Jeremías 2:18 - Chayahuita (Shahui)

¹⁸ Napoapomarahuë canpitasoꞌ: ‘Iquipitoquë paꞌsahuatoi, Niroiꞌ oꞌosarai. Asiriaquënta paꞌsahuatoi Iopiratisiiꞌ oꞌosarai. Inapoatoi chiníquën cancantërëso pochin inapita catahuainacoiso ninaarai,’ tënamaꞌ. Napopiramahuëꞌ, inapitaso co catahuaponquëmahuëꞌ.

Jeremías 2:18 ပူးပေါင်းရင်းမြစ်များ

Isaías 31:1

Iquipitoroꞌsari catahuacaiso marëꞌ paapapisopita, ¡maꞌhuántacha nisapi paya! “Cahuarioroꞌsaꞌ, naꞌa sontaroꞌsa toronanquë paꞌpisopita, notohuaroꞌ cahuarioquë paꞌpisopita sontaroꞌsaꞌ, inapita catahuaponacoi,” topisopitantaꞌ, ¡maꞌhuantacha nisapi paya! Co Siniorori catahuacaiso ninapihuëꞌ. Inasoꞌ noyasáchin ninin niꞌton, Israirori chinotërin. Napoaponahuëꞌ, co ina nontopihuëꞌ. Ina marëꞌ ¡maꞌhuantacha nisapi paya!

Isaías 7:20

Ina tahuëriꞌsa nanihuachin, Asiria copirno quëran Sinioro anaꞌintarinquëmaꞌ. Inasoꞌ, sontaronënpitarë chachin quëpainëmaso marëꞌ ihuimotoarinëmaꞌ. Shinonëmaꞌ, shinoratënëmaꞌ, inapitanta ihuitaponënquëmaꞌ.

Jeremías 2:36

¡Catahuainëmaso marëꞌ ama aꞌna aꞌna yonícosohuëꞌ! Iquipitoroꞌsanta yonípiramahuëꞌ, co manta catahuaponquëmahuëꞌ. Asiriaroꞌsa napotërinquëmaso pochachin inapitanta nitarinquëmaꞌ.

Jeremías 31:22

Huiꞌnama nimintatohuachin, patë patë́rantapon. Canpitanta israiroꞌsanquëma inaporapiramahuëꞌ, ¡copi toco huachi! Ca Sinioroco nasha nininsoꞌ isoroꞌpaquë acoarahuë. Naporahuësoꞌ natanpatamaꞌ, co natëtochináchinhuëꞌ cancantaramaꞌ,’ itërahuë,” tënin.

Oseas 5:13

Israiroꞌsa paꞌpi caniaꞌpi pochin acorahuësoꞌ niniꞌsapi. Cota huënton israiroꞌsantaꞌ, apipiso pochin nipisoꞌ, niniꞌsapi. Napohuachina inapitasoꞌ, Asiria copirnori catahuacaso marëꞌ pahuaponaꞌ. Inasoꞌ, chiníquën nanantopirinhuëꞌ, caniopiso pochin nipisoꞌ co anoyatarinhuëꞌ. Apipiso pochin nipisontaꞌ, co anoyatarinhuëꞌ.