Jeremías 31:7 - Chayahuita (Shahui)

⁷ Naquëranchin Sinioro taantarin: “Yaꞌipi israiroꞌsanquëmaꞌ, capa cancantatoma cantacoꞌ. Canpitaso aꞌnapita nacionoꞌsa quëran chini chiníquën nanantaramaꞌ. Napoatomaꞌ: ‘¡Ma noyacha quëmasoꞌ piyapinënpitacoi nichaꞌërancoi paya! Carayacoi quëparitëraisopita napotërancoi,’ tëcatoma chinotaramaco,” tënin.

Jeremías 31:7 ပူးပေါင်းရင်းမြစ်များ

Salmos 14:7

¡Maꞌcha Quirosarin quëran Sinioro huëꞌsahuaton, israiroꞌsanpoa nichaꞌërinpoahuë paya! Piyapinënpitanpoa nipirëhuahuëꞌ, aꞌna parti quëninënpoaꞌ. Sinioro nohuanton yaꞌhuërëhuaquë panantahuatëhuaꞌ, Cacopo shinpitanpoa noya ancantarihuaꞌ. Yaꞌipi israiroꞌsanpoa napoarihuaꞌ.

Salmos 69:35

Quëmari chachin Quirosarinquë yaꞌhuëpisopita nichaꞌësaran. Cota huënton noꞌpanënaquë ninanoroꞌsa yaꞌhuërinsontaꞌ, anoyataantaran. Quëma nohuanton piyapinënpita iso noꞌpa chachin huaꞌanëntaponaꞌ. Huaꞌanëntatonaꞌ, inaquë yaꞌhuëapona huachi.

Isaías 1:9

Siniorosoꞌ yaꞌipi nanitapaton, carayanpoa quëparitahuaso marëꞌ aꞌpairinpoaꞌ. Coꞌsoꞌ inaporinhuë naporini, Sotoma, Comora, inapita ninanoroꞌsa pochin, nani taꞌhuanchitërihuahuëꞌ.

Isaías 44:23

Piꞌiroꞌtëꞌ, quëmanta piyapi pochin nicaton cantaquëꞌ. Sinioro naporinso yonquiaton cantaquëꞌ. Capa cancantaton, inapoquëꞌ. Noꞌpaꞌ acoporonta piyapi pochin nicaton, “yai, yai,” charaꞌin. Motopiroꞌsaꞌ, tananoꞌsaꞌ, yaꞌipi nararoꞌsaꞌ, canpitanta capa cancantocoꞌ. Nichaꞌësahuatonpoaꞌ, Sinioro chiníquën nanantërinsoꞌ aꞌnotërinpoaꞌ.

Isaías 52:8

Natancoꞌ. Ninanonëma aꞌpaipisopita chiníquën shaꞌhuirapi. Napopináchin noncaroapi. Canatohuachinara noncaropiso pochin nisapi. Onpopinsona Quirosarinquë Sinioro huëantarinsoꞌ, inahuara yaꞌpirina quëran chachin niꞌsapi.

Isaías 61:9

Inahua quëran pipipisopitasoꞌ, nisha nisha nacionquë nahuinaponaꞌ. Yaꞌipi niꞌpisopitari: ‘Tëhuënchachin isopitasoꞌ Siniorori catahuarin,’ taponaꞌ,” tënin.

Jeremías 20:13

¡Sinioro paꞌyatatëhua cantahuaꞌ! Co noyahuëꞌ nipisopita aparisitopirinënpoahuëꞌ, inaso nichaꞌërinpoaꞌ.

Jeremías 23:3

Huaꞌqui quëran napoaponahuëꞌ, piyapinëhuëpita ayontoantarahuë. Nisha nisha parti aꞌparahuë quëran huënantaponaꞌ. Ohuicaroꞌsa pastonënquë chachin quënantahuatëra, naꞌantarinso pochin inapitanta nitarahuë.

Jeremías 31:12

Napoaton huëantarahuatonaꞌ, Quirosarin motopiaꞌhuaroꞌsaquë cantaponaꞌ. Siniorori catahuarinsoꞌ yonquiatona capa cancantapi. Ina nohuanton trico, huino, tomaꞌ, ohuicaroꞌsaꞌ, ohuacaroꞌsaꞌ, inapita yaꞌhuëtaponaꞌ. Pairapipisoanaquë shaꞌpisoꞌ, noyá oporapitopinan pochin nisapi. Co huachi onporo tëranta sanpatërëso pochin nisapihuëꞌ.

