohuachina copirno pëi quëran pipirahuaton ina nontapon paꞌnin: Naporoꞌ copirnosoꞌ, Mincamin yaꞌcoana itopiquë huënsëaton nonsarin. Quënanconahuaton:

Amós 7:10

Pitiriquë aꞌnara corto huaꞌan yaꞌhuërin. Inasoꞌ, Amasiasë itopi. Pënëntërahuësoꞌ natanahuaton, Quiropoamo copirno anitotacaso marëꞌ nanan aꞌpatërin: “Amosë yaocoiatënquën pinosárinquën. Naporinsoꞌ, yaꞌipi israiroꞌsacoi co noyahuëꞌ natanai. Naporin pënëntapon: ‘Inimicoroꞌsari israiroꞌsa ahuëhuachinaꞌ, Quiropoamosoꞌ ahuëtápaton, chiminapon. Inapoatona inimicoroꞌsasoꞌ, aꞌna noꞌpaꞌpaꞌ quiquiaponënpoaꞌ,’ tënin,” itopi.

Lucas 23:2

Inaquë shaꞌhuirapipi. —Iso quëmapi piyapiꞌsaꞌ nonpintarin. “Noma copirno coriqui yamaꞌpahuachinquëmaꞌ, ama quëtocosohuëꞌ,” tosahuaton: “Casoꞌ Cristoco. Yosë aꞌpaimarinco huaꞌanëntaꞌhuaso marëꞌ,” toconin, itopi.

Hechos 24:13

Topinan quëran nonpinapirinaco. Naꞌcon shaꞌhuirapipirinacohuëꞌ, niꞌnincoso chachinso co yaꞌhuërinhuëꞌ.

Hechos 6:11

Napoaton poꞌoana quëran quëmapiꞌsaꞌ pahuërëpi shaꞌhuirapicaiso marëꞌ. Inapotohuachinara, shaꞌhuirapipi: —Iso quëmapisoꞌ, co noyahuëꞌ. Moisësë pinorin. Yosëntaꞌ pinorin natanai, tosápi.

2 Corintios 6:8

Aꞌnaquën noya niꞌninacoi. Aꞌnaquënso nipirinhuëꞌ noꞌhuirinacoi. Aꞌna tahuëri: “Paono nóya aꞌchinin,” topi. Aꞌna tahuëriso nipirinhuëꞌ pinorinacoi. Noꞌtëquën aꞌchintopiraihuëꞌ: “Nonpiánpi,” topi aꞌnaquëntaꞌ.