Jeremías 31:32 - Chayahuita (Shahui)

³² Naporosoꞌ, co huachi Iquipito quëran ocoiapo anoyatërahuëso pochin nisarinhuëꞌ. Iracaso inapitaroꞌco anoyatato huaꞌanëntopirahuëꞌ, inapitaso anoyatërahuësoꞌ tapipi.

Jeremías 31:32 ပူးပေါင်းရင်းမြစ်များ

1 Reyes 8:9

Yosë caposonënquësoꞌ, cato naꞌpitëaꞌhuaroꞌsa yaꞌhuërin. Inapitaquë israiroꞌsa Siniororë anoyatopisoꞌ, ninshitopi. Iquipito quëran pipipona Sinaiquë Moisësëri poꞌmorin.

Salmos 73:23

Napoaporahuëꞌ, co aꞌporancohuëꞌ. Nosoroatonco inchinan imira quëran sëꞌquërëso pochin quëparanco.

Éxodo 19:5

Yaꞌipi isoroꞌpaquë nisha nisha piyapiꞌsa cari huaꞌanëntërahuë. Napoaton canpitasoꞌ, yaꞌipi camaitërahuëso natëcoꞌ. Maꞌsona taꞌtëhua canpitarëꞌco anoyatërahuësonta coꞌsoꞌ naniantohuatamahuëꞌ, noya niꞌsaranquëmaꞌ. Aꞌnapita piyapiroꞌsa quëran, noya noya niꞌsaranquëmaꞌ.

Éxodo 32:8

Pënënahuësopita naniantatonaꞌ, aꞌnaroáchin pëshonpi huachi. Oro asoquirahuatona moshacaiso marëꞌ, toroaꞌhuaya nonanpi. Ina chinotacaiso marëꞌ pëꞌtahuanëna tëparahuatonaꞌ, ahuiquitopi. Nani chinotahuatonaꞌ: “¡Iso mini yosënënpoa Iquipito quëran ocoirinpoasoꞌ!” toconpi, itërin.

Isaías 41:13

Caso Sinioroco niꞌto, Yosënëmaco. Imirahuë quëran sëꞌquëatë pochin quëpáranquëmaꞌ. Napoaton: ‘Ama tëꞌhuacosohuëꞌ, catahuaranquëmaꞌ,’ itaranquëmaꞌ.

Isaías 54:5

Nininquëmasoꞌ, saꞌatatë pochin nitarinquëmaꞌ. Inasoꞌ nininën, Sinioro yaꞌipi nanitaparinsoꞌ. Inasoꞌ Yosë, noyasáchin ninin niꞌton, Israirori chinotërin. Ina nichaꞌërinquëmaꞌ. Yaꞌipi isoroꞌpaꞌ huaꞌanëntaton napotarinquëma niꞌton, yaꞌipi inapita naniantaramaꞌ.

Jeremías 2:2

“Quirosarinquë yaꞌhuëpisopita nontoonquëꞌ. Chiníquën nonaton ca Sinioroco naporahuësoꞌ shaꞌhuitëquëꞌ: ‘Iráca casáchin cancantëramaco. Niꞌquëꞌ. Nanon nasha soꞌyahuachina, soꞌin naꞌcon nosororin. Ina pochin canpitanta cancantatomaꞌ, inotëro parti imaquiramaco. Inaquëso co maꞌsha tëranta shaꞌnëhuë nipirinhuëꞌ, naporamaꞌ.

Jeremías 31:1

Ina quëran taantarin: “Ina tahuëri nanihuachin, casáchin yaꞌipi Israiro huëntonoꞌsa chinotarinaco. Inapitanta piyapinëhuëpita nisapi,” tënin.

Oseas 11:1

Sinioro naporin: “Israiro nacion ipora caniaritapon, huaꞌhuishin pochin ninin. Naporo chachin cariso huiꞌnahuë pochin nicato, nosororahuë. Iquipitoquë yacapatopirinhuëꞌ, ina quëran pipicaso marëꞌ huiꞌnahuë përarahuë.