Oseas 1:7

Cota huëntonso napoaponahuëꞌ, nosoroarahuë. Cari chachin inapitasoꞌ, nichaꞌësarahuë. Yosënënaco niꞌto, topinan nichaꞌësarahuë. Co ahuëtatona chaꞌësapihuëꞌ. Sahuëni, pëꞌchinan, cahuarioroꞌsaꞌ, sontaroꞌsa cahuarioquë paꞌpisopita, co inapita nohuantarahuëꞌ,” itaantarin.

Joel 2:32

Sinioro chinotopisopitaso nipirinhuëꞌ, chimirin quëran chaꞌësapi. Sinioro naporinso chachin huayoninsopitasoꞌ, chaꞌësapi. Quirosarin ninanoquë chaꞌëcaiso yaꞌhuëapon niꞌton, napoapi.

Amós 5:15

Co noyahuëꞌ ninamasopita noꞌhuicoꞌ. Noya nicacamasoso nipirinhuëꞌ, paꞌyatocoꞌ. Nanan anoyatahuatamaꞌ, noꞌtëquënáchin shaꞌhuicamasoꞌ cancantocoꞌ. Tapona naporamaso marëꞌ carayanquëma chaꞌëramasoꞌ, Yosë nosoroápirinquëmahuëꞌ. Inasoꞌ Sinioro. Yaꞌipi nanitaparin.

Miqueas 2:12

Ina quëran Sinioro taantarin: “Piyapinëhuëpita yaꞌhuëpiso noꞌpa quëran, inimiconënapitari quëpaponaꞌ. Quëpapirinahuëꞌ, cari chachin yaꞌipi inapita ayontoantarahuë. Inapitasoꞌ caraya pochin quëparitopirinahuëꞌ, ohuicaroꞌsa huëꞌërinquë ayontonëso pochin nitarahuë. Ohuica huënton pastonënquë quëparëso pochin nitarahuë. Panca huënton ohuica noncaropiso pochin israiroꞌsa noncaroponaꞌ.

Miqueas 7:18

Siniorosoꞌ noya niꞌton, ina nontato: “¡Quëmaíchin Yosënquën. Co aꞌna quëma pochin yaꞌhuërinhuëꞌ! Piyapiꞌsa co noyahuëꞌ nipirinahuëꞌ, oshanëna marëꞌ sëtatona nontërinën niꞌton, nichaꞌëran. Caraya israiroꞌsacoi quëparitëraisopita, co natantochináchinhuëꞌ cancantatoi tëhuëtërainquën. Inapopiraihuëꞌ nontërainquën niꞌton, tëhuëtërainquënsoꞌ naniantëran. Noꞌhuípiro nipiraihuëꞌ nosororancoi niꞌton, noꞌhuitëransoꞌ asanoran. Inapoaton catahuantarancoi.

Romanos 11:5

Inapochachin iporantaꞌ caraya pochin Yosë huëntonënquë yaꞌconpi. Inaora nohuanton, nosoroaton, Yosëri ayaꞌconin.

Romanos 9:27

Isaiasëntaꞌ ninoton, ninshitërin. “Huaꞌhuayatërahuëꞌ israiroꞌsaꞌ yaꞌhuëpirinahuëꞌ, co yaꞌipiya chaꞌësapihuëꞌ. Marë yonsanquë inotëraꞌhuaya yaꞌhuërinso nápoꞌ yaꞌhuëpirinahuëꞌ, caraíchin Yosëri nichaꞌësarin.

Deuteronomio 32:43

Cantarinso tiquiapon pochin Moisësësoꞌ taantarin: “Canpitanta nisha nisha nacionoꞌsaquë yaꞌhuëramasopita, israiroꞌsarëꞌquëma capa cancantocoꞌ. Piyapinënpita tëpahuachinaꞌ, Siniorori noꞌtëquën iꞌhuërëtarin. Huaꞌanën niꞌton napotarin. Yaꞌipi inimiconënpita anaꞌintaton iꞌhuërëtarin. Israiroꞌsa oshanën inquitahuaton, noꞌpanëntaꞌ, tapararin,” tënin Moisësë cantaton.