Jeremías 31:12 - Chayahuita (Shahui)

¹² Napoaton huëantarahuatonaꞌ, Quirosarin motopiaꞌhuaroꞌsaquë cantaponaꞌ. Siniorori catahuarinsoꞌ yonquiatona capa cancantapi. Ina nohuanton trico, huino, tomaꞌ, ohuicaroꞌsaꞌ, ohuacaroꞌsaꞌ, inapita yaꞌhuëtaponaꞌ. Pairapipisoanaquë shaꞌpisoꞌ, noyá oporapitopinan pochin nisapi. Co huachi onporo tëranta sanpatërëso pochin nisapihuëꞌ.

Jeremías 31:12 ပူးပေါင်းရင်းမြစ်များ

Salmos 130:4

Nipirinhuëꞌ oshanëhuëi inquitërancoi niꞌton, noya nicatëinquën chinotarainquën.

Isaías 1:30

Insina nara nohuamëtërinso pochin canpitanta nisaramaꞌ. Yancoroꞌ iꞌshari pahuantërinso pochin nisaramaꞌ.

Isaías 35:10

Siniorori nichaꞌërinsopita Quirosarinquë huënantaponaꞌ. Capa cancantatona cantarëꞌnachin huënantaponaꞌ. Noya yaꞌhuëatona capa cancantaponaꞌ. Co huachi iquitacaisoꞌ yaꞌhuëaponhuëꞌ. Co huachi naꞌnëcaisoꞌ yaꞌhuëaponhuëꞌ.

Isaías 52:8

Natancoꞌ. Ninanonëma aꞌpaipisopita chiníquën shaꞌhuirapi. Napopináchin noncaroapi. Canatohuachinara noncaropiso pochin nisapi. Onpopinsona Quirosarinquë Sinioro huëantarinsoꞌ, inahuara yaꞌpirina quëran chachin niꞌsapi.

Isaías 58:11

Carima noꞌtën ira quëpatáponquëmaꞌ. Co piyapi yaꞌhuërinquëhuë niponahuëꞌ, natëaquë huarëꞌ aꞌcaponquëmaꞌ. Ca nohuanton chiníquën nisaramaꞌ. Yancoroꞌ noyá oporapitërëso pochin nisaramaꞌ. Huinan co yanirinsohuë pochin nisaramaꞌ.

Isaías 60:20

Piꞌisoꞌ, co huachi yaꞌconaponhuëꞌ. Yoquinta co huachi ayamaponhuëꞌ. Caso Sinioroco aꞌpintomiataranquëmaꞌ. Inapotatënquëmaꞌ, sëtëramasoꞌ inquitaranquëmaꞌ.

Isaías 65:19

Ina ninano yonquiato capa cancantarahuë. Piyapinëhuëpitanta yonquiato, capa cancantarahuë. Inaquësoꞌ, co huachi onporonta naꞌnëponahuëꞌ. Co huachi napion ancantatonaꞌ, nontaponacohuëꞌ.

Jeremías 31:24

Yaꞌipi Cota huënton israiroꞌsa inaquë yaꞌhuëaponaꞌ. Ninanoroꞌsaquë yaꞌhuëpisopita, imin camayoroꞌsaꞌ, pëꞌtahua aꞌpairoꞌsaꞌ, inapita inaquë yaꞌhuëaponaꞌ.

Jeremías 31:25

Tanarëso pochin cancantopisopita aꞌcatë pochin nitarahuë. Yamororëso pochin cancantopisopitantaꞌ, oꞌshitatë pochin nitato achinicancanarahuë,” itërinco.

Jeremías 31:4

Nasha quëran chachin noya acoantaranquëmaꞌ. Capa cancantatoma nansapomaꞌ. Shari shari piꞌniatomaꞌ, nansapomaꞌ.

Jeremías 31:6

Co huaꞌquiya quëranhuëꞌ Iprain motopiaꞌhuaroꞌsaquë aꞌpaitoroꞌsa chiníquën shaꞌhuiponaꞌ: ‘Huëco paꞌahua Quirosarinquë niꞌtontaꞌahuaꞌ. Inaquë Sinioro chinotontaꞌahuaꞌ,’ tëcaponaꞌ,” tënin.

