Isaías 8:15 - Chayahuita (Shahui)

¹⁵ Naꞌcon israiroꞌsa iꞌpatona anotopiso pochin nicaponaꞌ. Inapoatona chiminaponaꞌ. Pëcotanquë maꞌsha mapachinara co huachi pipirinsohuë pochin nisapi,” itërinco.

Isaías 8:15 ပူးပေါင်းရင်းမြစ်များ

Isaías 28:13

Napoaton huaꞌhuaroꞌsa quirica aꞌchintohuachinara nontopiso pochin Sinioro nontarinquëmaꞌ. Naporarama quëran aquë aquëtë pochin nisaramaꞌ. Noya paꞌsarama quëran ninantërarahuatona anotopiso pochin nisaramaꞌ. Iꞌparahuatoma anotapomaꞌ. Inapoatoma chiminapomaꞌ. Huënsonquë inaira mapiso pochin nitohuachinquëmaꞌ, co pipiaramahuëꞌ.

Isaías 28:16

Napoaton Sinioro naporin: “Niꞌquëꞌ. Sionquë aꞌnara naꞌpi acoarahuë. Noyá huayonpinan nisahuaton, paꞌpi paꞌton. Inari pëi achiniarin. Ina, pëi simintonën pochin nisarin. Insosona natëhuachinco, co tëꞌhuarëꞌna yaꞌhuëaponhuëꞌ.

Jeremías 6:21

Napoaton Siniorosoꞌ inapita yonquiaton taantapon: “Isopitasoꞌ, piyapinëhuëpita nipirinahuëꞌ, ca nohuanton iꞌparahuatona anotopiso pochin nicaponaꞌ. Mashoroꞌsa huiꞌninpitarë chachin, niyaꞌyoranpisopita amiconënarë chachin, yaꞌipi inapita chiminaponaꞌ,” tënin.

Mateo 11:6

Insosona yaꞌipi cancanëna quëran natëmiatohuachinaco, nóya cancantapi, itërin Quisosori.

Mateo 21:44

Ina naꞌpi iꞌpatohuatëra, anotatëꞌ yaꞌpanëꞌ. Aꞌna tahuëriso nipirinhuëꞌ ina naꞌpiri chachin anoantohuachin, aꞌnaquën niꞌshariarin,] itërin Quisosori.

Juan 6:66

Naporo quëran huarëꞌ naꞌamiáchin co huachi imapihuëꞌ. Aꞌpopi huachi.

Romanos 9:32

¿Onpoatontaꞌ co noya niꞌninhuëꞌ? “Pënëntërinsoꞌ nanan noꞌtëquën natëhuatëhuaꞌ, nóya cancantarëhuaꞌ,” topirinahuëꞌ, co nanitopihuëꞌ. “Yosëíchin nanitërin anoyacancantinpoasoꞌ,” taꞌcaiso nipirinhuëꞌ, co Quisocristo nohuantopihuëꞌ. Inapoatonaꞌ, pancaraꞌpi iꞌpatërëso pochin niꞌpi. Ina marëꞌ Yosëri co noyahuëꞌ niꞌnin.

1 Corintios 1:23

Quiyaso nipirinhuëꞌ Quisocristo nanamënáchin aꞌchinai: “Corosëquë canpoa marëꞌ chiminin,” tënai. Cotioroꞌsasoꞌ co natëtopihuëꞌ: “Inasoꞌ Yosë huiꞌnin naporini, co chimiintonhuëꞌ,” toconpi. Nisha piyapiroꞌsarintaꞌ co nohuantatonaraihuëꞌ, tëhuapi.