Jeremías 18:11 - Chayahuita (Shahui)

¹¹ Naquëranchin Sinioro nontaantarinco: “Yaꞌipi Cota huënton israiroꞌsa shaꞌhuitëquëꞌ. Quirosarinquë yaꞌhuëpisopitanta shaꞌhuitëquëꞌ: ‘Ca Sinioroco anaꞌintaꞌhuanquëmaso yonquiarahuë. Napoaton co noyahuëꞌ ninamasopita aꞌporahuatomaꞌ, noya noya nicacamaso cancantocoꞌ,’ itëquëꞌ.

Jeremías 18:11 ပူးပေါင်းရင်းမြစ်များ

Génesis 11:7

Napoaton acopitacaso marëꞌ, paꞌmatëhua nonpiso anishatahuaꞌ. Ama huachi ninatanacaiso marëhuëꞌ, napotahuaꞌ,” tënin.

1 Reyes 22:23

Naporin niꞌton, nonpintarinënsoꞌ nani nitotëran. Sinioro tëpainquënsoꞌ yonquirin. Napoaton sopairi pënëntonaꞌpiroꞌsa camairansoꞌ, anonsarin, itërin.

2 Reyes 22:13

—Paatomaꞌ, onpopinsona niꞌnincosoꞌ, Sinioro natancoꞌ. Yaꞌipi iso ninanoquë yaꞌhuëpisopita, yaꞌipi Cota huëntonquë yaꞌhuëpisopita, inapitanta onpopinsona Yosëri niꞌninsoꞌ, natancoꞌ. Iso quirica quëran inaso pënënpirinpoahuëꞌ, co natërëhuahuëꞌ. Shimashonënpoapitantaꞌ, pënëntërinsoꞌ co natëpihuëꞌ. Napoaton ipora Siniorosoꞌ, paꞌpi noꞌhuitomara, itërin.

2 Reyes 5:5

Ina natanahuaton copirnosoꞌ: —Noyapaꞌ. Paquë inatohua nipachin. Cari ninshitahuato ina pochin Israiro copirno quirica aꞌpatarahuë, itërin. Napotohuachina, Namanoso inatohua pacacaso marëꞌ tapatarin. Cara shonca huaranca coriqui prata quëran nininsopita manin. Saota huaranca coriqui oro quëran nininsopitanta manin. Aꞌmocaisontaꞌ, shonca manin. Yaꞌipi inapitasoꞌ, anoyatohuachina quëtacaso marëꞌ quëpatapon.

Isaías 5:5

Noyapaꞌ. Naporin niꞌquëhuarëꞌ, oparonëhuë maꞌsona onpotaꞌhuasoꞌ yonquirahuësoꞌ, shaꞌhuitaranquëmaꞌ: Nahuan shatërahuëso oquitarahuë yaꞌcontatona tapiinaꞌ. Pairanënta oquitohuato, pëꞌtahuaroꞌsari yaꞌcontatonaꞌ, toꞌqui toꞌquichinaꞌ.

Jeremías 18:18

Aꞌna tahuëri piyapiꞌsa chinotatonaco: “Huëco paꞌahua Irimiasë tëpacaiso marëꞌ shaꞌhuirapiaꞌhuaꞌ. Ama manta naporinso natëahuasohuëꞌ. Corto huaꞌanoꞌsa Yosë nanamën aꞌchintiinpoasoꞌ, co pahuanaponhuëꞌ. Yonquinahuanoꞌsanta pënënainpoasoꞌ, yaꞌhuëapon. Pënëntonaꞌpiroꞌsanta Yosë naporinsoꞌ anitotiinpoasoꞌ, yaꞌhuëapon,” topi.

Jeremías 19:15

“Sinioroso yaꞌipi nanitaparin. Inasoꞌ, israiroꞌsanpoa huaꞌanëntatonpoa naporin: ‘Canpitasoꞌ, pënënanquëmasopita co natëtochináchinhuëꞌ cancantëramaꞌ. Napoaton iso ninanoquë yaꞌhuëramasopita, anaꞌintaranquëmaꞌ. Aꞌnapita ninanoquë yaꞌhuëpisopitantaꞌ, anaꞌintarahuë. Yaꞌipi maquëranpitasona anaꞌintaꞌhuanquëmasoꞌ, nani shaꞌhuitëranquëmaꞌ. Shaꞌhuitëranquëmaso chachin nitaranquëmaꞌ,’ tënin Sinioro,” itërahuë.

