Jeremías 2:28 - Chayahuita (Shahui)

²⁸ Cota huënton israiroꞌsanquëmaꞌ: ¿Yosëroꞌsa chinotëramasopita poꞌ? ¿Nani ninanonëmaquë aꞌnara acorama pora? Inapita nipachin huëcatonaꞌ, maꞌsha onporama quëran nichaꞌëinquëmaꞌ.

Jeremías 2:28 ပူးပေါင်းရင်းမြစ်များ

Isaías 45:20

Naquëranchin Sinioro nontaantarinpoaꞌ: “Canpitaso taꞌhuantamaso nipirinhuëꞌ, chaꞌëramasopita huëcatoma niyontonco shaꞌhuichinquëmaꞌ. Naꞌa piyapi yaꞌhuërin co manta yonquipisohuëꞌ. Inapitasoꞌ nara quëran mamanshi nipiso pitënahuatona ichiconipi. Inapitasoꞌ co piꞌpian tëranta nichaꞌëcasoꞌ nanitopihuëꞌ. Napopirinahuëꞌ, ina chinotatona nontopi.

Isaías 46:2

Mamanshiroꞌsasoꞌ, nonpin yosëroꞌsaꞌ. Napoaton nanitopi nopanpitacaisoꞌ, noꞌpaquë anotacaisoꞌ, inapocaisoꞌ. Co inahuara tëranta nanitopihuëꞌ chaꞌëcaisoꞌ. Inimicoroꞌsari inahuanta quëpaponaꞌ.

Isaías 46:7

Ina quëran pitënahuatonaꞌ, acopiquë acocaiso marëꞌ quëpapi. Inapotohuachinara, inaquëranchin yaꞌhuëárin. Chiníquën nontopirinahuëꞌ, co aꞌpanitërinhuëꞌ. Parisitatona co napion ancantopirinahuëꞌ, co nanitërinhuë nichaꞌëcasoꞌ.

Jeremías 1:16

Piyapinëhuëpitasoꞌ, oshahuanápatona aꞌporinaco. Nisharoꞌsari moshapiso nonanahuatonaꞌ, inapita moshacaiso marëꞌ yonarin pochin nininsoꞌ, aꞌpëpi. Napopiso marëꞌ inapo anaꞌintarahuë.

Jeremías 37:19

Aꞌnaquën pënëntonaꞌpiroꞌsasoꞌ: “Noya yaꞌhuëapomaꞌ. Co Papironia copirno yaꞌhuëaramaso noꞌpaquë, ahuëtaponhuëꞌ,” itërinënquëmaꞌ. Inata nipachin ina pochin nininhuëꞌ.

Habacuc 2:18

Aꞌnaquën naꞌpi quëranhuë nipon, nara quëranhuë nipon patëtahuatonaꞌ, mamanshi tënipi. ¡Tënipirinahuëꞌ, inaso co maꞌmarë tëranta paꞌtërinhuëꞌ! Aꞌnaquëonta mamanshinën nontaton: ‘Quëmaso yosënëhuënquën,’ itërin. ¡Napotohuachina, nonpiánin inasoꞌ! Mamanshiroꞌsasoꞌ, co nonacaso tëranta nanitopihuëꞌ. Napoaton ina ninaꞌpiroꞌsasoꞌ, ¡co inapita natëcaiso yaꞌhuërinhuëꞌ!

Habacuc 2:19

Mamanshi nara quëranhuë nipon, naꞌpi quëranhuë nipon ninamasoꞌ nontatomaꞌ: ‘Nichaꞌëcoi quiyantaꞌ,’ itëramaꞌ. Napotopiramahuëꞌ, ¡inapitaso co manta aꞌpaniponquëmahuëꞌ! Oro quëran, prata quëran inaquëranpita pashitopirinahuëꞌ, co manta pacaritaponahuëꞌ. Naporamaso marëꞌ carinquëma anaꞌintaranquëma niꞌton, ¡maꞌhuantacha nisarama paya!

Deuteronomio 32:37

Naporoꞌ inaso nontatënquëmaꞌ: ‘ “Mamanshiroꞌsa paꞌpoyarinpoaꞌ,” ¿tënama pora? ¿Intohuata inahuaso paꞌpi huachi? ¡Inapita marëꞌ maꞌsha tëpatoma tomaquën aꞌcatë pochin nitëramaꞌ! ¡Huinonta quëshitoma oꞌshitërëso pochin nitëramaꞌ! Inapita nipachin paꞌpoyainquëmaꞌ. Pashítatona catahuainquëma huachi.