Jeremías 23:6 - Chayahuita (Shahui)

⁶ Ina copirno nicasoꞌ, Cota huënton israiroꞌsa chaꞌëponaꞌ. Aꞌnapita israiroꞌsantaꞌ, sano cancan quëran yaꞌhuëaponaꞌ. Nininën nohuitatonaꞌ, ‘Sinioro nichaꞌërinpoasoꞌ,’ itaponaꞌ,” tënin.

Jeremías 23:6 ပူးပေါင်းရင်းမြစ်များ

Éxodo 9:26

Sharoꞌsa ocairi paꞌpitërin: Rino, sipata, inapita itopiso tapirin. Rinosoꞌ, nani yancon, sipatanta nani huënshara nipirinhuëꞌ, tapirin. Trico, sintino, inapitaso pahuanasoi niꞌton, noya chaꞌëchachinpi. Napoaponahuëꞌ, israiroꞌsa yaꞌhuëpiquësoꞌ, co manta ocai anotërinhuëꞌ. Napoaton copirnori, Moisësë, Aaron, inapita amataantarin. Huëꞌpachinara itapon: —Tëhuënchachin co noyahuëꞌ nicato oshahuanahuëꞌ. Co Yosëso tëhuërinhuëꞌ. Quiya tëhuëraisoꞌ. Co huachi yaꞌcopiaponquëmahuëꞌ, noya paꞌsarama huachi. Ina pochin shaꞌhuitocoꞌ. ¡Ocai, huira, inapita co huachi ahuantëraihuëꞌ! itërin. —Tëhuënchachin Yosë chinotëraisoꞌ, yaꞌipiroꞌpaꞌ huaꞌanëntërin. Ina anitotaꞌhuanquënso marëꞌ ninano quëran pipiso chachin Yosë nontarahuë. Ama huachi ocai, huira, inapita anotacaso marëhuëꞌ nontarahuë. Co mini quëmasoꞌ, Yosë tëꞌhuachátëraranhuëꞌ. Catahuarinënquënsopita huaꞌanoꞌsantaꞌ, co ina tëꞌhuachátërapirinahuëꞌ, Yosë nontarahuë, itërin.

Isaías 2:4

Nisha nisha nacionoꞌsa Siniorori coisë pochin nicaton noꞌtëquën shaꞌhuitarin. Nisha nisha piyapiroꞌsa ninoꞌhuirápirinahuëꞌ, acopitapon. Sahuëninënaꞌ, noꞌpaꞌ ohuërënanoꞌsa atarantaponaꞌ. Nansanënantaꞌ, yaquitonanoꞌsa atarantaponaꞌ. Co inso piyapiroꞌsa tërantaꞌ, niahuëcaiso marëꞌ ohuarapisopita macaponahuëꞌ. Naporahuatonaꞌ, co huachi niahuëcaiso marëꞌ niaꞌchintaponahuëꞌ.

Isaías 32:1

Natanco aꞌna shaꞌhuitaantaꞌinquëmaꞌ: Aꞌnaraꞌ copirno yaꞌconaton, noyasáchin huaꞌanëntapon. Naporoꞌ huaꞌanoꞌsantaꞌ, noyasáchin nicatona huaꞌanëntaponaꞌ.

Isaías 32:18

Sano yaꞌhuëpiquë piyapinëhuëpita yaꞌhuëaponaꞌ. Noyá acopinan pëiroꞌsaquë, nóya yaꞌhuëaponaꞌ. Tananoꞌsa aꞌnëatona tiquipirinahuë tërantaꞌ, ninanonta minsërahuatona taparo nitopirinahuë tërantaꞌ, canpitaso noya yaꞌhuëatomaꞌ, capa cancantomiataramaꞌ. Shaꞌtëramaso oporapitamaso marëꞌ, notohuaroꞌ iꞌsha yaꞌhuëtaponquëmaꞌ. Pastontaꞌ, tororoꞌsaꞌ, moraroꞌsaꞌ, inapita capacaiso marëꞌ co pahuanaponhuëꞌ.

Isaías 33:22

Siniorosoꞌ coisënënpoa niꞌton, maꞌpitaso nicacasoꞌ pënëninpoaꞌ. Inasoꞌ copirnonënpoa niꞌton, nichaꞌësarinpoaꞌ. Ina nohuanton inimicoroꞌsa nanchanënaquë pancara nara ahuanipisoꞌ, co chiniaponhuëꞌ. Sihuirinënpita ananahuatërin niꞌton, ihuani pihuicasoꞌ nëꞌmëtëntaꞌ, saꞌmoconin. Inapohuachina, inimicoroꞌsa maꞌshanëna osërëtarihuaꞌ. Somarayaroꞌsa quëran huarëꞌ maꞌsha macaponaꞌ. Sonpacharoꞌsanta maꞌsha mamiataponaꞌ.

