Jeremías 18:15 - Chayahuita (Shahui)

¹⁵ Piyapinëhuëpitaso nipirinhuëꞌ, naniantërinaco. Nisha nisha mamanshiroꞌsa moshacaiso marëꞌ yonarin pochin nininsoꞌ aꞌpëpi. Iráca pënëntërahuësopita aꞌpopi niꞌton, chihuëatona nisha ira paꞌtopiso pochin nipi.

Jeremías 18:15 ပူးပေါင်းရင်းမြစ်များ

Nehemías 9:17

Quëmarisoꞌ naꞌcon catahuapiranhuëꞌ, co ina yayonquipihuëꞌ. Co natëtënënhuëꞌ Iquipitoquë chachin panantacaisoꞌ yonquiantapi. Ina marëꞌ huaꞌan yonípi. Iquipitoroꞌsari camaiantacaiso marëꞌ yatahuërëantapi. Napopirinahuë tërantaꞌ, co ataꞌhuantëranhuëꞌ. Noyápiachin cancantaton, aꞌnaroáchin yanosorotëran. Co aꞌnaroáchin noꞌhuitëranhuëꞌ. Piyapinënpita nosoromiatëran niꞌton, co aꞌporanhuëꞌ.

Isaías 41:29

¡Yaꞌipi mamanshiroꞌsasoꞌ co máquënhuëꞌ! Co manta nicacaisoꞌ nanitopihuëꞌ. Capanantë mamanshiroꞌsa niconpi,” itërin.

Jeremías 1:16

Piyapinëhuëpitasoꞌ, oshahuanápatona aꞌporinaco. Nisharoꞌsari moshapiso nonanahuatonaꞌ, inapita moshacaiso marëꞌ yonarin pochin nininsoꞌ, aꞌpëpi. Napopiso marëꞌ inapo anaꞌintarahuë.

Jeremías 18:14

Nipano motopi inápa natëtëroꞌsaquë ocai yaꞌhuërinsoꞌ, ¡co onporonta ayaponhuëꞌ! Inatohuaran tëꞌnaiꞌ iꞌsharoꞌsanta oꞌmarinsoꞌ, ¡co onporonta yaniponhuëꞌ!

Jeremías 19:5

Artaroroꞌsantaꞌ ninamaꞌ, Paaro moshatoma huiꞌnamapita yaꞌipi ahuiquitamaso marëꞌ. Inapocamasosoꞌ, co piꞌpian tëranta camaitërahuëꞌ. Co yonquiyatërarahuëꞌ.

Jeremías 2:13

Piyapinëhuëpitasoꞌ naꞌcon naꞌcon oshahuanpi. Caso inapita marëꞌ nanpirin iꞌsha huinan pochin nipirahuëꞌ, aꞌporinaco. Naporahuatona iꞌsha tapainanoꞌsa acopirinahuëꞌ, nopoatonpi niꞌton, co iꞌsha yaꞌhuëirinhuëꞌ. Ina pochin niconinsoꞌ imacaiso marëꞌ aꞌporinaco niꞌton, napopi.

Jeremías 2:19

Co noyahuëꞌ ninamasoꞌ naꞌintarinquëmaꞌ. Co casáchin cancantëramacohuë niꞌton, parisitamaso yaꞌhuërin. Napoaton: ‘Sinioroso Yosënënpoa niꞌton, noya nicatëhua natëcaso yaꞌhuërin. Napopirinhuëꞌ, co natërëhuahuëꞌ. Naporahuaton aꞌpomantarëhuaꞌ. Noꞌtëquën chachin iporasoꞌ, co huachi noya yaꞌhuërëhuahuëꞌ. Parisitatëhua co napion cancantárëhuaꞌ,’ toco yonquiatomaꞌ. Caso Sinioroco yaꞌipi nanitaparahuë. Carima shaꞌhuitaranquëmaꞌ.

