Isaías 61:1 - Chayahuita (Shahui)

¹ Sinioro piyapinën naporin: “Sinioro ispiritonën yaꞌcoancantërinco niꞌton, noya catahuarinco. Ina chachin acorinco popriyaroꞌsa noya nanan shaꞌhuitaꞌhuaso marëꞌ. Aparisitopisopita catahuacaꞌhuaso marëꞌ acorinco. Yaꞌhuëpi quëran quëparahuatona huaꞌanëntapirinahuëꞌ, yaꞌhuëpiquë chachin paantacaiso shaꞌhuitarahuë. Tashinan pëiquë pochin yaꞌhuëapisopitantaꞌ, ina quëran pipicaisoꞌ shaꞌhuitarahuë.

Isaías 61:1 ပူးပေါင်းရင်းမြစ်များ

Salmos 2:6

“Quirosarin ninanosoꞌ, cari huayonahuë. Inaquë huaꞌanëntacaso marëꞌ ¡nani copirno acorahuë!” itërin.

Salmos 22:26

Aꞌnaquëmantaꞌ, aꞌnapita aparisitápirinënquëmahuëꞌ, noyá natëaquë huarëꞌ coshatoco huachi. Sinioro yoniramasopita huaꞌqui tahuëri nicatomaꞌ, ina chinotocoꞌ.

Salmos 34:18

Oshanëna marëꞌ co napion sëtohuachinara, yaꞌcarísha Siniorori huaniparin. Oshanëna yonquiatona naꞌnëhuachinara, Siniorori nichaꞌësarin.

Salmos 51:17

Oshanëhuëi marëꞌ paꞌpi sëtatoi, co napion cancantohuatoira tëhuënchinsoꞌ, noya niꞌsarancoi.

Salmos 69:32

Ina nicatona parisitopisopita capa cancantapi. Chinotërinënquënsopita chiníquën cancantapi.

Isaías 30:19

(-)

Isaías 32:7

Apiroꞌsasoꞌ, monatacaiso marëꞌ maꞌpitaso nipi. Paꞌpi co noyahuëꞌ nicacaisoꞌ yonquirápi. Popriroꞌsa nonpintatona ihuapi. Noꞌtëquën catahuacaiso marëꞌ natantopirinahuëntaꞌ, co catahuapihuëꞌ.

Isaías 40:9

Quirosarinquë yaꞌhuëramasopita noya nanan shaꞌhuicoꞌ. Motopi naniontarinquë nanpërahuatoma chiníquën shaꞌhuiontacoꞌ. Ama tëꞌhuatatomahuëꞌ yaꞌipi Cota huënton israiroꞌsa shaꞌhuitocoꞌ: “¡Maꞌtana Sinioro chinotërëhuasoꞌ!

Isaías 42:1

Sinioro naporin: “Natanco shaꞌhuichinquëmaꞌ. Piyapinëhuë nohuitocoꞌ. Cari chachin ina achiniapo. Huayonahuëso niꞌton, nóya niꞌnahuë. Ispiritonëhuë nani ayaꞌcoancantërahuë. Noya coisë pochin nicaton, yaꞌipi nacionoꞌsa noꞌtëquën shaꞌhuitapon.

Isaías 42:7

Somarayaroꞌsa anoyarayataran. Sopairi minsëaton huaꞌanëntërinsopita, paꞌpi tashinan pëiquë pochin ichiyaꞌhuërin. Inapitanta ocoiatë pochin nitacaso marëꞌ acoranquën,” itërin.

Isaías 49:9

Minsërahuatona quëpapisopita, quëmari shaꞌhuitapon: ‘Ipora quëran huarëꞌ noya paco huachi,’ itaran. Tashinanquë pochin yaꞌhuëpisopitantaꞌ: ‘¡Yaꞌnoco huachi!’ itaran. Inapotohuatan, nani ira pirayan pastoroꞌsa quënanaponaꞌ. Tomaroꞌtë motopiroꞌsaquëntaꞌ, pëꞌtahuanëna cosharo yaꞌhuëtapon.

