Isaías 8:17 - Chayahuita (Shahui)

¹⁷ Cacopo quëran pipipisopita, Siniorori co huachi yacatahuarinhuëꞌ. Cariso napoaporahuëꞌ, inasáchin ninarahuë: ‘Catahuarinco mini,’ tënahuë.

Isaías 8:17 ပူးပေါင်းရင်းမြစ်များ

Génesis 49:18

Ina quëran Cacoposoꞌ Yosë nontaton tapon: “¡Sinioro, quëmasoꞌ nichaꞌësaranco tënahuë!” itërin.

Copo naporinso' 14:14

Napoaponahuëꞌ piyapi chiminpachina, co huachi nanpiantaponhuëꞌ. Sontaroꞌsasoꞌ, sirhuitopi quëran pipicaisoꞌ ninapi. Nanpiantacaso yaꞌhuërin naporini, ina pochin cantaꞌ, nanpiantaꞌhuaso ninaitohuëꞌ.

Salmos 130:5

Yaꞌipi cancanëhuë quëran catahuaancoso ninaranquën. Nani shaꞌhuitëranco niꞌton, “co nonpintarancohuëꞌ,” tënahuë.

Salmos 27:14

Napoaton chiníquën cancantato: “¡Siniorosoꞌ onpopionta catahuararinco! Chiníquën cancantato inasáchin ninarahuë. ¡Tëhuënchachin Sinioro catahuarinco!” tënahuë.

Salmos 33:20

Quiyasoꞌ Sinioroíchin chinotërai. ¡Ina paꞌpoyatoncoi catahuarincoi!

Salmos 37:34

Quëmanta Sinioro natëton ina ninaquëꞌ. Inapohuatan Sinioro noya acoarinquën. Inari chachin iso noꞌpaꞌ huaꞌanëntacaso marëꞌ quëtarinquën. Inpioroꞌsa ataꞌhuantërinsoꞌ, quëmaora yaꞌpiran quëran chachin niꞌsaran.

Salmos 40:1

Maꞌsha onpohuatora, Sinioroíchin catahuaincoso ninarahuë. Naporahuë niꞌton, co napion ancantato nontërahuësoꞌ natanahuatonco, catahuarinco.

Isaías 1:15

Nontamacoso marëꞌ anquihuatamara, co manta yaniꞌnanquëmahuëꞌ. Naꞌaro nontopiramacohuëꞌ, co natanaranquëmahuëꞌ. Naꞌcon tëpatërama niꞌton, huënaiꞌ imirasáchin pochin niꞌnanquëmaꞌ.

Isaías 30:18

Inapotiimaso shaꞌhuitopirinquëmahuëꞌ, iporaso nosoroinquëmaso marëꞌ ninarinquëmaꞌ. Inasoꞌ, nosororinquëmasoꞌ paꞌpi yaaꞌnotërinquëmaꞌ. Siniorosoꞌ noyasáchin ninaꞌpi. Inaso Yosë niꞌton, inasáchin ninahuatëhuaꞌ, tëhuënchachin capa cancantarihuaꞌ.

Isaías 33:2

Quiyasoꞌ Sinioro quëmasáchin ninarainquën niꞌton, nosorocoi. Nani tashíramiachin catahuarancoi. Maꞌsha onporaiso tahuëriꞌsantaꞌ, nichaꞌëcoi.

Isaías 45:15

Sinioro quëmasoꞌ, co aꞌninquëchin yaꞌnoranhuëꞌ. Napoaponahuëꞌ, israiroꞌsacoi nichaꞌërancoi.

Isaías 50:10

(-)

Isaías 54:8

Aꞌnanaya noꞌhuitó tënahuëquë, naꞌpitatë pochin nitëranquëmaꞌ. Napoaporahuëꞌ, co huaꞌqui marëꞌ naporahuëꞌ. Nosoromiatatënquëmaꞌ, yonquiantaranquëmaꞌ,” tënin Sinioro nichaꞌërinquëmasoꞌ.

Isaías 64:4

Quëmasoꞌ, ninarinënquënsopita catahuacaso marëꞌ nani maꞌsha ninan. Ina pochin aꞌnanta nininsoꞌ, co onporonta natanchinpihuëꞌ. Co niꞌchinpihuëꞌ.

