Jeremías 19:13 - Chayahuita (Shahui)

¹³ Quirosarinquë pëiroꞌsa yaꞌhuërinso aipi, yonarin pochin nininsoꞌ tayoraroꞌsa moshacaiso marëꞌ aꞌpëpi. Nisha nisha mamanshiroꞌsa marëntaꞌ, huino opopi. Copirnoroꞌsa huaꞌanëntopiso pëiroꞌsa aipinta inapopi niꞌton, amirotochináchin niꞌnahuë. Yaꞌipi inapita pëiroꞌsaꞌ, Tohuito amirotochináchin niꞌnahuëso pochachin niꞌsarahuë, tënin Sinioro,’ itaantaquëꞌ,” itërinco.

Jeremías 19:13 ပူးပေါင်းရင်းမြစ်များ

2 Reyes 23:10

Pini-inon motopianaquëntaꞌ, Moroco mamanshi moshacaiso marëꞌ artaro yaꞌhuërin. Inaquë aꞌnaquën huiꞌnina ahuiquitahuatonaꞌ, ina mamanshi moshapi. Inapopirinahuëꞌ, Cosiasëri camairin ina artaro tapicaisoꞌ. Ama insonta huachi, inaquë huiꞌnina aꞌpëcaiso marëhuëꞌ inapotopi.

2 Reyes 23:12

Manasisi copirno yaꞌhuëapon, mamanshiroꞌsa moshacaiso marëꞌ artaroroꞌsa anitërin. Sinioro chinotacaso pëi iꞌiratënquë, anitërin. Aꞌnapita copirnoroꞌsantaꞌ, ina pochachin anitopi. Acaso copirno patoananën aꞌcaontarinso aipi artaroroꞌsa anitopi. Inapita artaroroꞌsantaꞌ, Cosiasë copirnori aohuatërin. Inapita paꞌqui paꞌquitopi. Inapotahuatona noꞌmorainpitasoꞌ, Sitron iꞌshaꞌpaꞌ inquiitopi.

2 Reyes 23:14

Naꞌpiroꞌsaꞌ, nararoꞌsaꞌ, inapita moshacaiso marëꞌ acopisoꞌ, apaꞌquitëraꞌpiarin. Inapotahuaton atëꞌyatëraꞌpiarin. Inapita acopiquësoꞌ, piyapi nansëroꞌsa acotëraꞌpiapi.

Jeremías 19:12

Inapotapo mini isëquë yaꞌhuëpisopita. Tohuitoquë chimipiroꞌsa paꞌpitatona amëntatopiso pochin iso ninanonta nitarahuë. Ca Sinioroco shaꞌhuitaranquëmaꞌ.

Jeremías 7:18

Huaꞌhuaroꞌsa ihuë yontonpi. Paꞌpinasoꞌ aꞌpëtopi. Aꞌshinantaꞌ, arina taparoatonaꞌ, cashin panoꞌsa nipi. Ina aꞌnotatonaꞌ, ‘Piꞌiroꞌtë huaꞌan paya’ itopisoꞌ mamanshi moshapi. Aꞌnapita mamanshi marëntaꞌ, ina pochin nitatona moshapi. Ina marëꞌ caso anoꞌhuitërinaco.

Hechos 10:9

Tahuëririnquë yacamotëriahuasoꞌ, ninanoquë yaꞌcaritopi huachi. Naporoꞌ Pitro inapa paꞌcotëquë paꞌnin Yosë nontacaso marëꞌ.

Hechos 7:42

Napoaton Yosëri tananpitërin. Tananpitohuachina, maꞌsha inápaquë yaꞌhuërinsopita moshapi. Piꞌi, yoqui, tayora, inapita moshapi. Pënëntonaꞌpi iráca Yosë quiricanënquë ninshitaton, tapon: “Israiroꞌsaꞌ nontaton, Yosëri itërin: ‘Catapini shonca piꞌipi inotëro parti paasëmaꞌ maꞌsha tëpahuatamara, co chinotatomaco naporamahuëꞌ.

Deuteronomio 4:19

Piꞌiroꞌtënta nëꞌpëhuatamaꞌ, niꞌcona piꞌi, yoqui, tayoraroꞌsaꞌ, inapita quënanatoma moshachináchin cancantotamaꞌ. Inapitasoꞌ yaꞌipi piyapiꞌsa aꞌpintacaso marëꞌ acorin. Canpoaso nipirinhuëꞌ, Yosëíchin chinotacaso yaꞌhuërin.