Jeremías 23:16 - Chayahuita (Shahui)

¹⁶ Siniorosoꞌ yaꞌipi nanitapaton israiroꞌsanpoa pënëninpoaꞌ: “Ina pënëntonaꞌpiroꞌsa maꞌsona pënënpachinquëmaꞌ, ama natëtocosohuëꞌ. Inahuara yonquinëna quëran shaꞌhuitatënëma nonpintárinëmaꞌ. Co cari anitotërahuëso shaꞌhuitërinënquëmahuëꞌ.

Jeremías 23:16 ပူးပေါင်းရင်းမြစ်များ

1 Reyes 22:11

Aꞌnaso pënëntonaꞌpi, Quinaana huiꞌnin Sitiquiasë itopi. Inasoꞌ pënëntacaso marëꞌ huaꞌna quëran pomonoꞌsa ninin. Ina aꞌnorahuaton, chiníquën pënëntarin: “¡Naporin Sinioro: ‘Iso pomonoꞌsa quëran ohuanëso pochin nitaton, Siria sontaroꞌsa minsëaran! Tiquiaquë huarëꞌ inapotaran,’ tënin,” tosárin.

Jeremías 14:14

Napotohuatora Sinioro taantarin: “Co cari aꞌpapirahuëꞌ, naporápi. Nonpinatona naporápi. Co piꞌpian tëranta ina pochin camairahuëꞌ. Co nonchatërarahuëꞌ. Inahuara yonquinëna quëran ina pochin shaꞌhuitárinëmaꞌ.

Jeremías 23:21

Ina pënëntonaꞌpiroꞌsasoꞌ, co cari aꞌparahuëꞌ. Co piꞌpian tëranta nonchátërarahuëꞌ. Inahuaso napoaponahuëꞌ, mano manorahuatë paꞌnëso pochin ‘Sinioro nanan quëtërincoi niꞌton, nontarainquëmaꞌ,’ toconpi.

Jeremías 9:12

¿Inta yonquínahuan niꞌton, nanitërin onpoatonsona napopisoꞌ nitotacasoꞌ? ¿Inso pënëntonaꞌpita Yosëri anitotërin niꞌton, nanitërin onpoatonsona napopisoꞌ shaꞌhuitiinpoasoꞌ? Inotërosoꞌ, yaꞌshi yaꞌshin. Co insonta inaquëchin paꞌninhuëꞌ. ¿Onpoatonta iso noꞌpanënpoanta taꞌhuantaton, ina pochin ninin? tënahuë.

Jeremías 9:20

Sanapiꞌsanquëmanta Sinioro nontarinquëmaꞌ natancoꞌ. Noya natanco shaꞌhuitarinquëmaꞌ: “Huaꞌhuama sanapi yaꞌhuëtërinquëmasoꞌ, aꞌchintoco naꞌnëcaisoꞌ. Payaramasopitantaꞌ, aꞌchintoco sëtatona oshaacaisoꞌ.

Miqueas 2:11

Nonpi nanan shaꞌhuitonaꞌ: ‘Naꞌcon huino yaꞌhuëapon. Nisha nisha oꞌoi yaꞌhuëhuachin, oꞌotoma noꞌpirápomaꞌ,’ topisopita tëhuënchinsoꞌ, canpitaso paꞌyatëramaꞌ,” itërin.

Mateo 7:15

Ina quëran itaantarin: “Niꞌcona iyaroꞌsaꞌ nonpin nanan pënëntonaꞌpiroꞌsaꞌ nonpintochinënquëmaꞌ. ‘Quiyantaꞌ imarai,’ itopirinënquëmahuëꞌ, co cancanëna quëran imapihuëꞌ. Tanan niꞌniꞌ yamapintërinso pochin cancantatonaꞌ, yatapicancaninquëmaꞌ. Co noꞌtëquën aꞌchinpihuëꞌ.

Romanos 1:21

Yosë yaꞌhuërinsoꞌ nitotaponaraihuëꞌ, co ina chinotopihuëꞌ. Ina nohuanton, nani maꞌsha yaꞌhuëtopirinahuëꞌ, co ina marëꞌ “Yosparinquën Sinioro,” co itopihuëꞌ. Nisha nisha yonquiatonaꞌ, chihuërinso pochin nipi. Tashi pochin cancantopi.

1 Juan 4:1

Naꞌcon iyaroꞌsaꞌ nosororanquëmaꞌ niꞌton, pënënaranquëmaꞌ. Naꞌa nonpin nanan pënëntonaꞌpiroꞌsaꞌ nonpin nanan aꞌchinapi. “Yosë nanamën aꞌchinahuë,” topirinahuëꞌ, co noꞌtëquën aꞌchinpihuëꞌ. Napoaton aꞌchintohuachinënquëmaꞌ, ama aꞌnaroáchin natëtocosohuëꞌ. “Nonpin nanan nimara,” taꞌtomaꞌ, yonquicoꞌ. Yaꞌipi Yosë quiricanën quëran aꞌchintërinpoasoꞌ yonquiatomaꞌ, tantiacoꞌ. Co ina pochin aꞌchintohuachinënquëmahuëꞌ, ama natëcosohuëꞌ.