Isaías 61:3 - Chayahuita (Shahui)

³ Quirosarinquë yaꞌhuëpisopita canapi niꞌton sëtápirinahuëꞌ, inahua yaꞌhuërëꞌ canatohuachinaꞌ, yancotë yancopiso pochin acoarahuë. Naꞌnërápirinahuëꞌ, noya acancantaantarahuë. Co napion ancantápirinahuëꞌ, catahuarahuë niꞌton, Sinioro chinotatona cantaponaꞌ. Nisha nisha piyapiꞌsari: ‘Ma noyacha Siniorosoꞌ nanitapaton, piyapinënpita shacatë pochin nitërin. Noyanpinanyanchin nopri nararoꞌsa pochin acorin,’ taꞌcaiso marëꞌ ina pochin catahuapo.

Isaías 61:3 ပူးပေါင်းရင်းမြစ်များ

Salmos 104:15

Oꞌotona noya ancantacaiso marëꞌ huinonta yaꞌhuëtopi. Yaꞌpirina tapacaiso marëꞌ tomanta yaꞌhuëtopi. Capatona chinicaiso marëꞌ paonta yaꞌhuëtopi.

Salmos 23:5

Inimicoroꞌsa noꞌhuipirinacohuëꞌ, quëmasoꞌ noya nicatonco, noya cosharo acotëranco. Pimo huaꞌsaiquë pashimototëranco. Minëquë taꞌpanápatëra chaꞌhuërinso pochin yaꞌsoaquë huarëꞌ catahuaranco.

Eclesiastés 9:8

Huiritonáchin aꞌmoquëꞌ. Noya huaꞌsaiquë nipashimototáquëꞌ.

Isaías 44:23

Piꞌiroꞌtëꞌ, quëmanta piyapi pochin nicaton cantaquëꞌ. Sinioro naporinso yonquiaton cantaquëꞌ. Capa cancantaton, inapoquëꞌ. Noꞌpaꞌ acoporonta piyapi pochin nicaton, “yai, yai,” charaꞌin. Motopiroꞌsaꞌ, tananoꞌsaꞌ, yaꞌipi nararoꞌsaꞌ, canpitanta capa cancantocoꞌ. Nichaꞌësahuatonpoaꞌ, Sinioro chiníquën nanantërinsoꞌ aꞌnotërinpoaꞌ.

Isaías 52:1

Naquëranchin Sinioro taantarin: “Quirosarinquë yaꞌhuëramasopita, capayatërëso pochin cancantocoꞌ. Naporahuatoma chiníquën cancantocoꞌ. Ninanonëmasoꞌ, Yosë ninanonën. Noya noya nininsoꞌ aꞌmorëso pochin nitapacoꞌ. Inpioroꞌsasoꞌ, co huachi yaꞌcontarinquëmahuëꞌ.

Isaías 61:10

¡Sinioro yonquiato, capa cancantërahuë! Inasoꞌ Yosënëhuë niꞌton, acapacancaninco. Nichaꞌërinco niꞌton, naporahuë. Noꞌtëquën yonquinaꞌpi pochin acorinco. Saꞌanaꞌpi yancotë ayancotopiso pochin ninahuë. Nanonta soꞌyacaso marëꞌ nisha nishaquë nitaparinso pochin ninahuë.

Jeremías 31:13

Nanoꞌsa capa cancantatona nansaponaꞌ. Huiꞌnapiꞌsaꞌ, mashoroꞌsaꞌ, inapitanta inapoapi. Cari chachin achinicancanarahuë niꞌton, napoaponaꞌ. Co huachi naꞌnëtonaraihuëꞌ, capa cancantaponaꞌ. Naꞌcon parisitopirinahuëꞌ, naꞌcon naꞌcon capa cancantaponaꞌ.

Ezequiel 34:29

Noꞌpanënaquë shaꞌtohuachinaꞌ, noya noyatapon. Co huachi tarëtapihuëꞌ. Co inso nacionquë yaꞌhuëpisopitari tërantaꞌ, piyapinëhuëpita yonquiatona tëhuaponahuëꞌ.

Mateo 15:13

—Ama ina marëꞌ paꞌyancosohuëꞌ. Oshaquëran Yosëri anaꞌintarin. Niꞌcoꞌ. Maꞌsha shaꞌpatëra, co pacatëroꞌ paꞌararëhuëꞌ. Ocoirahuatëꞌ tëꞌyatërëꞌ. Inapochachin co nanamën imapisopitahuëꞌ Yosëri aꞌpoarin. Inapitasoꞌ somaraya pochin cancantopi. Somarayasoꞌ co nanitërinhuëꞌ aꞌna somaraya noya quëpacasoꞌ. Quëparin naporini, cato chachin panca naninquë anochitonahuëꞌ, itërin Quisosori.

