Jeremías 2:11 - Chayahuita (Shahui)

¹¹ ¡Co inso nacionquë tërantaꞌ, yosënëna aꞌporahuatonaꞌ, aꞌna chinotaantapihuëꞌ! Inapitasoꞌ nonpin yosëroꞌsa imaponaraihuëꞌ, ¡co onporonta inapochinpihuëꞌ! Piyapinëhuëpitaso nipirinhuëꞌ, aꞌporinaco. Noya noya nipirahuëꞌ, mamanshiroꞌsa co manta catahuatopisopitahuëꞌ, imacaiso marëꞌ aꞌporinaco.

Jeremías 2:11 ပူးပေါင်းရင်းမြစ်များ

1 Reyes 11:33

Saromonsoꞌ aꞌporahuatonco, mamanshiroꞌsa moshapatërin. Siton mamanshi paya Asotariti itopisoꞌ mosharin. Quimosi itopisonta mosharin. Inasoꞌ, moaporoꞌsari mosharinsoꞌ. Mircon itopisonta mosharin. Inanta amonoꞌsari mosharin. Inapoaton co costarincosohuëꞌ ninin. Pënëntërahuësopita, anitotërahuësopita, inapita co inaso paꞌpinco pochin natërinhuëꞌ niꞌton, napotarahuë.

Salmos 115:4

Inpioroꞌsasoꞌ, oro quëran mamanshiroꞌsa nipi. Prata quëraonta nipi. Inaora imirina quëran nicatonaꞌ, moshapi.

Jeremías 18:13

Napopiso marëꞌ Sinioro tënin: “¿Inso nacionquë tëranta taꞌma ina pochin nonpiso natanama nicaya? Israiroꞌsasoꞌ, paꞌpi co noyahuëꞌ nipi.

Jeremías 2:8

Corto huaꞌanoꞌsa co yonirinacohuëꞌ. Piyapinëhuëpita aꞌchinaꞌpiroꞌsantaꞌ, co nohuitërinacohuëꞌ. Huaꞌanënapita co yanatërinacohuëꞌ. Pënëntonaꞌpiroꞌsanta Paaro marëꞌ pënëntonpi. Mamanshiroꞌsa co máquënhuë nipirinhuëꞌ, inapita imapi.

Miqueas 4:5

Nisha piyapiroꞌsasoꞌ, mamanshinëna natëpi. Canpoaso napoaponahuëꞌ: “Sinioroso Yosënënpoaꞌ,” taꞌtëhuaꞌ, inasáchin natëahuaꞌ.

Romanos 1:23

Yosësoꞌ noyasáchin ninin. Co onporontaꞌ chiminaponhuëꞌ. Inaso nipirinhuëꞌ, co ina yonquipihuëꞌ. Ina naniantatonaꞌ, mamanshi nipi moshacaiso marëꞌ. Mamanshi piyapi nonanpisoꞌ moshapi. Co piyapi yaꞌhuëmiatopirinhuëꞌ, ina yamoshapi. Nisha nisha maꞌsharoꞌsantaꞌ moshapi. Aꞌnaquën anpiantëhuanoꞌsaꞌ, aꞌnaquën noꞌpaquë niohuaratërinsopita, inapita moshapi.

1 Corintios 8:4

Nosha mamanshi chinotacaiso marëꞌ acopisoꞌ aꞌchinchinquëmaꞌ nitotocoꞌ. Co mamanshi nanpirinhuëꞌ. Co ina chinotacasoꞌ yaꞌhuërinhuëꞌ. Tata Yosëíchin chinotacasoꞌ yaꞌhuërin, tënëhuaꞌ.

Gálatas 4:8

Iráca co Yosë nohuitëramahuëꞌ. Nisha nisha maꞌsha, mamanshi, inapita tëꞌhuatatomaꞌ, mosharamaꞌ, co inapita yonquicasohuëꞌ nipirinhuëꞌ.

Deuteronomio 32:16

Yosëso mamanshiroꞌsa co quëꞌyapirinhuëꞌ, canpitaso inapita moshatomaꞌ, anoꞌhuitëramaꞌ. Inaporama niꞌton, aꞌpitatënquëma noꞌhuirinquëmaꞌ.

Deuteronomio 32:21

Mamanshi moshapi niꞌton, aꞌpitato noꞌhuitërahuë. Mamanshisoꞌ co máquënhuëꞌ nipirinhuëꞌ, chinotopi. Nisha piyapiꞌsa catahuarahuë niꞌton, canpitariso aꞌpitaramaꞌ. Inapitaso co yonquipirinacohuëꞌ, catahuarahuë. Ina marëꞌ canpitanta noꞌhuitaramaꞌ.

Deuteronomio 33:29

¡Mainacha canpoasoꞌ israiroꞌsanpoa ninëhua paya! Co inso nacion tërantaꞌ, canpoa pochin nininhuëꞌ. Sinioro chachin nichaꞌërinpoaꞌ. Ina chachin paꞌpoyarinpoaꞌ. Catahuarinpoaꞌ, napotërinpoaꞌ. Inimiconënpoapita, sahuëninënpoa quëran minsërëhuaꞌ. Ina pochachin Sinioronta catahuarinquëmaꞌ, inimicoroꞌsa minsëaramaꞌ. Inimiconëma ahuërapiramahuëꞌ, co nanitatonaraihuëꞌ moshaponëmaꞌ: ‘Ama huachi niahuëaꞌhuasohuëꞌ. Nohuantëramasoꞌ natancoi quëchinquëmaꞌ,’ itaponënquëmaꞌ. Inapotatoma atapanapoma huachi,” itërin Moisësë israiroꞌsa nontaton.

1 Pedro 1:18

Iráca shimashonënpoapita topinan quëran yaꞌhuëpi. Moshatopirinahuëꞌ, co Yosë nohuitopihuëꞌ. Inapita nonanatomaꞌ, canpitantaꞌ topinan quëran yaꞌhuëpiramahuëꞌ, Yosë ocoirinquëmaꞌ ina nohuitacamaso marëꞌ. Ocoiinquëmaso marëꞌ co coriqui pahuërëtërinhuëꞌ. Huiꞌnin chachin aꞌpaimarin. Coriqui, oro, inapita aꞌna tahuëri taꞌhuantarin.

1 Samuel 4:21

Napoaponahuëꞌ, coꞌhuara chiminyátëraponhuë huaꞌhuin nohuitaton: Icapoti, itërin. “Siniororëꞌquënpoa anoyatërëhuaso caposonën iporasoꞌ inimiconënpoapita osërëtërinënpoaꞌ. Napoaton co huachi inso tëranta tëꞌhuatiinpoaso yaꞌhuërinhuëꞌ, taꞌto, ina pochin huaꞌhuahuë nohuitarahuë,” tënin. Siniororëꞌ anoyatopiso caposonën osërëtopi. Soꞌin, shiin, inapitanta chiminpi niꞌton, naporin.