Isaías 33:5

Siniorosoꞌ piꞌiroꞌtëquë yaꞌhuërin. Inasoꞌ, chini chiníquën nanantërin. Ina nohuanton Quirosarinquë noꞌtëquën yonquiatona noyasáchin nisapi.

Isaías 35:9

Inaquësoꞌ, co paꞌpiniroꞌsa yaꞌhuëaponhuëꞌ. Co huachi tëꞌhuatoro maꞌsharoꞌsa yaꞌhuëaponhuëꞌ. Inataëchin Yosëri nichaꞌërinsopita huënantaponaꞌ.

Isaías 42:6

Ina chachin piyapinën nontaton itaantapon: “Carinquën acoranquën nohuantërahuësoꞌ nicacaso marëꞌ. Imirahuë quëran sëꞌquëatë pochin, carinquën achiniaranquën. Quëmá quëran piyapiroꞌsa nichaꞌëcaꞌhuaso marëꞌ acoranquën. Inapitaroꞌco anoyatërahuëso ayonquiamaso marëꞌ acoranquën. Yaꞌipi nacionoꞌsa aꞌpintatë pochin noꞌtëquën anitotaran.

Isaías 45:17

Israiroꞌsanpoaso nipirinhuëꞌ, Sinioro nichaꞌërinpoaꞌ. Yaꞌhuëmiatacaso marëꞌ nichaꞌërinpoaꞌ. Co onporonta taparo nisarëhuahuëꞌ.

Isaías 54:17

Napoaponahuëꞌ, co inso tëranta ataꞌhuantiinquëmaso marëꞌ huaꞌna acoaponhuëꞌ. Insosona shaꞌhuirapihuachinquën, quëmari acopitëraꞌpiapon. Inpitasona natëhuachinaco, ca nohuanton minsëtaponaꞌ. Sinioro chachin naporin,” tënin.

Isaías 7:14

Sinioro chachin napoahuarëꞌ maꞌsona aꞌnotarinquëma nitotamaso marëꞌ: Niꞌquëꞌ. Ca nohuanton nanon cayoapon. Inapoaton quëmapiaꞌhuaya huaipon. Inasoꞌ huaꞌhuin nohuitaton, Imanino itapon.

Isaías 9:6

Canpoa marëꞌ aꞌnara quëmapiaꞌhua nasitërin. Huiꞌnanpoa Yosë quëtërinpoaso pochin aꞌnara yaꞌipiya marëꞌ quëtërinpoaꞌ. Ina mini huaꞌanëntacaso marëꞌ acorinsoꞌ. Nisha nisha quëran nohuitaponaꞌ: “Paꞌyapiro yonquirinsoꞌ.” “Co minsëchináchinhuëꞌ Yosë.” “Yaꞌhuëmiatonaꞌpi tata.” “Sano cancantonaꞌpi huaꞌan.” Ina pochinpita nohuitaponaꞌ.

Jeremías 31:23

Siniorosoꞌ, yaꞌipi nanitaparin. Inasáchin israiroꞌsanpoa chinotërëhuaꞌ. Ina huaꞌnarahuëquë nontatonco: “Cota huënton israiroꞌsa naꞌcon parisitapirinahuëꞌ, ca nohuanton noya yaꞌhuëantapi. Yaꞌhuëpiso noꞌpaquë chachin huënantahuatonaꞌ, inahuara ninanonënaquë yaꞌhuëantaponaꞌ. Quirosarinquë huënantahuachinaꞌ, noya yonquirapiantatonaꞌ: ‘¡Quirosarin ninanoquë yaꞌhuëpisopitasoꞌ, Siniorori noya yonquirapiton catahuain! Inari huayonin inaquë chinotacaso pëi acocaiso marëꞌ,’ itaponaꞌ.

Daniel 9:24

Quirosarin ninanoꞌ, israiroꞌsaꞌ, inapita Yosëri anaꞌintërinsoꞌ, canchisë shonca simana pahuanarin nanicasoꞌ. Ina nápo simana nanihuachin, nichaꞌësarinquëmaꞌ. Co noyahuëꞌ nicatoma Yosë tëhuëtëramaꞌ, co natantochináchinhuëꞌ cancantatoma oshahuanamaꞌ. Inapopiramahuëꞌ, nichaꞌësarinquëmaꞌ. Ina piquëranso huachi noyasáchin nicatoma yaꞌhuapomaꞌ. Naporo huachi huaꞌnaton niꞌnansopita naniarin. Pënëntonaꞌpiroꞌsanta Yosë nohuanton anitotërinëmasoꞌ, nanipon. Naporo huachi Noya Noya nininsoꞌ, Yosë marëꞌ acoaponaꞌ.