Isaías 64:6

Yaꞌipicoi quiyasoꞌ, amirotochináchin quëmapi pochin ninai. Yaꞌipi noya ninaisopitantaꞌ, amiro nëꞌmëtë pochin niconin. Naramë ahuiton shitatërinso pochin ninai. Paꞌpi co noyahuëꞌ ninaisoꞌ naꞌintërincoi niꞌton, ihuan maꞌsha quiquirinso pochin nitërincoi.

Isaías 64:7

Co incoi tëranta chinotërainquënhuëꞌ. Quëmasáchin cancantaꞌhuaisoꞌ, co nohuantëraihuëꞌ. Napoaton naꞌpitatë pochin nitërancoi. Co noyahuëꞌ ninai niꞌton, aꞌporancoi.

Miqueas 3:4

Naporamaso marëꞌ aꞌna tahuëri maꞌsha onpoatoma nontaramaco. Nontopiramacohuëꞌ, co aꞌpaniaranquëmahuëꞌ. Paꞌpi co noyahuëꞌ ninamaso marëꞌ naꞌpitatë pochin nitaranquëmaꞌ,” itërin.

Habacuc 2:3

Shaꞌhuitaranquënsopitasoꞌ, co apiramiachin naniarinhuëꞌ. Napoaponahuë onpopionta nanipon. Huaꞌquiarin pochin nipirinhuëntaꞌ, ninaquëꞌ. Tahuërinën nanihuachin, nanipon.

Lucas 2:38

Naporoꞌ inantaꞌ huëcaton, Quisosoaꞌhuaya niꞌnin. Noya cancantaton, Yosë nontërin. —Iso huaꞌhuasha nasitërinso marëꞌ: “Yosparinquën Sinioro,” itëranquën, tënin. Ina quëran Yosë imapisopita shaꞌhuitërin. —Yosë nohuanton, aꞌpaimarinsoꞌ nani nasitërin. Inasoꞌ nichaꞌësarinpoaꞌ, itërin. Naꞌa Quirosarinquë yaꞌhuëpisopita ina ninarapi niꞌton, napotërin.

Lucas 24:27

Ina quëran Yosë quiricanënquë ninotona ninshitopisoꞌ, aꞌchintarin. Moisësëꞌton ninoton, Yosë quiricanënquë ninshitërin. Ina piquëran naꞌa pënëntonaꞌpiroꞌsaꞌ ninoantapi. Yaꞌipi Cristo ninopisoꞌ noꞌtëquën aꞌchintarin.

Deuteronomio 32:20

Napoaton naporin: ‘Tëhuënchachin co noyahuëꞌ nipi. Huiꞌnahuëpita pochin niꞌpirahuëꞌ, co huachi natërahuëꞌ. Napoaton aꞌporahuato co huachi catahuapohuëꞌ. ¿Onpoꞌina taꞌma paꞌ? tënahuë.

1 Tesalonicenses 1:10

Ina chinotatoi, huiꞌnin chachin ninarai. Canpoa marëꞌ Quisocristo chiminin. Ina quëran Yosëri ananpitaantarin. Aꞌna tahuëri inápa quëran oꞌmantahuachin, nichaꞌësarinpoaꞌ. Co imapisopitasohuëꞌ nipirinhuëꞌ, Tata Yosëri noꞌhuiton anaꞌintarin huachi, tënamaꞌ,” topi, natantërai.

2 Tesalonicenses 3:5

Yosë catahuainquëmaꞌ ina nosororinpoasoꞌ naꞌcon yonquicamaso marëꞌ. Parisitopiramahuëꞌ, achinicancainquëmaꞌ Quisocristo pochin ahuantacamaso marëꞌ.

Hebreos 2:13

Inantaꞌ piyapi niꞌton, itaantarin: “Cantaꞌ Tata Yosë natërahuë. Co naniantarincohuëꞌ, tënahuë,” tënin. Ina quëran itaantarin: “Yosë nohuanton, aꞌnaquën piyapiꞌsaꞌ imasarinaco. Inapitantaꞌ Yosë huiꞌninpita pochin niꞌnahuë,” tënin.

Hebreos 9:28

Quisocristontaꞌ aꞌnaroíchin chiminin oshanënpoaꞌ inquitinpoaso marëꞌ. Ina quëran inápaquë panantarin. Nani oshanënpoaꞌ inquitohuachinpoaꞌ, aꞌna tahuëri oꞌmantararin. “¡Ma noyacha Quisocristosoꞌ niꞌton, nichaꞌërinpoa paya!” taꞌtëhuaꞌ, ina ninarëhuaꞌ. Oꞌmantahuachin, imarëhuasopita maquimarinpoa huachi.