Jeremías 2:20 - Chayahuita (Shahui)

²⁰ Iráca quëran huarëꞌ noꞌhuitë pochin nitëramaco. Iráca quëran huarëꞌ co natëamacosoꞌ nohuantatomarahuëꞌ: ‘Co nohuantëraihuëꞌ natëtaꞌhuaisoꞌ,’ toconamaꞌ. Yaꞌipi panca panënoꞌsaquë, yaꞌipi panca taꞌan narasoquë, inaquëpita mamanshi moshatomaꞌ, monshihuantë sanapiꞌsa pochin ninamaꞌ.

Jeremías 2:20 ပူးပေါင်းရင်းမြစ်များ

1 Reyes 12:32

Nasha pita naꞌhuëcaiso marëntaꞌ, inaora yonquinën quëran ocoirin. Ina pitasoꞌ, pascoa yoqui quëran canchisë yoqui nisahuaton shonca aꞌnatërápo tahuëritahuasoꞌ, naꞌhuëpi. Cota huënton israiroꞌsa Quirosarinquë niyontonatona pita naꞌhuëpiso pochin ninin. Quiropoamo chachintaꞌ, toroaꞌhua nonanpisoꞌ moshacaso marëꞌ Pitiriquë yápaꞌmarin. Inaquë maꞌsharoꞌsa tëparahuaton nonanpisoꞌ mosharin. Naporahuaton ina moshaton yonarin pochin nininsoꞌ aꞌpërin. Inaora nohuanton artaroroꞌsa acorinquë sacatacaiso marëntaꞌ, corto huaꞌanoꞌsa acoraꞌpiarin.

Salmos 107:14

Tashinanquë tëꞌyatatë pochin nitopirinahuëꞌ, ina quëran ocoirin. Catinaroꞌsantaꞌ, oshitëraꞌpiaton nichaꞌërin.

Salmos 2:3

“¡Huëco canpoara nohuantërëhuasoꞌ niahuaꞌ! ¡Co ina natëcaso yaꞌhuërinhuëꞌ!” tosapi.

Éxodo 19:8

Ansianoꞌsaso paꞌsahuatonaꞌ, yaꞌipi israiroꞌsa Yosë naporinso shaꞌhuitopi. Ina natanahuatonaꞌ: —Noyapaꞌ. Maꞌsona Yosë camaitërinso nisarai, topi. Napohuachinara, Moisësë naquëranchin motopiquë paantarahuaton, napopisoꞌ Sinioro shaꞌhuitontarin.

Éxodo 24:3

Napotohuachina Moisësësoꞌ, paꞌsahuaton yaꞌipi Yosë camaitërinsoꞌ, israiroꞌsa shaꞌhuitoonin. Ina natanahuatonaꞌ: —Noyapaꞌ. Yaꞌipi Yosë camaitërinso nisarai, itopi.

Isaías 1:21

Naquëranchin Sinioro pënëninquëmasoꞌ natancoꞌ: “Iráca Quirosarinquë yaꞌhuëpisopita casáchin cancantërinaco. ¡Iporaso nipirinhuëꞌ, monshihuantë sanapi pochin cancantëramaꞌ! Iracasoꞌ, yaꞌipi inaquë yaꞌhuëpisopita noyasáchin nipi. Noꞌtëquënáchin yonquipi. Inapopirinahuëꞌ, iporasoꞌ, tëpatoroꞌsaráchin pochin yaꞌhuëramaꞌ.

Isaías 9:4

Piyapinënpita huaꞌanëntatona aparisitopirinahuëꞌ, quëmari nichaꞌëran. Inapotahuaton co huachi inimiconënpitari aparisitápaiso quëtëranhuëꞌ. Matianoꞌsa iráca ataꞌhuantëranso pochin inimiconënpita minsëran.

Jeremías 2:31

Canpitanta ipora yaꞌhuëramasopita, Sinioro shaꞌhuitërinpoasoꞌ noya natancoꞌ. Israiroꞌsanquëmaꞌ: Inotëroquësoꞌ, paꞌpi chiníquën piꞌi piꞌcatërin. ¡Co carimasoꞌ, inapochin aparisitëranquëmahuëꞌ! Noꞌpaꞌ nanin acopontaꞌ, huëhuëpiro tashinantërin. ¡Co carimaso ina pochin aꞌpayananquëmahuëꞌ! Canpitaso piyapinëhuëpitanquëma nipomarahuë napotëramaco: ‘Nani huachi quëmá quëran chaꞌërai. Co huachi onporo tërantaꞌ, tahuërëtarainquënhuëꞌ,’ itëramaco.

Oseas 1:2

Siniorori Osiasë yaꞌnan camaiapon: “Yaꞌipi israiroꞌsa aꞌporahuatonaco, soꞌina tëhuananpitopiso pochin nitërinaco. Napoaton quëmanta inapita aꞌchintaꞌhuaso marëꞌ, aꞌnara sanapi maquëꞌ. Ina masahuaton huiꞌnahuanquëꞌ. Inaso napoaponahuëꞌ, mananso piquëran tëhuananpitarinquën. Napoaton inaquë huiꞌnahuanansopitasoꞌ: ‘Monshihuantë sanapi huaꞌhuinpita,’ itaponaꞌ,” itërin.

