Isaías 55:6 - Chayahuita (Shahui)

⁶ Siniorosoꞌ, co áquë patërinpoahuëꞌ. Yonipatëhua quënanarihuaꞌ. Nontohuatëhuaꞌ, natanarinpoaꞌ.

Isaías 55:6 ပူးပေါင်းရင်းမြစ်များ

Salmos 14:2

Inápa quëran Siniorosoꞌ nocorinpoaꞌ. “¿Aꞌnaya tëranta taꞌma yonquínahuan niꞌton, chinotaponco to?” taꞌton ninapirinhuëꞌ.

Salmos 145:18

Chinotërinsopitasoꞌ, yaꞌcarísha quëran natanin. Tëhuënchachin nohuantatona chinotopisopita, inapotërin.

Salmos 148:14

¡Piyapinënpitanpoa chiníquën nanan quëtërinpoaꞌ! Yaꞌipi imarinsopitari chinochinaꞌ. Israiroꞌsanpoasoꞌ, cancantërinpoaꞌ. Ina piyapinënpoa ninëhuaꞌ. ¡Ma noyacha Sinioroso paya!

Salmos 27:8

“Nontoco catahuainquën,” itarancoso pochin cancantërahuë. Napoaton nontaranquën Sinioro.

Salmos 32:6

Inapotëranco niꞌton, imarinënquënsopita nontaponën. Yacatahuatëranso tahuëriꞌsa nontaponën. Paquiitërinso pochin maꞌsha onpocaso tahuëri nanipon. Napopirinhuëꞌ, imarinënquënsopitaso sano cancantaponaꞌ.

Salmos 34:19

Noyasáchin nipisopitantaꞌ, nisha nisha maꞌsha onpopi. Napopirinahuëꞌ, nani maꞌsha onpopi quëran Siniorori nichaꞌësarin.

Salmos 95:7

Inaíchin Yosënënpoaꞌ. Canpoasoꞌ ina piyapinënpitanpoa ninëhuaꞌ. Ohuicaroꞌsa huaꞌanëni pastoquë noya aꞌpairin. Inapochachin Sinioronta noya aꞌpairinpoaꞌ. Ipora tahuëri ina nontarinquëma niꞌton, noya natanatoma yonquicoꞌ:

Proverbios 8:17

Nosororinacosopita, carinta nosororahuë. Inpitaso cancantohuachinaco, quënanarinaco.

Isaías 45:19

Maꞌsona yanipatora, co poꞌoana quëran nonato naporahuëꞌ. Cacopo shinpitanquëmantaꞌ: ‘Topinan tëranta chinotoco,’ co itëranquëmahuëꞌ. Caso Sinioroco noya coisë pochinco niꞌto, noꞌtëquënáchin nontëranquëmaꞌ,” itërinpoaꞌ.

Isaías 45:22

Nisha nisha parti isoroꞌpaquë yaꞌhuëramasopita, huëco caquë nichaꞌëinquëmaꞌ. Casáchin Yosëco niꞌto, paꞌpi áquë yaꞌhuëpiramahuëꞌ, huëcoꞌ.

Isaías 49:8

Siniorori chachin napotaantarin: “Nohuantasënquën chachin catahuaranquën. Nontohuatanco natanaranquën. Yanichaꞌëranquën niꞌton, catahuaranquën chaꞌëcaso marëꞌ. Quëmá quëran israiroꞌsarëꞌco anoyataꞌhuaso marëꞌ carinquën paꞌpoyararanquën. Inapohuato, yaꞌhuëpiso noꞌpaꞌ noya noya acoantarahuë. Inimiconënapitari noꞌpanëna tapitopirinahuëꞌ, piyapinëhuëpitari chachin huaꞌanëntaantaponaꞌ.

Isaías 58:9

Naporoꞌ tëhuënchinsoꞌ nontohuatamaco, aꞌpaniaranquëmaꞌ. Catahuahuanquëmaso marëꞌ chiníquën nontohuatamaco, carimantaꞌ, aꞌpanitënquëma catahuaaranquëmaꞌ. Coꞌso huachi aꞌnapita aparisitohuatanhuëꞌ, co huachi noꞌhuihuatanhuëꞌ, co huachi nonpinapihuatanhuëꞌ,

Isaías 65:24

Coꞌhuara përashátëraponacohuëꞌ, aꞌpaniarahuë. Nontërinacosonta co tiquiátërasoihuëꞌ, natanahuato aꞌpaniarahuë.

Ezequiel 33:11

Napopiramahuëꞌ, caso Sinioroco niꞌton, noꞌtëquën shaꞌhuitaranquëmaꞌ. Co caso nohuantërahuë co noyahuëꞌ nipisopita chiminacaisoꞌ. Co noyahuëꞌ nipiso aꞌporahuatona nanpicaisoꞌ nohuantërahuë. Israiroꞌsanquëmaꞌ, co noyahuëꞌ ninamasopita aꞌpocoꞌ. Ama chiminacamaso nohuantocosohuëꞌ,’ tënin Sinioro, itëquëꞌ,” itërinco.