Mateo 5:16

Inapochachin canpitantaꞌ aꞌpininso pochin nicatomaꞌ, noyasáchin nicoꞌ. Aꞌnapita nicatënënquëmaꞌ: ‘Ma noya Tata Yosëri catahuarin niꞌton, noya nisapi,’ tosapi,” tënin.

Lucas 15:22

Napotopirinhuëꞌ, paꞌpinisoꞌ naꞌcon nosororin. Piyapinënpita camairin. ‘Manóton paatomaꞌ, noyápiachin nininsoꞌ maconahuatomaꞌ, aꞌmotocoꞌ. Poꞌmoitërantaꞌ noyápiachin nininsoꞌ poꞌmotocoꞌ. Sapatëntaꞌ matonquëꞌ poꞌmoin.

Juan 15:8

Opa naꞌcon nitërinso pochin canpitantaꞌ noya noya nicoꞌ. Ina quëran aꞌnapitantaꞌ nicatënënquëmaꞌ, Yosë yonquiaponaꞌ. Naporahuatomaꞌ, noya noya imasaramaco.

Juan 16:20

Noꞌtëquën itëranquëmaꞌ. Sëtatomaꞌ, naꞌnëaramaꞌ. Co natërinacosopitasohuëꞌ nipirinhuëꞌ: “Nani chiminin huachi,” taꞌtonaꞌ, capa cancantapi. Canpitaso nipirinhuëꞌ sëtapiramahuëꞌ, co huaꞌquiꞌ sëtaramahuëꞌ. Aꞌnaroáchin noya cancantantaramaꞌ.

1 Corintios 3:9

Quiyasoꞌ Yosë aꞌparincoi ina marëꞌ sacataꞌhuaisoꞌ. Canpitaso nipirinhuëꞌ Yosë shaꞌtërinso pochin ninamaꞌ. Naporahuaton, Quisocristo imaramaꞌ niꞌton, Yosë pëinën pochin ninamaꞌ.

1 Corintios 6:20

Quisocristo chiníquën parisitaton, chiminin nichaꞌëinpoaso marëꞌ. Nichaꞌërinpoaꞌ niꞌton, yaꞌipi nonënpoa quëran huarëꞌ huaꞌanëntinpoasoꞌ yaꞌhuërin. Napoaton noyasáchin nicoꞌ aꞌnapitantaꞌ nicatënënquëmaꞌ Yosë chinochinaꞌ.

Filipenses 1:11

Quisocristo catahuahuachinquëmaꞌ, noyasáchin nisaramaꞌ. Ina quëran aꞌnapitantaꞌ nicatënquëmaꞌ, Yosë yonquiapi. “Ma noya Yosëri catahuarin niꞌton, noya nipi. Ma noyacha Yosëso paya,” tosapi.

2 Tesalonicenses 1:10

Oꞌmantahuachin, imarëhuasopitasoꞌ quënanarihuaꞌ. “Ma noyacha Quisocristoso paya. Anoyacancantërinpoaꞌ. Inasáchin yaꞌipiya chinochinaꞌ,” tosarëhuaꞌ. Yaꞌipi imarëhuasopita napoarëhuaꞌ. Aꞌchintohuatëinquëmara, canpitantaꞌ natëramaꞌ niꞌton, noya niꞌsaramaꞌ.

Hebreos 1:9

Noyasáchin yonquiaran. Co piꞌpisha tërantaꞌ oshahuanamasoꞌ yonquiaranhuëꞌ. Napoaton noya niꞌnanquën. Noya noya acoranquën niꞌton, yaꞌipi nipayaransopita quëran noya noya cancantaran,” itërin Yosëri. Quiricanënquë ninshitopi.

1 Pedro 2:9

Imarëhuasopitaso nipirinhuëꞌ nohuantërinpoaꞌ. Huayoninpoaꞌ ina nohuitacaso marëꞌ. Inasáchin huaꞌanëntërinpoaꞌ. Nani acorinpoaꞌ corto huaꞌanoꞌsa pochin nicatëhuaꞌ, ina marëꞌ sacatacasoꞌ. Noyápiachin cancan quëtërinpoaꞌ. Yosë piyapinënpoaꞌ ninëhuaꞌ. Iráca tashi pochin cancantopirëhuahuëꞌ, Yosë nichaꞌërinpoaꞌ tahuëri pochin cancantacaso marëꞌ. Acorinpoaꞌ Yosë noya nosororinpoasoꞌ shaꞌhuicaso marëꞌ.

1 Pedro 4:14

Imaramaso marëꞌ pinopachinënquëmaꞌ, Yosë noya niꞌsarinquëmaꞌ. Ispirito Santo yaꞌcoancantatënquëmaꞌ achinicancanarinquëmaꞌ niꞌton, noya cancantocoꞌ.