Jeremías 2:32

Nanon soꞌyarinso tahuëri nitaparinsopita, ¡co onporonta naniantërinhuëꞌ! Piyapinëhuëpitaso napoaponahuëꞌ, ¡nani huaꞌqui naniantërinaco!

Jeremías 6:16

Naquëranchin Siniorori piyapinënpita itapon: “Paꞌnamaquë ira niosërarinsoꞌ quënanconpatamara, chiniconamaꞌ. Noya niꞌsahuatoma iracaya ira huayonamaꞌ. Canpitanta chihuërëso pochin cancantohuatamaꞌ, nontoco noꞌtën ira aꞌnotërëso pochin nichinquëmaꞌ. Inasáchin paꞌtohuatamaꞌ sano cancantaramaꞌ,” itërin. Canpitaso napoaponahuëꞌ: “Co nohuantëraihuëꞌ ina ira paꞌtaꞌhuaisoꞌ,” toconamaꞌ.

Jeremías 7:9

Niihuaramaꞌ, nitëparamaꞌ, nitëhuananpitëramaꞌ, Yoscoarëꞌ tapomarahuë nonpinamaꞌ. Paaro moshatoma yonarin pochin nininsoꞌ aꞌpëramaꞌ. Nisha nisha mamanshiroꞌsanta co nohuitapomarahuëꞌ, mosharamaꞌ.

Oseas 11:2

Israiroꞌsaso naꞌaro përápirahuëꞌ, naꞌcon naꞌcon aquënanpirinaco. Inapitasoꞌ piyapinëhuëpita nipirinahuëꞌ, mamanshi moshacaiso marëꞌ maꞌsha tëpapi. Yonarin pochin nininsonta aꞌpërahuatona moshapi.

Oseas 2:13

Mamanshiroꞌsa moshacaiso marëꞌ yonarin pochin nininsoꞌ huaꞌqui aꞌpëpi. Inapopiso marëꞌ anaꞌintarahuë. Naporo tahuëriꞌsa inapita moshacaiso marëꞌ nitapatonaꞌ, miyosáchin, poꞌmoitërasáchin niconpi. Inapoatonaꞌ, caso naniantërinaco. Ca Sinioroco shaꞌhuitaranquëmaꞌ.

Oseas 2:6

Ina sanapi pochin nipiso marëꞌ iranëna nahuanquë paꞌcopitarahuë. Naporahuaton pairaquë oncorapiatë pochin nitarahuë. Ama iranëna quënanacaiso marëhuëꞌ, napotarahuë.

Malaquías 2:8

Canpitaso corto huaꞌanoꞌsanquëma nipomarahuëꞌ, noya ninamaso aꞌporamaꞌ. Nonpi nanan aꞌchinatomaꞌ, naꞌa piyapiꞌsa apëshonamaꞌ. Inapoatoma Nihuiroꞌco anoyatërahuësoꞌ tapiramaꞌ.

Mateo 15:6

“Co quëtacasoꞌ yaꞌhuërinhuëꞌ,” toconamaꞌ. Ina pochin aꞌchinatomaꞌ, co Yosë quiricanën natëramahuëꞌ.

Romanos 14:21

Ama mantaꞌ aꞌnapita anishacancantacamasoꞌ yonquicosohuëꞌ. Caꞌnamaso marëꞌ, oꞌoramaso marëꞌ, ama inapita marëꞌ aꞌnapita anishacancantocosohuëꞌ. Iyaparin pochin nosoroatomaꞌ, catahuacoꞌ noya noya imacaiso marëꞌ.

Deuteronomio 32:21

Mamanshi moshapi niꞌton, aꞌpitato noꞌhuitërahuë. Mamanshisoꞌ co máquënhuëꞌ nipirinhuëꞌ, chinotopi. Nisha piyapiꞌsa catahuarahuë niꞌton, canpitariso aꞌpitaramaꞌ. Inapitaso co yonquipirinacohuëꞌ, catahuarahuë. Ina marëꞌ canpitanta noꞌhuitaramaꞌ.