Jeremías 20:7 - Chayahuita (Shahui)

⁷ Sinioro, quëma piyapinën nicaꞌhuaso marëꞌ noyasha nontatonco përaranco. Napotohuatancora carinquënso natëranquën. Quëmasoꞌ chini chiníquën nanantëran niꞌton, canaranco. Quëma nanamën shaꞌhuirahuëso marëꞌ nani tahuëri tëhuarinaco.

Jeremías 20:7 ပူးပေါင်းရင်းမြစ်များ

2 Reyes 2:23

Ina piquëran Irisiosoꞌ, Pitiriꞌpaꞌ paꞌsarin. Inaso ninanoꞌ, panënquë yaꞌhuërin. Nanpëasoꞌ, naꞌa huaꞌhuaroꞌsari nacapirin. Nacapirahuatona tëhuarapi: “Chiniaton nanpëquë soquimoto,” itatona tëhuapi.

Isaías 8:11

Sinioro chiníquën nanantaton achinirinco. Inapotahuatonco ama aꞌnapita pochin cancantaꞌhuaso marëhuëꞌ, pënëninco:

Jeremías 15:10

Ina quëran caso paꞌpi sëtato, mamahuë yonquirahuë: “¡Maꞌhuántacha caso mama ninahuë paya! Quëma huaꞌhuanpirancohuëꞌ, naní quëran co natantonhuë pochin nohuitërinaco. Napoatona co quëꞌyarinacohuëꞌ. Co onporonta coriqui aꞌnanatonaco maꞌpachininacohuëꞌ. Co carintaꞌ, aꞌnapita coriqui aꞌnanchinahuëꞌ. Co inapopirahuëꞌ, yaꞌipiya quëran ama huachi noya yaꞌhuëcaꞌhuaso marëhuëꞌ, shaꞌhuitërinaco,” tënahuë.

Jeremías 15:18

¿Onpoatoncha parisitërahuësoꞌ co copi tëcahuëꞌ nicaya? Apirahuëso pochin nininsoꞌ, ¿onpoatoncha co noyatëcahuëꞌ? Co maꞌsha nonën tëranta natërinsohuë pochin niconin. Yamoromiatohuachinara huaꞌyantorayaquë iꞌsha quënanpitërapi. Ina pochin quëmanta catahuancoso marëꞌ ninapiranquënhuëꞌ, co catahuarancohuëꞌ,” itërahuë.

Jeremías 20:9

Amiato: “Ama huachi Sinioro yonquiꞌisohuëꞌ. Nanan quëtopirincohuë tërantaꞌ, ama huachi noinsohuëꞌ,” tënahuë. Taporahuëꞌ, quëma nanamën yaꞌcoancantërinco niꞌton, pën maꞌsha ahuiquitërinso pochin nitárinco. Nansëanaquë huarëꞌ piꞌcarincoso pochin natanahuë. “Chinitato nipachin ama noinsohuëꞌ,” taporahuëꞌ, ¡coꞌchi nanitërahuëꞌ cacotaꞌhuaso paya!

Jeremías 38:19

Napotohuatora: —Aꞌnaquën cotioroꞌsaꞌ, nani inapita paapatona anoyatopi. Inapita tëꞌhuatërahuë. Mapachinacosoꞌ, aparisitaponaco tënahuë, itërinco.

Ezequiel 3:14

Yosë ispiritonën otërahuatonco, ina quëran ocoirinco. Napotohuachincora, sëtërahuë, noꞌhuitërahuë, naporahuë. Sinioro chiníquën nanantaton quëpahuachincora naporahuë.

Miqueas 3:8

Caso nipirinhuëꞌ, noꞌtëquën Sinioro marëꞌ pënëntarahuë niꞌto, achinirinco. Catahuarinco noya nicaꞌhuasoꞌ. Chiníquën cancantato, israiroꞌsa pënënarahuë: “Canpitaso co Yosë natëtomarahuëꞌ, naꞌcon oshahuanamaꞌ,” itárahuë.

Lucas 16:14

Parisioroꞌsaꞌ coriquiráchin cancantopi. Napoaton Quisoso aꞌchininsoꞌ natanahuatonaꞌ, tëhuapi.

Lucas 23:11

Napohuachina, Irotisëri tëhuarin. Sontaronënpitarintaꞌ tëcaripi. Noyápiachin huaꞌan aꞌmorinso pochin aꞌmotahuaton, Piratoquë aꞌpaantarin.

Hechos 17:18

Inaquë nisha nisha yonquipisoꞌ aꞌchinaꞌpiroꞌsantaꞌ huëꞌpi. Aꞌnaquën ipicorioroꞌsaꞌ itopi. Aꞌnaquëontaꞌ istoicoroꞌsaꞌ itopi. Paono quënanahuatonaꞌ, ninontopi. —Iso quëmapi paꞌpi nonaꞌpi. ¿Maꞌtaꞌ tëcapon naporin? itopi aꞌnaquën. —Ahuën. Nisha yosëroꞌsaꞌ imacaiso marëꞌ aꞌchinamara, topi aꞌnaquën. “Quisoso chiminin. Ina quëran nanpiantarin,” tëninso marëꞌ napotopi.

Hechos 17:32

“Ananpitaantarin,” tëninso marëꞌ, “Tëhuënchachin taꞌmaꞌ ananpitëca,” taꞌtonaꞌ, tëhuapi aꞌnaquën. Aꞌnaquënso nipirinhuëꞌ co tëhuapihuëꞌ. —Aꞌna tahuëri aꞌchintaantacoi, itopi.

1 Corintios 9:6

Pirnapirëꞌco aꞌchintarainquëmaꞌ niꞌton, aꞌcamacoisoꞌ yaꞌhuëpirinhuëꞌ. Quiyaora sacatatoi, coshatërai. Maꞌshantaꞌ pahuantohuachincoira, quiyaora paꞌanai. Aꞌnapitasoꞌ topinan maꞌparinënquëmaꞌ.

Hebreos 11:36

Aꞌnaquëontaꞌ Yosë imapi niꞌton, tëhuapi, huihuipi, catinaquë tonpopi, tashinan pëiquë poꞌmopi, napotopi.