Daniel 4:27

Napoaton carinquën pënëinquën: Noꞌtëquënáchin nicaton, ama huachi aquëtë oshahuaantaquësohuëꞌ. Co noyahuëꞌ ninansopitanta aꞌporahuaton, popriyatopisopita catahuacaso cancantëquëꞌ. Tapona inaporanso marëꞌ noya yayaꞌhuërápiranhuëꞌ,” itërinco.

Amós 5:6

Noya nanpirápamasoꞌ nohuantohuatamaꞌ, Sinioro chinotoco catahuainquëmaꞌ. Coꞌsoꞌ ina chinotohuatamahuëꞌ, inimiconëmapita aꞌpatiarinquëmaꞌ. Yaꞌhuëramaso noꞌpaꞌ, ahuiquitapi. Co inso tëranta Pitiriquë yaꞌhuërinsoꞌ, ina pën atácopitarinhuëꞌ.

Jonás 3:8

Yaꞌipiya quëran saꞌcatën nininso aꞌmoinaꞌ. Pëꞌtahuanëna quëran huarëꞌ, ina pochin aꞌmochinaꞌ. Co napion ancantërëhuasoꞌ, aꞌnocaso marëꞌ inapoaꞌahuaꞌ. Naporahuatëhua yaꞌipi cancanënpoa quëran Yosë nontahuaꞌ. Yaꞌipi co noyahuëꞌ ninëhuasopita, noꞌhuitërayanpoa nicatëhuaꞌ, co tënorotochináchinhuëꞌ cancantërëhuasopita, inapita yaꞌipi aꞌpoaꞌahuaꞌ.

Mateo 5:25

Niꞌcoꞌ. Nihuitëramaso marëꞌ yaquëpahuachinënquëmaꞌ, aꞌnaroáchin nanan anoyatocoꞌ. Co anoyatohuatamahuëꞌ, coisëquë quëparinënquëmaꞌ. Coisëquë quëpahuachinënquëmaꞌ, sontaroꞌsaquë yoꞌcoaninënquëmaꞌ, tashinan pëiquë poꞌmoarinënquëmaꞌ.

Lucas 13:25

Aꞌna tahuëri huaꞌanëni yaꞌcoananën oncotarin huachi. Naporo huarëꞌ aipiran huanirahuatomaꞌ, yayaꞌconpiramahuëꞌ. “Iꞌsoatocoi Sinioro,” tosapiramahuëꞌ, co nohuantarinhuëꞌ. “Co nohuitëranquëmahuëꞌ. Co canpitasoꞌ piyapinëhuëpitanquëmahuëꞌ,” itarinquëmaꞌ.

Juan 8:21

Ina quëran itantarin: —Aꞌna tahuëri paꞌmiatarahuë. Naporoꞌ yonípiramacohuëntaꞌ, co quënanaramacohuëꞌ. Oshanëmarëꞌquëma chachin chiminaramaꞌ. Insëquësona paꞌpato, co canpitasoꞌ nanitaramahuëꞌ pacacamasoꞌ, itërin.

Efesios 3:13

Aꞌchintëranquëmaꞌ niꞌton, tashinan pëiquë poꞌmorinaco. Parisitapirahuëꞌ, chiníquën cancantocoꞌ. Canpitantaꞌ Quisocristo imacamaso marëꞌ parisitërahuë. Ina marëꞌ noya cancantacasoꞌ yaꞌhuërin.

Deuteronomio 4:29

Napoaponahuëꞌ, inaquë niꞌsëma yaꞌipi cancanëma quëran, nisahuaton yaꞌipi huaꞌyanëma quëran Sinioro nontohuatamaꞌ, natanatënquëma catahuaarinquëmaꞌ.

Deuteronomio 4:7

¡Co inso nacion tërantaꞌ, canpoa pochin Yosë imapihuëꞌ! Inahuasoꞌ, mamanshinënari catahuacaso marëꞌ nontopirinahuëꞌ, co catahuarinhuëꞌ. Canpoaso nipirinhuëꞌ, onporosoꞌ nontohuatëhuara, aꞌnaroáchin aꞌpanirinpoaꞌ.

Hebreos 2:3

Iporaso nipirinhuëꞌ, Quisocristo aꞌpaimarin noya nanan shaꞌhuitiinpoaso marëꞌ. Naꞌcon nosoroatonpoaꞌ, yanichaꞌërinpoaꞌ. Huiꞌnin chachin niꞌton, co ina natëhuatëhuahuëꞌ, naꞌcon naꞌcon anaꞌintinpoasoꞌ yaꞌhuërin. Quisocristo chachin noya nanan shaꞌhuirin. Ina quëran caꞌtanoꞌsanënpitari natanahuatonaꞌ, inachachin shaꞌhuitaantarinënpoaꞌ.

Hebreos 3:13

Napoaton nani tahuëri nipënëncoꞌ. Ipora chachin coꞌhuara ayaroꞌ tahuëri naniyatërasohuëꞌ, nicatahuacoꞌ ama oshahuanacaso marëhuëꞌ. Niꞌcona oshanëmaꞌ anoꞌquihuachinquëmaꞌ. Inapotohuachinquëmaꞌ, oshaquëran Yosë naniantaramaꞌ niꞌton, co natëtochináchinhuëꞌ cancantaramaꞌ.