Isaías 52:7

¡Ma noyacha niꞌton, motopiaꞌhuaroꞌsataquëchin noya nanan shaꞌhuitaponpoa canquiarin paya! Sinioro nichaꞌërinpoa niꞌton, sano yaꞌhuëarihua huachi. Quirosarinquë yaꞌhuëpisopita itapon: “Yosë chinotëramasoꞌ, copirno yaꞌconin huachi,” tosarin.

Isaías 52:9

Quirosarin ninanoquë yaꞌhuëantaramasopita, capa cancantatoma cantaco huachi. Sinioro ayontoantarinquëma niꞌton, inapocoꞌ. Nichaꞌërinquëma niꞌton, inapocoꞌ.

Isaías 66:2

Ca chachin yaꞌipi maꞌsha ninahuë. ¡Acohuatora, caniaritopi yaꞌhuëcaisoꞌ!” tënin. Ina quëran taantarin: “Napoaporahuëꞌ, caso Sinioroco shaꞌhuitaranquëmaꞌ. Insosona catahuacaꞌhuaso nohuantohuachin, nanamëhuë tëꞌhuataton natëpon. Oshahuaninso marëꞌ co napion cancantapon. Naporahuaton: ‘Caora co nanitërahuë noya nicaꞌhuasoꞌ,’ tëcapon. Naporinsopitaráchin, noya nicato catahuaarahuë,” tënin.

Daniel 9:24

Quirosarin ninanoꞌ, israiroꞌsaꞌ, inapita Yosëri anaꞌintërinsoꞌ, canchisë shonca simana pahuanarin nanicasoꞌ. Ina nápo simana nanihuachin, nichaꞌësarinquëmaꞌ. Co noyahuëꞌ nicatoma Yosë tëhuëtëramaꞌ, co natantochináchinhuëꞌ cancantatoma oshahuanamaꞌ. Inapopiramahuëꞌ, nichaꞌësarinquëmaꞌ. Ina piquëranso huachi noyasáchin nicatoma yaꞌhuapomaꞌ. Naporo huachi huaꞌnaton niꞌnansopita naniarin. Pënëntonaꞌpiroꞌsanta Yosë nohuanton anitotërinëmasoꞌ, nanipon. Naporo huachi Noya Noya nininsoꞌ, Yosë marëꞌ acoaponaꞌ.

Oseas 6:1

Canpitaso israiroꞌsanquëma naporamaꞌ: “Huëco yaꞌipinpoa Sinioro chachin chinotaantaꞌahuaꞌ. Chiníquën anaꞌintopirinpoahuëꞌ, nontohuatëhua anoyataantarinpoaꞌ. Apisáchin pochin acopirinpoahuëꞌ, inachachin nonëantarinpoaꞌ. Noya chinotohuatëhuaꞌ, aꞌnaroáchin anoyatarinpoaꞌ. Ananpitaantarinpoaso pochin catahuararinpoa niꞌton, noya niꞌsarinpoaꞌ. Chiníquën cancantatëhua Sinioro nohuitahuaꞌ. Inapohuatëhuaꞌ, Siniorosoꞌ huëcapaiantarinpoaꞌ. Nani tahuëri piꞌi pipirinso pochin, oꞌnápiquë noꞌpaꞌ caniororinso pochin huëcapaiantarinpoaꞌ,” tënamaꞌ.

Miqueas 3:8

Caso nipirinhuëꞌ, noꞌtëquën Sinioro marëꞌ pënëntarahuë niꞌto, achinirinco. Catahuarinco noya nicaꞌhuasoꞌ. Chiníquën cancantato, israiroꞌsa pënënarahuë: “Canpitaso co Yosë natëtomarahuëꞌ, naꞌcon oshahuanamaꞌ,” itárahuë.

Mateo 3:16

Ina quëran nonshiaso chachin aꞌnaroáchin inápaquë piꞌiroꞌtëꞌ niꞌsoatërin, niꞌnin. Ispirito Santo nëpë pochin nohuaraimarahuaton, Quisoso yaꞌcoancantomiatërin.

