Isaías 58:5 - Chayahuita (Shahui)

⁵ Canpitaso ayonahuatamara sëtërëso pochin yaꞌnoramaꞌ. Shiꞌshinamatë pochin monshoáporamaꞌ. Saꞌcatën aꞌmosahuatomaꞌ, huariano aipi quëhuënamaꞌ. “Ina pochin nicaꞌhuaisoꞌ Sinioro nohuantërin,” topiramahuëꞌ, ¡co ina caso nohuantërahuëꞌ! “Inapoatë ayonacaso yaꞌhuërin. Napohuatëhuaꞌ, Yosë noya niꞌsarinpoaꞌ,” tënamaꞌ.

Isaías 58:5 ပူးပေါင်းရင်းမြစ်များ

Copo naporinso' 2:8

Napohuachina, amoro ahuiquitopiquë paꞌsahuaton huariano aipi huënsëconin. Inaquë socatë masahuaton niitërárin.

Salmos 69:13

Caso nipirinhuëꞌ, Sinioro chiníquën nontëranquën. Quëmaso Yosënëhuënquën niꞌton, ipora catahuaco. Nosoroatonco aꞌpanico huachi. Yácatahuaranco niꞌton, nichaꞌëco.

Isaías 49:8

Siniorori chachin napotaantarin: “Nohuantasënquën chachin catahuaranquën. Nontohuatanco natanaranquën. Yanichaꞌëranquën niꞌton, catahuaranquën chaꞌëcaso marëꞌ. Quëmá quëran israiroꞌsarëꞌco anoyataꞌhuaso marëꞌ carinquën paꞌpoyararanquën. Inapohuato, yaꞌhuëpiso noꞌpaꞌ noya noya acoantarahuë. Inimiconënapitari noꞌpanëna tapitopirinahuëꞌ, piyapinëhuëpitari chachin huaꞌanëntaantaponaꞌ.

Isaías 58:3

Inapopiramahuë naporamaꞌ: “Ayono nipirëhuahuëꞌ, ¡co Yosë tahuërëtërinpoahuëꞌ! Inaso co cancantopirinpoahuëꞌ, ¡ma topinanta ayonatëhua parisitáparihuaꞌ!” tënamaꞌ. Ayono tahuëri nipirinhuëꞌ, canacamaso marëꞌ sacatëramaꞌ. Inapoatoma piyapinëmantaꞌ, naꞌcon naꞌcon aparisitëramaꞌ.

Isaías 61:2

Ipora tahuëriꞌsa Yosë nosoroatënquëma nichaꞌësarinquëmasoꞌ, shaꞌhuitaranquëmaꞌ. Inimiconëmapitantaꞌ, Yosëri iꞌhuërëtacasoꞌ shaꞌhuitaranquëmaꞌ. Yaꞌipi sëtopisopita achinicancanaꞌhuaso marëꞌ aꞌparinco.

Levítico 16:29

Yaꞌipi ipora camairanquëmasopita, co canpitasáchin camairanquëmahuëꞌ. Shiparimapitantaꞌ, natëcaiso yaꞌhuërin. Pascoa tahuëriꞌsa naꞌhuërin quëran huarëꞌ canchisë yoqui pichiaramaꞌ. Naporo yoqui shonca tahuëri nanihuachin, Sinioro marëꞌ chinotaramaꞌ. Co manta sacatamaso yaꞌhuërinhuëꞌ. Co nisharoꞌsa yacaparinquëmasopita tërantaꞌ, sacatapihuëꞌ. Naporo tahuëri co manta coshatapomarahuëꞌ, yonquiaramaco.

Levítico 16:31

Yaꞌipi ipora camairanquëmasopita, co canpitasáchin camairanquëmahuëꞌ. Shiparimapitantaꞌ, natëcaiso yaꞌhuërin. Ina tahuëri noya nicatoma canpitasoꞌ, ca marëꞌ chinotaramaꞌ. Co coshatatomarahuëꞌ, chinotaramaco.

Mateo 6:16

Ina quëran itaantarin: “Ama nonpinaꞌpiroꞌsa pochin nicosohuëꞌ. Aꞌnaquën Yosë nontacaso marëꞌ yaꞌipi tahuëri co mantaꞌ coshatërinhuëꞌ. Naporahuaton, co nitapamantarinhuëꞌ. Sëtërëso pochin yaꞌnorin aꞌnapita nitotacaiso marëꞌ. Co cancanën quëran chinotaponahuëꞌ, aꞌnapitari nicacaiso marëꞌ naporin. Niꞌpachinara: ‘Ma noya Yosë chinotërin,’ topi. Piyapiꞌsari noya niꞌpirinahuëꞌ, co huachi Yosëri acanaarinhuëꞌ.

Lucas 4:19

Ipora tahuëriꞌsaꞌ Yosë nosoroatënquëmaꞌ, nichaꞌësarinquëma huachi, tënahuë. Ina shaꞌhuicaꞌhuaso marëꞌ acorinco,” tënin Isaiasë, itërin quirica nontaton.

Romanos 12:2

Iporasoꞌ notohuaroꞌ piyapiꞌsaꞌ co Yosë natëpihuëꞌ. Maꞌsharáchin yonquiatonaꞌ, co Yosë yonquipihuëꞌ. Ama inapita nonancosohuëꞌ. Nani tahuëri Yosë nontocoꞌ yonquirinso chachin quëchinquëmaꞌ. Ina yonquihuatamaꞌ, nohuantërinso chachin anitotarinquëmaꞌ. Ina quëran noya noya cancantohuatamaꞌ, noya niꞌsarinquëmaꞌ.

1 Pedro 2:5

Imaramaꞌ niꞌton, canpitantaꞌ noya naꞌpiroꞌsa pochin nisaramaꞌ. Nanpimiataramaꞌ. Yaꞌipi imarëhuasopita Yosë acorinpoaꞌ pëinën pochin nicacaso marëꞌ. Cancanënpoa quëran huarëꞌ ina naꞌcon chinotërëhuaꞌ niꞌton, corto huaꞌanoꞌsa pochin nisarëhuaꞌ. Nani tahuëri ina chinotatëhuaꞌ, “Yosparinquën Sinioro,” itahuaꞌ. Nicatahuacasontaꞌ ama naniantahuasohuëꞌ. Quisocristo catahuarinpoaꞌ ina pochin nicacasoꞌ. Ina marëꞌ Yosë noya niꞌsarinpoaꞌ.