Jeremías 31:7

Naquëranchin Sinioro taantarin: “Yaꞌipi israiroꞌsanquëmaꞌ, capa cancantatoma cantacoꞌ. Canpitaso aꞌnapita nacionoꞌsa quëran chini chiníquën nanantaramaꞌ. Napoatomaꞌ: ‘¡Ma noyacha quëmasoꞌ piyapinënpitacoi nichaꞌërancoi paya! Carayacoi quëparitëraisopita napotërancoi,’ tëcatoma chinotaramaco,” tënin.

Ezequiel 36:30

Ca nohuanton nararoꞌsaꞌ, sharoꞌsaꞌ, inapitanta naꞌcon naꞌcon nitapon. Ama aꞌnapita nacionoꞌsa niꞌtonënquë, tanarotatoma taparo nicamaso marëhuëꞌ, napoarahuë.

Oseas 3:5

Ina piquëran israiroꞌsasoꞌ, Yosë chachin tahuërëtaantaponaꞌ. Naporahuaton aꞌnara Tapi copirno shiin, copirnonëna nisarin. Tahuëri yanitiquirahuachin, Sinioro noya nicatonaꞌ, chinotapi. Inapotohuachina inarintaꞌ, noya nicaton catahuaantapon.

Joel 3:18

Cota huënton inimiconënpita anaꞌintërahuëso piquëran, paꞌpi notohuaroꞌ oparoroꞌsa yaꞌhuëapon. Napoaton huino sacóshin nicaponaꞌ. Pastoroꞌsantaꞌ noya noyatapon niꞌton, ohuacaroꞌsa notohuaroꞌ shoꞌshoiꞌ matapi. Motopiroꞌsaꞌ, motopiaꞌhuaroꞌsaꞌ, inaquëpita iꞌsharoꞌsa paꞌirin. Ina paꞌirinso pochin huino, shoꞌshoiꞌ, inapita yaꞌhuëapon. Iꞌsharoꞌsanta Cota huënton noꞌpanënquë yaꞌhuërinsoꞌ, panca pancairoꞌsa nicaponaꞌ. Chinotërinacoso pëiquë chachin, noꞌpa quëran iꞌsha pipipon. Inasoꞌ pancaitahuaton, Sitin motopiana itopisoꞌ, paꞌtapon.

Juan 16:22

Inapochachin canpitantaꞌ ipora sëtapiramahuëꞌ, naquëranchin quënaantaranquëmaꞌ. Naporoꞌ nóya cancantaramaꞌ. Co huachi insontaꞌ nanitarinhuëꞌ asëtainëmasoꞌ. Nóya cancantomiataramaꞌ.

Romanos 2:4

Yosë nosororinpoasoꞌ co noꞌtëquën yonquiramahuëꞌ. “Co aꞌnaroáchin noꞌhuirinpoahuëꞌ,” taꞌtomaꞌ, co noyahuëꞌ ninamaꞌ. Tëhuënchachin co aꞌnaroáchin anaꞌintërinquëmahuëꞌ. “Oshaquëran co noyahuëꞌ yonquipisopita naniantaponaꞌ nimara,” taꞌton, ninarárin.

Apocalipsis 21:4

Yosëri chachin naꞌnëiꞌ amirayatarin. Co huachi chiminaponahuëꞌ. Co huachi sëtaponahuëꞌ. Co huachi naꞌnëponahuëꞌ. Co piꞌpisha tërantaꞌ iquitaponahuëꞌ. Iráca naꞌcon parisitopirinahuëꞌ, co huachi ina pochin yaꞌhuaponahuëꞌ. Noya noya yaꞌhuaponaꞌ, tënin.

Apocalipsis 7:17

Niꞌcoꞌ. Huaꞌanëni ohuicanënpita noya aꞌpaiarin. Quëchitërahuaton, noya iiꞌ aꞌnotërin oꞌocaiso marëꞌ. Inapochachin Carniroaꞌhuari imapisopita aꞌpaiarin. Yosëꞌpaꞌ noya noya nanpiapi. Yosëri chachin naꞌnëiꞌ amitarin niꞌton, co huachi sëtaponahuëꞌ, itërinco.