Lucas 7:22

—Niꞌcoꞌ iyaroꞌsaꞌ. Ca nohuanto, somaraya nininsopita niꞌtopi. Apiaroꞌsantaꞌ aꞌnaroáchin anoyatërahuë. Noya iratopi. Chana caniori maninsopitantaꞌ anoyatërahuë. Nëꞌhuëroꞌsantaꞌ nëꞌhuëpisoꞌ inquitërahuë. Chiminpisopita ananpitaantarahuë. Notohuaroꞌ piyapiꞌsaꞌ co Yosë nohuitatonaraihuëꞌ nosorotápirinahuëꞌ, noya nanan aꞌchintarahuë. Yaꞌipi nani niꞌnamaꞌ, nani natanamaꞌ. Paatomaꞌ, Coansha shaꞌhuitoncoꞌ noꞌtëquën nitochin.

Juan 1:41

Shiarahuaton, iin quënanconin. —Iya Simon, Cristo nani quënanai, Yosëri aꞌpaimarinsoꞌ, itërin.

Juan 3:34

Quisososoꞌ Yosë nanamën chachin nonin. Ispirito Santori noyá yaꞌcoancantërin niꞌton, noꞌtëquënáchin nonin.

Hechos 10:38

Ina piquëran Yosëri chachin Quisocristo acorin, Nasaritoquë yaꞌhuërinsoꞌ. Yosë nohuanton, Ispirito Santori noyá yaꞌcoancantërin. Napoaton nani maꞌsha nanitaparin nicacasoꞌ. Nisha nisha parti paaton, nóya ninin. Naꞌa caniaꞌpiroꞌsaꞌ aꞌnaroáchin anoyatërin. Aꞌnaquën sopairi yaꞌcoancantërin niꞌton, chiníquën parisitopirinahuëꞌ, inari anoyatërin. Yosëri catahuarin niꞌton, aꞌnaroáchin anoyatërin.

Hechos 26:18

Nisha piyapiꞌsantaꞌ aꞌchintëquëꞌ nanamëhuë nitochinaꞌ. Somaraya pochin cancantatonaꞌ, co nohuitërinacohuëꞌ. Nanamëhuë aꞌchintohuatan, nohuitarinaco. Iporasoꞌ tashi pochin cancantopi. Nohuitohuachinaco, tahuëri pochin cancantapi. Iporasoꞌ sopai huaꞌani camaihuachina, natëpi. Aꞌna tahuërisoꞌ Yosë natërapi. Natëtonaco, imapachinaco, oshanënaꞌ Yosëri inquitarin. Yaꞌipi natërinacosopita nasha cancan quëtarahuë. Yosë piyapinënpita chachin nisapi,’ itërinco.

Hechos 4:27

Iso ninanoquë chachin Sinioro, piyapiꞌsaꞌ yonquipi huiꞌnan tëpacaiso marëꞌ. Inasoꞌ nóya nipirinhuëꞌ, tëpapi. Quëmari acoranso nipirinhuëꞌ, co quëꞌyapihuëꞌ. Irotisë, Ponsio Pirato, nisha piyapiroꞌsaꞌ, israiroꞌsaꞌ, inapitari Quisoso noꞌhuipi.

2 Corintios 3:17

“Sinioro” topatëhuaꞌ, Ispirito Santo tapon naporëhuaꞌ. Ina catahuahuachinpoaꞌ, co huachi iráca pënëntërinsoꞌ imacasoꞌ yaꞌhuërinhuëꞌ. Ispirito Santo nichaꞌërinpoaꞌ noꞌtëquën yonquicaso marëꞌ.

2 Corintios 7:6

Sëtohuatëhuaꞌ, Yosë achinicancaninpoaꞌ niꞌton, quiyantaꞌ achinicancanincoi. Ina nohuanton, Tito huëꞌnin.

Hebreos 1:9

Noyasáchin yonquiaran. Co piꞌpisha tërantaꞌ oshahuanamasoꞌ yonquiaranhuëꞌ. Napoaton noya niꞌnanquën. Noya noya acoranquën niꞌton, yaꞌipi nipayaransopita quëran noya noya cancantaran,” itërin Yosëri. Quiricanënquë ninshitopi.