Isaías 61:2 - Chayahuita (Shahui)

² Ipora tahuëriꞌsa Yosë nosoroatënquëma nichaꞌësarinquëmasoꞌ, shaꞌhuitaranquëmaꞌ. Inimiconëmapitantaꞌ, Yosëri iꞌhuërëtacasoꞌ shaꞌhuitaranquëmaꞌ. Yaꞌipi sëtopisopita achinicancanaꞌhuaso marëꞌ aꞌparinco.

Isaías 61:2 ပူးပေါင်းရင်းမြစ်များ

Isaías 1:24

Napoaton ca Sinioroco yaꞌipi nanitapato naporahuë: ‘Caso yaꞌipi nanitaparahuë. Co insonta Israiro nacionquë ca pochin yaꞌhuërinhuëꞌ. ¡Copi toco huachi! Inimicotërinacosopitasoꞌ, noꞌtëquën anaꞌintarahuë. ¡Iꞌhuërëtaꞌhuaso yaꞌhuërin!

Isaías 35:4

Tëꞌhuanaꞌpiroꞌsanta shaꞌhuitatomaꞌ: “¡Chiníquën cancantocoꞌ! ¡Ama paꞌyancosohuëꞌ! Sinioro oꞌmararin nichaꞌëinquëmaso marëꞌ. Inimiconëmapitasoꞌ, noꞌtëquën iꞌhuërëtarin,” itocoꞌ.

Isaías 40:1

Sinioro naporin: “Piyapinëhuëpita noya nontatomaꞌ, achinicancancoꞌ.

Isaías 49:8

Siniorori chachin napotaantarin: “Nohuantasënquën chachin catahuaranquën. Nontohuatanco natanaranquën. Yanichaꞌëranquën niꞌton, catahuaranquën chaꞌëcaso marëꞌ. Quëmá quëran israiroꞌsarëꞌco anoyataꞌhuaso marëꞌ carinquën paꞌpoyararanquën. Inapohuato, yaꞌhuëpiso noꞌpaꞌ noya noya acoantarahuë. Inimiconënapitari noꞌpanëna tapitopirinahuëꞌ, piyapinëhuëpitari chachin huaꞌanëntaantaponaꞌ.

Isaías 58:5

Canpitaso ayonahuatamara sëtërëso pochin yaꞌnoramaꞌ. Shiꞌshinamatë pochin monshoáporamaꞌ. Saꞌcatën aꞌmosahuatomaꞌ, huariano aipi quëhuënamaꞌ. “Ina pochin nicaꞌhuaisoꞌ Sinioro nohuantërin,” topiramahuëꞌ, ¡co ina caso nohuantërahuëꞌ! “Inapoatë ayonacaso yaꞌhuërin. Napohuatëhuaꞌ, Yosë noya niꞌsarinpoaꞌ,” tënamaꞌ.

Isaías 60:10

Nisharoꞌsari Quirosarin pairanën anoyataantaponaꞌ. Copirnonënapitantaꞌ, canpita marëꞌ sacataponaꞌ. Sinioro noꞌhuitënquëma anaꞌintopirinquëmahuëꞌ, naporoso paꞌpi nosoroarinquëma huachi.

Jeremías 31:13

Nanoꞌsa capa cancantatona nansaponaꞌ. Huiꞌnapiꞌsaꞌ, mashoroꞌsaꞌ, inapitanta inapoapi. Cari chachin achinicancanarahuë niꞌton, napoaponaꞌ. Co huachi naꞌnëtonaraihuëꞌ, capa cancantaponaꞌ. Naꞌcon parisitopirinahuëꞌ, naꞌcon naꞌcon capa cancantaponaꞌ.

Miqueas 3:8

Caso nipirinhuëꞌ, noꞌtëquën Sinioro marëꞌ pënëntarahuë niꞌto, achinirinco. Catahuarinco noya nicaꞌhuasoꞌ. Chiníquën cancantato, israiroꞌsa pënënarahuë: “Canpitaso co Yosë natëtomarahuëꞌ, naꞌcon oshahuanamaꞌ,” itárahuë.

Mateo 5:4

Sëtohuatamaꞌ, Yosë achinicancanarinquëmaꞌ. Oshanëmaꞌ yonquiatomaꞌ, cancanëma quëran huarëꞌ sëtohuatamaꞌ, Yosë noya niꞌsarinquëmaꞌ. Catahuarinquëmaꞌ noya cancantacamaso marëꞌ.

Lucas 4:19

Ipora tahuëriꞌsaꞌ Yosë nosoroatënquëmaꞌ, nichaꞌësarinquëma huachi, tënahuë. Ina shaꞌhuicaꞌhuaso marëꞌ acorinco,” tënin Isaiasë, itërin quirica nontaton.

Lucas 6:21

Iporasoꞌ tanapomarahuëꞌ, Yosëꞌpaꞌ co onporontaꞌ tanararamahuëꞌ. Sano cancantaramaꞌ. Isoroꞌpaquë naꞌnëpiramahuëꞌ, inapaquësoꞌ capa cancantaramaꞌ.

2 Corintios 6:2

Iráca quiricanën quëran Yosë naporin: “Ipora chachin yacatahuaranquëmaꞌ. Nontohuatamaco, natanaranquëmaꞌ. Yanichaꞌëranquëmaꞌ niꞌton, catahuaranquëmaꞌ chaꞌëcamaso marëꞌ,” tënin. Ipora tahuëri chachin yacatahuarinpoaꞌ. Nontohuatëhuaꞌ, anoyacancantarinpoaꞌ, tënahuë.

1 Tesalonicenses 2:16

Nisha piyapiꞌsaꞌ chaꞌëcaiso marëꞌ yaaꞌchintopiraihuëꞌ, cotioroꞌsasoꞌ co nohuantopihuëꞌ. “Ama aꞌchintocosohuëꞌ,” taꞌtonaꞌ, noꞌhuirinacoi. Ina marëꞌ aquë aquëtëꞌ oshahuanpi. Napoaton Yosëri chiníquën noꞌhuirin. Noꞌtëquën anaꞌintarin huachi.