Jeremías 1:8 - Chayahuita (Shahui)

⁸ Ama insonta tëꞌhuatëquësohuëꞌ. Carinquën paꞌpoyaranquën. Caso Sinioroco niꞌto, noꞌtëquën shaꞌhuitaranquën,” itërinco.

Jeremías 1:8 ပူးပေါင်းရင်းမြစ်များ

Éxodo 3:12

—Coꞌta carinquën catahuaranquën. Caꞌtanaranquën niꞌton natëco. Catahuaranquënso nitotamaso marëꞌ, noꞌtëquën shaꞌhuitaranquën. Israiroꞌsa ocoirahuaton, iso motopiquë chachin chinotaramaco, itërin.

Isaías 43:2

Pëntoitamasoꞌ nipachin, carima aꞌpaiaranquëmaꞌ. Pancairoꞌsaquë tëranta pëntoitohuatamaꞌ, co paꞌitaramahuëꞌ. Pën tënëntarintaquëchin pëntonpatamaꞌ co huiquitaramahuëꞌ. Co pën tëranta ahuiquitarinquëmahuëꞌ.

Jeremías 1:17

Quëmasoꞌ, chiníquën cancantaton paꞌsaran. Carinquën shaꞌhuitëranquënsoꞌ shaꞌhuicoanan. Ama manta inapita tëꞌhuatëquësohuëꞌ. Tëꞌhuatohuatan inapita niꞌtonënaquë aropátaranquën.

Jeremías 1:19

Inapitaso ahuëapirinënhuëꞌ, co minsëarinënhuëꞌ. Carinquën caꞌtanatënquën aꞌpaiaranquën niꞌton, co minsëarinënhuëꞌ. Ca Sinioroco noꞌtëquën shaꞌhuitaranquën,” itërinco.

Jeremías 20:11

Quëmasoꞌ Sinioro napoaponahuëꞌ, catahuancoso marëꞌ yaꞌhuëaran. Ahuëtonaꞌpi co minsëchináchinhuë pochin ninan. Aparisitërinacosopitasoꞌ, anotërëso pochin nicaponaꞌ. Co minsëinacoso nanitapihuëꞌ. Napoatonaꞌ, taparo nisapi. Quëmari minsëransoꞌ, ama insonta nanianchinsohuëꞌ.

Daniel 3:25

—Napoaponahuëꞌ, caso catapini yaꞌpi pënquë co tonpopinanhuëꞌ, ¡noya paꞌsapi niꞌnahuë! Aꞌnaso nipirinhuëꞌ, Yosë anquëninën pochin niꞌnahuë, tënin.

Mateo 10:26

Ina quëran itantarin: “Piyapiꞌsaꞌ noꞌhuipirinënquëmahuëꞌ, ama iyaroꞌsaꞌ tëꞌhuatocosohuëꞌ. Iporasoꞌ maꞌsha noyá poꞌopinan pochin niꞌton, co insontaꞌ nitotërinhuëꞌ. Aꞌna tahuëriso nipirinhuëꞌ yaꞌipiya nitotapi.

Mateo 28:20

Ina quëran yaꞌipi shaꞌhuitëranquëmasoꞌ aꞌchintocoꞌ natëinaco. Insëquësona paꞌpatamaꞌ, carinquëmaꞌ caꞌtanaranquëmaꞌ. Nani tahuëri catahuaranquëmaꞌ. Ayaroꞌ tahuëri naniquë huarëꞌ caꞌtanaranquëmaꞌ. Co onporontaꞌ pataranquëmahuëꞌ, itërin Quisosori. Nani huachi.

Hechos 18:10

Carinquën catahuaranquën. Aꞌnaquën noꞌhuipirinënquëontaꞌ, noya aꞌpaiaranquën. Co insontaꞌ nanitapaponhuëꞌ maꞌsha onpotinquënsoꞌ. Naꞌa piyapiꞌsaꞌ isëquë yaimarinaco. Napoaton aꞌchintáquëꞌ,” itërin.

Hechos 26:17

Cotioroꞌsaꞌ yatëpahuachinënquën, nichaꞌësaranquën. Nisha piyapiꞌsaꞌ yaꞌhuëpiquë aꞌpaaranquën. Inapitantaꞌ yatëpahuachinënquën, nichaꞌësaranquën.

Hechos 4:13

Ina natanahuatonaꞌ, cotio huaꞌanoꞌsaꞌ ninontopi. “Isopitasoꞌ topinan piyapiꞌsaꞌ. Co maistroꞌsahuëꞌ. Co naꞌcon quirica nitotaponaraihuëꞌ, co tëꞌhuatërinënpoahuëꞌ. Maꞌpitacha nitotopi paya. Quisoso caꞌtanpi niꞌton, ina pochin cancantopi,” nitopi.

Hechos 4:29

Iporasoꞌ Sinioro, quiyantaꞌ noꞌhuirinacoisoꞌ, nitotëran. Quëmasáchin yanatërainquën niꞌton, catahuacoi chiníquën cancantatoi, quëma nanamën shaꞌhuii.

Efesios 6:20

Quisocristo chachin aꞌparinco aꞌchintaꞌhuaso marëꞌ. Ina marëꞌ tashinan pëiquë poꞌmorinaco. Poꞌmopirinacohuëꞌ, Yosë nontocoꞌ ama tëꞌhuaisohuëꞌ. Chiníquën cancantato, aꞌninquëchin aꞌchintaꞌhuasoꞌ yaꞌhuërin.

Deuteronomio 31:6

Ama tëꞌhuatoma nisha nisha cancantocosohuëꞌ. Inapitarëꞌquëma niahuëhuatamaꞌ, ama manta paꞌyancosohuëꞌ. Sinioronënpoasoꞌ Yosë niꞌton, catahuararinquëmaꞌ. Co onporonta patarinquëmahuëꞌ. Co naniantarinquëmahuëꞌ,” itërin Moisësëri.

Deuteronomio 31:8

Sinioro chachin quëchintaton noꞌtëquën quëpaarinquën. Co onporonta patarinquënhuëꞌ. Co naniantarinquënhuëꞌ. Napoaton ama manta tëꞌhuatëquësohuëꞌ,” itërin Moisësëri.

Josué 1:5

Nanpisënquën, co inso tëranta nanitarinhuëꞌ minsëinquënsoꞌ. Moisësë catahuarahuëso pochachin quëmanta catahuaranquën. Co naniantaranquënhuëꞌ. Co pataranquënhuëꞌ.

Josué 1:9

Carinquën camaiaranquën ama tëꞌhuatonhuëꞌ, chiníquën cancantacaso marëꞌ. Carinquën catahuaranquën. Insëquësona paꞌpatan caꞌtanaranquën. Napoaton ama paꞌyanquësohuëꞌ,” itërin Yosëri.