Isaías 60:7 - Chayahuita (Shahui)

⁷ Quitaroquë yaꞌhuëpisopita, pëꞌtahua huëntonoꞌsa quëshiarinënquëmaꞌ. Nipayoquë yaꞌhuëpisopitantaꞌ, carniro huëntonoꞌsa quëshiarinënquëmaꞌ. Yaꞌipi inapita pëꞌtahua huëntonoꞌsa Sinioro artaronënquë ina marëꞌ aꞌnotaramaꞌ. Inapohuatamaꞌ, inaso noya noya niꞌsarinquëmaꞌ. Inapita quëran Siniorosoꞌ, noyápiachin pëinën, noya noya acoapon.

Isaías 60:7 ပူးပေါင်းရင်းမြစ်များ

Génesis 25:13

Paninantërinsoꞌ Nipayo itërin. Ina piquëran niantapisopitasoꞌ: Sitaro, Atipiri, Mipisan, Misma, Toma, Masa, Atar, Tima, Quitoro, Nahui, Sitima inapita.

Copo naporinso' 42:8

Noꞌhuiranquëmasoꞌ sanocaꞌhuaso marëꞌ, isopocoꞌ: Canchisë toro, nápo chachin carnironta quëpatomaꞌ, Copo niꞌconcoꞌ. Inari canpita marëꞌ inapita tëparahuaton yaꞌipi ahuiquitapon. Inapotahuaton canpita marëꞌ nontarinco. Nontohuachinco, noya natanahuato co maꞌsha onpotaranquëmahuëꞌ. Co noꞌtëquën yonquirapitomacohuëꞌ Copo shaꞌhuitëramaso marëꞌ, naꞌinamaꞌ. Napopiramahuëꞌ, co maꞌsha onpotaranquëmahuëꞌ. Coposoꞌ, noꞌtëquën yonquiarapitonco shaꞌhuirin,” itërin.

Isaías 42:11

Ninanoroꞌsa inotëroquë yaꞌhuërinsopita, ina chinotatona capa cancanchinaꞌ. Quitaro huënton piyapiroꞌsantaꞌ, nëꞌmëtë pëinënaquë capa cancanchinaꞌ. Sira ninanoquë yaꞌhuëpisopitantaꞌ, capa cancantatona cantainaꞌ. Motopiroꞌsa huiꞌnimotëna quëran huarëꞌ chiníquën cantainaꞌ.

Isaías 60:13

Quirosarinquë yaꞌhuëramasopita Sinioro napotërinquëmaꞌ: “Nipano noꞌpa quëran paꞌton nininsopita quëshiarinëmaꞌ. Pino, apito, siprisë, inapita nararoꞌsa quësapi. Chinotërinacoso pëiꞌ, noya noya tapacaiso marëꞌ quësapi. Huaꞌanëntërahuëso pëiꞌ, noya noya acocaiso marëꞌ napoaponaꞌ.

Miqueas 4:1

Ayaro tahuëri yaꞌcaritohuachin, Sinioro chinotërëhuaso pëi yaꞌhuërinquë motopiaꞌhua, aꞌnapita motopiroꞌsa quëran noya noya Siniorori acoapon. Naporahuaton aꞌnapita motopiroꞌsa quëran ina inápa acoapon. Yaꞌipi isoroꞌpaquë yaꞌhuëpisopita inaquë huëcaponaꞌ.

Romanos 12:1

Yosë naꞌcon nosororinpoaꞌ niꞌton, yaꞌipi cancanëma quëran, iyaroꞌsaꞌ, ina imacoꞌ. Iráca Yosë chinotohuachinara, maꞌsha tëpapi. Canpitaso nipirinhuëꞌ Yosë marëꞌ nanpitomaꞌ, nohuantërinsoráchin nicoꞌ. Ina yonquiatomaꞌ, nani tahuëri noyasáchin nicoꞌ. Ina Yosë nohuantërin. Inapohuatamaꞌ, Yosë noya chinotaramaꞌ.

Romanos 15:16

Quisocristo chachin aꞌparinco nisha nisha piyapiꞌsaꞌ aꞌchintaꞌhuaso marëꞌ. Nanamën aꞌchintarahuë inapitantaꞌ imacaiso marëꞌ. Aꞌchinato, Yosë marëꞌ sacatarahuë. Nisha piyapiꞌsantaꞌ imapachinaꞌ, Ispirito Santori yaꞌcoancantarin. Noyápiachin cancan quëtarin. Ina marëꞌ Yosëri noya niꞌsarin.

Hebreos 13:10

Quisocristo corosëquë chiminaton, oshanënpoaꞌ inquitërinpoaꞌ. Iráca pënëntërinso imapisopitaso nipirinhuëꞌ, co ina natëpihuëꞌ niꞌton, co oshanënaꞌ inquitërinhuëꞌ. Iráca corto huaꞌanoꞌsaꞌ piyapiꞌsaꞌ oshanëna marëꞌ maꞌsha tëpapi. Tëpahuachinara, corto huaꞌan chini chiníquën nanantërinsoari maꞌsha tëpapisoꞌ huënainën manin. Masahuaton, Yosë yaꞌnorinsoꞌ patoanaquë quëparin oshanëna marëꞌ. Noshinënso nipirinhuëꞌ co caꞌpihuëꞌ. Ninanoꞌ intonquë quëpapi ahuiquitacaiso marëꞌ.