Oseas 2:2

Naquëranchin Siniorori israiroꞌsa itaantapon: “Israiro nacionsoꞌ, saꞌahuë pochin ninin. Inapitaso napoaponahuëꞌ, tëhuananpitatë pochin nitërinaco. Napotërinacoso marëꞌ carintaꞌ, inapita aꞌporahuë. Naporinso marëꞌ, huaꞌhuinpitari coisëquë quëpatona shaꞌhuirapiinaꞌ. ¡Ama huachi niminta paya pochin nisáinsohuëꞌ! ¡Ama huachi aꞌna aꞌna poꞌchinsohuëꞌ!

Oseas 3:1

Ina quëran Siniorosoꞌ camaiantatonco: “Paaton, saꞌan chachin maantaquëꞌ. Inasoꞌ aꞌporahuatënquën, aꞌna quëmapirëꞌ yaꞌhuëárin. Inapopirinhuëꞌ, naquëranchin nosoroantaquëꞌ. Ina pochin caso Sinioroco israiroꞌsa nosororahuë. Inapitasoꞌ mamanshiroꞌsa moshatonaꞌ, cashin panoꞌsa inahua marëꞌ quëpi. Ina quëran inapita mosharahuatonaꞌ, ina panoꞌsasoꞌ caꞌpi. Ina panoꞌsasoꞌ, opa cayarinso ayanirahuatona acotopi,” itërinco.

Marcos 8:23

Itohuachinara, maimirarahuaton, ninano aipiran quëparin. Iroiquë pashirayatërin. Nani sëꞌhuarayarahuaton: —¿Maꞌtaꞌ iyasha quënanan? itërin.

Juan 3:29

Niꞌcoꞌ. Quëmapi saꞌapachina, amiconëontaꞌ noya cancantërin. Noya nipayapi niꞌton, naporinsoꞌ natantaton, nóya cancantërin. Inapochachin cantaꞌ ninahuë. Naꞌcon piyapiꞌsaꞌ Quisoso imasapi niꞌton, nóya cancantërahuë.

Hechos 23:19

Capitan huaꞌani matanparahuaton, amashamiachin quëparin ama piyapiꞌsari natanacaiso marëhuëꞌ. —¿Maꞌtaꞌ yashaꞌhuitërancosoꞌ? itërin.

2 Corintios 11:2

Yosë nohuanton, naꞌcon nosororanquëmaꞌ. Nosoroatënquëmaꞌ, aꞌpitëranquëmaꞌ. Co nohuantërahuëꞌ nisha cancantacamasoꞌ. Nanon soꞌyarinso pochin ninin. Niꞌcoꞌ. Quëmapiri mapachina, soꞌináchin yonquicasoꞌ yaꞌhuërin. Inapochachin carinquëmantaꞌ aꞌchintëranquëmaꞌ Quisocristoíchin yonquicamaso marëꞌ.

Deuteronomio 31:16

Naporoꞌ Siniorori Moisësë itapon: “Co huaꞌquiya quëranhuë quëmasoꞌ chiminapon. Aꞌnapitaso noꞌpaꞌ quëtarahuëquë yaꞌconpachinaꞌ, nisha cancantapi. Inapoatonaꞌ, nisha nisha mamanshiroꞌsa yaꞌhuëhuanoꞌsari moshapisoꞌ, moshatona aꞌpoaponaco. Inapitaroꞌco nani anoyatopirahuëꞌ, napoatona anoyatërahuëso tapiaponaꞌ.

Deuteronomio 31:20

Iráca shimashonënapita, shaꞌhuitërahuë: ‘Caso Yosëco niꞌto, iso noꞌpaꞌ shiparimapita quëtarahuë,’ itërahuë. Napotërahuëso chachin, inaquë ayaꞌcoanahuë. Inaquëso co manta pahuaninhuë niꞌton, inaquë yaꞌconatonaꞌ, natëaquë huarëꞌ coshataponaꞌ. Coshatatona amonpachinaꞌ, nisha nisha mamanshiroꞌsa tahuërëtaponaꞌ. Inapoatona nocanaponaco. Napoatona inapitaroꞌco anoyatërahuësoꞌ, tapiaponaꞌ.

Hebreos 8:9

Iráca inapitasoꞌ Iquipito parti yaꞌhuëpirinahuëꞌ, imiranpo quëran sëꞌquërëso pochin nosoroato, nichaꞌërahuë. Naporoꞌ inapitarëꞌco anoyatopirahuëꞌ, co natantochináchinhuëꞌ cancantopi niꞌton, tananpitërahuë,” tënin Yosë.