Oseas 2:5

Sanapi nitapihuachina, co taparohuanhuëꞌ ninin: ‘Amiconëhuëpita nicapo paꞌsarahuë. Inapitasoꞌ, cosharoꞌ, oꞌoiꞌ, inapita quëtërinaco. Aꞌmocaꞌhuaso marëntaꞌ, huaita, rino piꞌshi, inapita quëtërinaco. Tomaꞌ, huino, inapitanta quëtërinaco,’ tënin. Inapochachin israiroꞌsanta mamanshiroꞌsa moshatonaꞌ, co taparohuanhuëꞌ, nipi.

Oseas 3:3

Nani paꞌanpatora: “Nani maantaranquën niꞌton, huaꞌqui pëiquë yaꞌhuaantapon. Ama huachi aꞌna quëmapirëꞌquën poꞌquësohuëꞌ. Huaꞌquimiachin co ca tëranta quëmaroꞌco nisarahuë,” itërahuë.

Oseas 4:13

Motopiroꞌsaꞌ, motopiaꞌhuaroꞌsaꞌ, inapita huiꞌnimotënꞌpaꞌ maꞌsha tëparahuatonaꞌ, mamanshinënapita moshapi. Yonarin pochin nininsontaꞌ, inapita marëꞌ inaquë aꞌpëpi. Panca taꞌan nopri nararoꞌsa tashinantërinsoanaquë, aramoroꞌsaꞌ, insinaroꞌsaꞌ, inapita nararoꞌsa tashinantërinsoanaquëntaꞌ, inapopi. Naporama niꞌton, huiꞌnama sanapiꞌsa nipisopitantaꞌ, mamanshi marëꞌ sacatopi. Huiꞌnamapita saꞌinantaꞌ, soꞌina tëhuananpitopi.

Deuteronomio 12:2

Inaquë yaꞌhuëpisopitasoꞌ, itohua itohua yaꞌhuëtopi mamanshinëna moshacaisoꞌ. Aꞌnaquën motopiroꞌsaquë, aꞌnaquënso nipirinhuëꞌ, motopiaꞌhuaroꞌsaquë, aꞌnapitaso panca taꞌan nararoꞌsanaquë, inaquëpita chinotopi. Nisha nisha piyapiroꞌsa inaquë yaꞌhuëpisoꞌ, nani minsëhuatamaꞌ, chinotopisopitantaꞌ, yaꞌipi ataꞌhuantamaso yaꞌhuërin.

Deuteronomio 26:17

Nani quëma ipora shaꞌhuiran: ‘Siniorosoꞌ Yosënëhuë niꞌton, ina imato pënëntërinsopita, camaitërinsopita, aꞌchininsopita, inapita natëarahuë,’ tënan. Napoaton noꞌtëquën natëquëꞌ.

Deuteronomio 4:20

Canpitasoꞌ, Sinioro Iquipito quëran ocoirahuatënquëma huaꞌanëntërinquëmaꞌ. Huaꞌnamia asoquicaso marëꞌ ornoquë aꞌpërahuatëꞌ, asoquirëꞌ. Inapochachin canpitanta Iquipitoquë parisitápiramahuëꞌ, ocoirinquëmaꞌ. Napoaton ina piyapinënpita ninama huachi.

Josué 1:16

Napotohuachina inapitasoꞌ, Cosoi itaponaꞌ: —Yaꞌipi camairancoisopita nisarai. Intohuaso pacaꞌhuaiso camaihuatancoi, inaquë paꞌsarai.

Josué 24:24

—Sinioroso Yosënënpoa niꞌton, inasáchin chinotarai. Naporahuaton ina camaitërinsoráchin nisarai, topi yaꞌipi israiroꞌsaꞌ.

Apocalipsis 17:1

Ina quëran aꞌna anquëni minëꞌ sëꞌquënaꞌpi nininsoꞌ huëcapairahuatonco, itërinco: “Huëquëꞌ paꞌa piyapiꞌsaꞌ anaꞌintacasoꞌ yaꞌhuërinsoꞌ aꞌnochinquën. Pasëquë aꞌna sanapi panca iiroꞌsaꞌ aipi huënsëárin. Inasoꞌ paꞌpi co noyahuëꞌ. Monshihuanaꞌpi pochin piyapiꞌsaꞌ anishacancantërin.

Jueces 2:11

Israiroꞌsasoꞌ, Yosë aꞌpoatona paꞌpi co noyahuëꞌ niantapi. Siniorori chachin niꞌsápirinhuëꞌ, mamanshi Paaro itopisoꞌ moshacaiso caniaritopi.

Jueces 2:13

Inapoatona israiroꞌsasoꞌ, Sinioro aꞌpopi. Mamanshi Paaro itopisoꞌ moshacaiso marëꞌ aꞌpopi. Asotariti mamanshi paya, itopisonta moshapi.

1 Samuel 12:10

Inapotohuachinara, Sinioro aꞌpopiso yonquiantapi: “Sinioro, aꞌpoatëinquën nisha nisha mamanshiroꞌsa mosharaiso marëꞌ oshahuanai. Paaro, Asotariti, inapita mamanshiroꞌsa nonanpiso moshapiraihuëꞌ, ina aꞌpoarai. Ina aꞌpoatoi, quëmasáchin chinotarainquën. Nosoroatoncoi inimiconëhuëipita quëran nichaꞌëcoi,” itopi.