Jeremías 26:13

Noya noya nicacamasoꞌ cancantocoꞌ. Sinioroso Yosënënpoa niꞌton, ina natëcoꞌ. Inapohuatamaꞌ, maꞌsha onpotiinquëmasoꞌ shaꞌhuitopirinquëmahuëꞌ, co inapotarinquëmahuëꞌ.

Jeremías 26:3

Nani co noyahuëꞌ nipiso marëꞌ anaꞌintaꞌhuasoꞌ yonquirahuë. Napopirahuëꞌ, natëtënën co noyahuëꞌ nipiso aꞌpohuachinaꞌ, co huachi yonquirahuëso chachin nitapohuëꞌ.

Jeremías 36:3

Tapona Cota huënton israiroꞌsa huëhuëpiro yonquirapirahuëso nitotatonaꞌ, co noyahuëꞌ nipisoꞌ yaaꞌpoápirinahuëꞌ. Inapopi naporini, co noyahuëꞌ nicatona oshahuanpisoꞌ, inquichitohuëꞌ,” itërinco.

Jeremías 36:7

Siniorori inapita paꞌpi noꞌhuiton huëhuëpiro nitacasoꞌ yonquirin. Tapona ina natanatonaꞌ, co noyahuëꞌ nipisoꞌ yaaꞌpoápirinahuëꞌ. Inapoatona Sinioro nontopi naporini, inariso nichaꞌëitonhuëꞌ,” itërahuë.

Ezequiel 18:23

Co noyahuëꞌ nipisopita chiminacaisosoꞌ, co nohuantërahuëꞌ. Co noyahuëꞌ nipiso naniantatonaꞌ, noya niinaꞌ. Napohuachina tëhuënchachin nanpiponaꞌ. Ca Sinioroco shaꞌhuitaranquëmaꞌ.

Jonás 3:8

Yaꞌipiya quëran saꞌcatën nininso aꞌmoinaꞌ. Pëꞌtahuanëna quëran huarëꞌ, ina pochin aꞌmochinaꞌ. Co napion ancantërëhuasoꞌ, aꞌnocaso marëꞌ inapoaꞌahuaꞌ. Naporahuatëhua yaꞌipi cancanënpoa quëran Yosë nontahuaꞌ. Yaꞌipi co noyahuëꞌ ninëhuasopita, noꞌhuitërayanpoa nicatëhuaꞌ, co tënorotochináchinhuëꞌ cancantërëhuasopita, inapita yaꞌipi aꞌpoaꞌahuaꞌ.

Miqueas 2:3

Napoaton Sinioro napotërinquëmaꞌ: “Naporamaso marëꞌ carimantaꞌ, nani yonquirahuë maꞌsha onpotaꞌhuanquëmasoꞌ. Paꞌpi chiníquën maꞌsha onpoarama niꞌton, co chaꞌësaramahuëꞌ. Inapotohuatënquëmaꞌ, co huachi nocantamasoꞌ yonquiaramahuëꞌ. Paꞌpi co noyahuëꞌ tahuëriꞌsa nisarin niꞌton, napoaramaꞌ.

Hechos 26:20

Tamascoquë yaꞌhuëpisoꞌton shaꞌhuitërahuë. Ina quëran Quirosarinquëntaꞌ shaꞌhuiantarahuë. Yaꞌipi Cotia partintaꞌ inachachin shaꞌhuiantarahuë. Nisha piyapiꞌsantaꞌ aꞌchintërahuë. ‘Co noyahuëꞌ yonquiramasopita naniantatomaꞌ, Yosë chachin tahuërëtaantacoꞌ. Tëhuënchachin imapatamaꞌ, noya nisaramaꞌ,’ itërahuë.

Santiago 4:13

Natanco iyaroꞌsaꞌ. Aꞌnaquëmaꞌ co Yosë yonquiatomahuëꞌ, nisha nisha yonquiconamaꞌ. “Iporahuë nipon, tashirayahuë nipon, sacatapoi aꞌna ninanoquë paꞌsarai. Inaquë aꞌna piꞌipi pochin sacatohuatoi, naꞌcon canaarai,” topiramahuëꞌ.

Santiago 5:1

Maꞌhuanoꞌsantaꞌ co Yosë natëpisopitahuëꞌ pënëin. Aꞌna tahuëri canpitasoꞌ chiníquën parisitaramaꞌ. Ina yonquiatomaꞌ, sëtocoꞌ, naꞌnëcoꞌ.