Jeremías 14:10 - Chayahuita (Shahui)

¹⁰ Israiroꞌsa yonquiaton Sinioro tapon: “Canpitasoꞌ nisha nisha mamanshi mosharama niꞌton, co noyahuëꞌ niꞌnanquëmaꞌ. Napoaton oshanëma yonquiato anaꞌintaranquëmaꞌ,” tënin.

Jeremías 14:10 ပူးပေါင်းရင်းမြစ်များ

1 Reyes 17:18

Huaꞌhuin chiminpachina, inaso Iniasë itapon: —Quëmasoꞌ Yosë nohuanton pënëntëran. ¡Co carinquënsoꞌ, manta onpotëranquënhuëꞌ! Co Yosë natëtohuëꞌ oshahuanahuë. Napoaton ina ayonquiancoso marëꞌ huaꞌhuahuë tëpatëranco. ¡Inapotatonco anaꞌintëranco tënahuë! itërin.

Salmos 119:101

Nanamën natëcaꞌhuaso marëꞌ co noyahuëꞌ ninahuësopita aꞌporahuë.

Jeremías 2:36

¡Catahuainëmaso marëꞌ ama aꞌna aꞌna yonícosohuëꞌ! Iquipitoroꞌsanta yonípiramahuëꞌ, co manta catahuaponquëmahuëꞌ. Asiriaroꞌsa napotërinquëmaso pochachin inapitanta nitarinquëmaꞌ.

Jeremías 31:34

Co huachi insonta aꞌnapita aꞌchintaponhuëꞌ. Co iin nontaton: ‘Sinioro nohuitëquëꞌ,’ co itaponhuëꞌ. Yaꞌipiya quëran nohuitarinaco. Huaꞌhuishinoꞌsa quëran mashoroꞌsaquë huarëꞌ nohuitarinaco niꞌton, co huachi niaꞌchintaponahuëꞌ. Inapitasoꞌ co noyahuëꞌ nicatona oshahuanpirinahuëꞌ, oshanëna inquitato nanan anoyatarahuë. Ca Sinioroco shaꞌhuitaranquëmaꞌ,” tënin.

Jeremías 6:20

Israiroꞌsanquëmaꞌ, canpitaso Sapa noꞌpa quëran yonarin pochin nininsoꞌ quëshiramaco. Pimo nararoꞌsanta áquë noꞌparoꞌsa quëran quëshiramaco. Inapita quëshipiramacohuëꞌ: ¡Topinan quëran quëshiramaco! Chinotamacoso marëꞌ artaronëhuëquë maꞌsha tëparahuatoma aꞌnaquën yaꞌipi ahuiquitëramaꞌ. Aꞌnaquënsoꞌ, piꞌpiyan ahuiquitëramaꞌ. Inaporamasopita, ¡yaꞌipi co noyahuëꞌ niꞌnahuë!” tënin.

Oseas 11:7

Piyapinëhuëpitasoꞌ, co yatahuërëtërinacohuëꞌ: ‘Yosëso chini chiníquën nanantërin,’ taponaraihuëꞌ, co tëhuënchachin tëꞌhuatërinacohuëꞌ.

Oseas 11:9

Paꞌpi noꞌhuitopirahuë mini, ahuantarahuë. Inapoato co ataꞌhuantantaponquëmahuëꞌ. Caso Yosëco. Co piyapicohuëꞌ. Noyasáchin nicato canpita huáncana nisarahuë. Co ataꞌhuantaꞌhuanquëmaso marëhuëꞌ, oꞌmarahuë,” tënin.

Amós 3:2

“Isoroꞌpaquë nisha nisha nacionoꞌsa yaꞌhuëpirinhuëꞌ, canpitasáchin huayonanquëmaꞌ. Inapotopiranquëmahuëꞌ, co noyahuëꞌ ninama niꞌton, anaꞌintaꞌhuanquëmaso yaꞌhuërin.

Amós 5:22

Noya nicatomaco maꞌsha tëpatoma yaꞌipi ahuiquitopiramahuëꞌ, carisoꞌ co niꞌcaꞌhuaso tërantaꞌ, nohuantërahuëꞌ. Trico, sipata, inapitanta quëshihuatamacora co nohuantërahuëꞌ. Toroaꞌhuaroꞌsa amoshin nipisopita nanan anoyatërëhuaso marëꞌ tëparamasontaꞌ, co nohuantarahuëꞌ.

Hebreos 8:12

Naꞌcon nosoroato, yaꞌipi co noyahuëꞌ yonquipisopita inquitarahuë. Co huachi oshanënaꞌ yonquiarahuë,” tënin Yosë.

1 Samuel 15:2

Siniorosoꞌ yaꞌipi nanitaparin. Ina chachin iso pochin nanan aꞌpatërinquën: “Quëmá quëran amaricoroꞌsa anaꞌintaꞌhuasoꞌ yonquirahuë. Iráca Iquipito quëran israiroꞌsa pipihuachinara, inapitari ahuëimapi.