Isaías 60:18 - Chayahuita (Shahui)

¹⁸ Nisha nisha maꞌsha nionpotopisoꞌ, co huachi yaꞌhuëramaquë natantaramahuëꞌ. Noꞌhuitatona ataꞌhuantopisoꞌ, tapitopisoꞌ, inapitanta co huachi natantaramahuëꞌ. Ninanonëma pairanënpitaquë: ‘Yosë nichaꞌërinpoaꞌ,’ taꞌcasoꞌ ninshitaramaꞌ. Yaꞌcoananënpitaquëntaꞌ, ‘Sinioro chinotahuaꞌ,’ taꞌcasoꞌ ninshitaramaꞌ.

Isaías 60:18 ပူးပေါင်းရင်းမြစ်များ

2 Samuel 7:10

Naporahuaton, canpita yaꞌhuëcamaso marëꞌ noꞌpaꞌ taparahuë. Inaquë yaꞌhuëcamaso marëꞌ acoranquëmaꞌ. Isëquësoꞌ, co insonta apiponquëmahuëꞌ. Co noyahuëꞌ nipisopita co aparisitaponquëmahuëꞌ. Shimashonëmapitasoꞌ iso Canaan noꞌpaquë yaꞌnan yaꞌhuëaponaꞌ, aparisitopi. Canpitaso ipora co huachi inapotarinënquëmahuëꞌ.

Isaías 11:9

Yaꞌipi huaꞌanëntërinquë noyasáchin nicaponaꞌ. Co insonta aꞌnapita maꞌsha onpotaponhuëꞌ. Marë iꞌshari mëntaitërinso pochachin yaꞌipiroꞌpaquënta Sinioro nohuitapi.

Isaías 2:4

Nisha nisha nacionoꞌsa Siniorori coisë pochin nicaton noꞌtëquën shaꞌhuitarin. Nisha nisha piyapiroꞌsa ninoꞌhuirápirinahuëꞌ, acopitapon. Sahuëninënaꞌ, noꞌpaꞌ ohuërënanoꞌsa atarantaponaꞌ. Nansanënantaꞌ, yaquitonanoꞌsa atarantaponaꞌ. Co inso piyapiroꞌsa tërantaꞌ, niahuëcaiso marëꞌ ohuarapisopita macaponahuëꞌ. Naporahuatonaꞌ, co huachi niahuëcaiso marëꞌ niaꞌchintaponahuëꞌ.

Isaías 54:14

Noꞌtëquënáchin nicatona chiníquën nanantaponaꞌ. Co inso tëranta huaꞌanëntarinquëmahuëꞌ niꞌton, co tëꞌhuaramahuëꞌ. Co tëꞌhuaatoma nisha nisha yonquiaramahuëꞌ.

Isaías 60:11

Ninanonëma yaꞌcoananënpitantaꞌ, iꞌsoatopiquëranchin nisáponaꞌ. Tahuërintaꞌ, tashintaꞌ, co oncotaponahuëꞌ. Nisha nisha nacionoꞌsaquë yaꞌhuëpisopita maꞌsharoꞌsa naꞌcon naꞌcon paꞌtërinsoꞌ, quëshiinëmaso marëꞌ napoapon. Copirnoroꞌsaꞌ, catahuarinsopita huaꞌanoꞌsaꞌ, inapita yaꞌconacaiso marëꞌ napoapon.

Isaías 60:17

Shaꞌpi huaꞌna yaꞌhuërënamën, oro quëtaranquëmaꞌ. Huaꞌnamia yaꞌhuërënamën, prata quëtaranquëmaꞌ. Nontë yaꞌhuërënamën, shaꞌpi huaꞌna quëtaranquëmaꞌ. Naꞌpi yaꞌhuërënamëntaꞌ, huaꞌnamia quëtaranquëmaꞌ. Huaꞌanëntërinquëmasonta noya huaꞌanëntarinquëma niꞌton, sano cancantaramaꞌ. Aꞌnapitanta noꞌtëquënáchin yonquirapitomaꞌ, noya niꞌsaramaꞌ.

Isaías 61:11

Sharoꞌsa noꞌpaquë pichopitërin. Yanco namënën iꞌtorohuatëra, papoyantërin. Inapochachin Sinioronta noꞌtëquënáchin nininsoꞌ aꞌnoarin. Ina marëꞌ yaꞌipi nacionoꞌsaquë: “¡Ma noyacha Sinioroso paya!” taꞌtonaꞌ, cantaponaꞌ.

Miqueas 4:3

Naporoꞌ Siniorosoꞌ coisë pochin nicaton, nisha nisha piyapiꞌsa noꞌtëquën shaꞌhuitapon. Notohuaroꞌ piyapiꞌsa nanan yaꞌhuëtopisoꞌ, áquë yaꞌhuëpirinahuëꞌ, maꞌsona onpotacaisoꞌ shaꞌhuitapon. Shaꞌhuitohuachin, inahuaso sahuëninëna quëran noꞌpaꞌ ohuërënanoꞌsa ocoiaponaꞌ. Nansanëna quëraontaꞌ, yaquitonanoꞌsa ocoiaponaꞌ. Naporosoꞌ, co huachi niahuëcaiso niaꞌchintaponahuëꞌ. Naporahuaton co huachi niahuëaponahuëꞌ.