Daniel 9:7

Quëmasoꞌ noya coisë pochin nicaton, noꞌtëquën anaꞌintërancoi. Ina marëꞌ quiyasoꞌ yaꞌipi cotioroꞌsacoi tapanai. Quirosarinquë yaꞌhuëpisopita, aꞌnapita israiroꞌsa yaꞌcaria yaꞌhuëpisoꞌ, áquë yaꞌhuëpisoꞌ, quëma nisha nisha noꞌparoꞌsaquë tëꞌyatërancoi. Yaꞌipicoi oshahuanai niꞌton, inapotërancoi.

Oseas 1:11

Naporo tahuëriꞌsa Cota huënton israiroꞌsasoꞌ, aꞌnapita israiroꞌsarë aꞌnaíchin huaꞌanëna yaꞌhuëtaponaꞌ. Naquëranchin yaꞌhuëpiquë chachin yaꞌhuëantaponaꞌ. Naporahuaton notohuaroꞌ naꞌamiataponaꞌ. Piyapinëhuëpita yaꞌhuëpiquë chachin acoantapo. Piyapi iminënquë sharoꞌsa shaꞌninso pochin nitapo. Quisiriro motopiana cari anoyataantahuato, ¡ina tahuëri paꞌpi noya nisarin!

Oseas 1:7

Cota huëntonso napoaponahuëꞌ, nosoroarahuë. Cari chachin inapitasoꞌ, nichaꞌësarahuë. Yosënënaco niꞌto, topinan nichaꞌësarahuë. Co ahuëtatona chaꞌësapihuëꞌ. Sahuëni, pëꞌchinan, cahuarioroꞌsaꞌ, sontaroꞌsa cahuarioquë paꞌpisopita, co inapita nohuantarahuëꞌ,” itaantarin.

Oseas 2:18

Naporo tahuëriꞌsa nanihuachin, israiroꞌsa catahuacaꞌhuaso marëꞌ tanan maꞌsharoꞌsarëꞌco anoyatarahuë. Inairaroꞌsaꞌ, yaꞌhuanoꞌsaꞌ, inapitarëꞌconta inapoarahuë. Ama piyapinëhuëpita maꞌsha onpotacaiso marëhuëꞌ napoarahuë. Pëꞌchinan, sahuëni, inapitanta co huachi niahuëcaiso marëꞌ Israiro noꞌpaquë ohuaraponahuëꞌ. Napohuachina piyapinëhuëpitasoꞌ, sano yaꞌhuëapona huachi,” itërin.

Romanos 3:22

Quisocristo imapatëhuaꞌ, Yosë noya niꞌsarinpoaꞌ. Insosona natëhuachin, anoyacancantarin. Co nisha nisha nontërinpoahuëꞌ.

1 Corintios 1:30

Yosë nohuanton, Quisocristo imarëhuaꞌ. Imapatëhuaꞌ, yaꞌcoancantërinpoaꞌ niꞌton, yonquínahuan pochin Yosë niꞌninpoaꞌ. Naporahuaton, catahuarinpoaꞌ noꞌtëquën yonquicasoꞌ. Oshanënpoaꞌ inquitohuachinpoaꞌ, noya huachi niꞌninpoaꞌ. Nasha cancan quëtërinpoaꞌ noya nicacaso marëꞌ. Quisocristo chachin nichaꞌërinpoaꞌ.

2 Corintios 5:21

Iráca Quisocristo co mantaꞌ oshahuanaponahuëꞌ, Yosë nohuanton, yaꞌhuërëtërinpoaꞌ. Oshahuan pochin nicaton, Yosëri chiníquën anaꞌintërin. Canpoa marëꞌ chiminin niꞌton, co huachi oshahuan pochin niꞌninpoahuëꞌ. Quisocristo imapatëhuaꞌ, Yosë nóya niꞌsarinpoaꞌ.

Filipenses 3:9

Quisocristoíchin imasarahuë huachi. Co caora noya nicato chaꞌërahuëꞌ. Co pënëntërinsoꞌ natëto, chaꞌërahuëꞌ. Quisocristoíchin anoyacancantërinco, taꞌto, ina imarahuë. Imapatora, oshanëhuë inquitatonco, anoyacancantërinco. Ina quëran Yosë catahuarinco noya nicaꞌhuasoꞌ. Ina marëꞌ noya niꞌninco.