Isaías 55:1 - Chayahuita (Shahui)

¹ Sinioro tënin: “Yamororëso pochin cancantohuatamaꞌ, huëco anoyacancanchinquëmaꞌ. Co coriqui yaꞌhuëtopirinquëmahuëꞌ, catahuararanquëmaꞌ. Nontohuatamaco cosharo achinitërinso pochachin achincancanaranquëmaꞌ. Huino, ohuaca shoꞌshoiꞌ, inapita achinitërinso pochin asanocancanaranquëmaꞌ.

Isaías 55:1 ပူးပေါင်းရင်းမြစ်များ

Salmos 63:1

Quëmasáchin Yosënëhuënquën. Paꞌpi yamororëso pochin cancantato, yanohuitëranquën. Inotëroquë noꞌpaꞌ yanirin. Inaquë shaꞌtohuatëra, co noyatërinhuëꞌ. Ina pochin cancantato noyá nohuitaꞌhuanquë huarëꞌ sano cancantarahuë.

Proverbios 8:4

“Canpita piyapinquëma pënënaranquëmaꞌ.

Isaías 1:19

Natëhuatamaco, sharoꞌsa noya noyatërinsoꞌ caꞌsaramaꞌ.

Isaías 44:3

Ca nohuanton inotëroquë naꞌcon iꞌ yaꞌhuëapon. Yaniroquëntaꞌ, iꞌshanaroꞌsa yaꞌhuëapon. Canpita quëran pipipisopitanta ispiritonëhuë ayaꞌcoancantarahuë. Inapotahuato naꞌcon catahuaarahuë.

Isaías 52:3

Inimiconëma quëpainëmaso marëꞌ co piꞌpian tërantaꞌ, pahuërë maꞌpatërahuëꞌ. Napoaton huaꞌanëntaantaꞌhuanquëmaso marëꞌ co piꞌpian tëranta pahuërëtaꞌhuaso yaꞌhuërinhuëꞌ,” tënin.

Oseas 14:4

Sinioro naporin: “Israiroꞌsasoꞌ, co natantochináchinhuëꞌ cancantopirinahuëꞌ catahuahuato, co huachi ina pochin cancantaponahuëꞌ. Co quëꞌyápirohuë nipirinahuëꞌ, nosoroarahuë. Noꞌhuitërahuësoꞌ sanoato, napotarahuë.

Joel 3:18

Cota huënton inimiconënpita anaꞌintërahuëso piquëran, paꞌpi notohuaroꞌ oparoroꞌsa yaꞌhuëapon. Napoaton huino sacóshin nicaponaꞌ. Pastoroꞌsantaꞌ noya noyatapon niꞌton, ohuacaroꞌsa notohuaroꞌ shoꞌshoiꞌ matapi. Motopiroꞌsaꞌ, motopiaꞌhuaroꞌsaꞌ, inaquëpita iꞌsharoꞌsa paꞌirin. Ina paꞌirinso pochin huino, shoꞌshoiꞌ, inapita yaꞌhuëapon. Iꞌsharoꞌsanta Cota huënton noꞌpanënquë yaꞌhuërinsoꞌ, panca pancairoꞌsa nicaponaꞌ. Chinotërinacoso pëiquë chachin, noꞌpa quëran iꞌsha pipipon. Inasoꞌ pancaitahuaton, Sitin motopiana itopisoꞌ, paꞌtapon.

Zacarías 9:15

Siniorosoꞌ, yaꞌipi nanitaparin. Inimiconënapitasoꞌ, israiroꞌsa ahuëcaiso marëꞌ naꞌpira tëꞌyatopiquë quëcaponaꞌ. Inanpiquë naꞌpiroꞌsa tëꞌyatopirinahuëꞌ, israiroꞌsaso Siniorori paꞌpoyapon. Inari catahuapon niꞌton, inimiconëna minsëaponaꞌ. Minsëhuachinaꞌ, pita nicaponaꞌ. Naꞌcon huino oꞌopiso pochin noncaroaponaꞌ. Corto huaꞌanoꞌsa maꞌsha tëpahuachinara, tasonoꞌsaquë huënaiꞌ mëntaitopi. Inapotatona artaro aipi opopi. Inapochachin inapitantaꞌ, tasonënaquë huino mëntaitaponaꞌ.

Mateo 10:8

Caniaꞌpiroꞌsaꞌ aꞌnaroáchin anoyatocoꞌ. Chimipiroꞌsantaꞌ, ananpitaantacoꞌ. Chana caniori maninsontaꞌ quënanpatamaꞌ, anoyatocoꞌ. Aꞌnapitantaꞌ sopairoꞌsari yaꞌcoancantopi niꞌton, paꞌpi huaꞌyantopi. Quënanpatamaꞌ, sopairoꞌsaꞌ aꞌpatocoꞌ piyapiꞌsaꞌ noyachinaꞌ. Co mantaꞌ pahuërëtapomarahuëꞌ, Yosësoꞌ inaora nohuanton, catahuarinquëmaꞌ niꞌton, ama pahuërë nitocosohuëꞌ.

Mateo 13:44

Ina quëran itaantarin: “Isontaꞌ aꞌchinchinquëmaꞌ Yosë huaꞌanëntërinsoꞌ nitotacamaso marëꞌ. Aꞌna quëmapi yaꞌhuëpirinhuëꞌ. Aꞌna noꞌpaꞌ paꞌtaton, oro pochin nininsopita quënanconin. Acoporoꞌ yaꞌhuëpirinhuëꞌ, quënanconin. Paꞌyataton, imotantarahuaton, paꞌnin huachi. Yaꞌipi maꞌshanënpita paꞌanahuaton, coriqui canarin quëran, ina noꞌpaꞌ paꞌanconin huachi. ‘Quënanahuësoꞌ noya nóya,’ taꞌton, ina naꞌcon naꞌcon nohuantërin,” tënin. (Inapochachin Yosë huaꞌanëntinquëmasoꞌ naꞌcon naꞌcon nohuantocoꞌ, tapon naporin.)

Mateo 26:29

Co huachi opaiꞌ oꞌoantarahuëꞌ. Chiminarahuë huachi. Aꞌna tahuëri Tata Yosë huaꞌanëntërinsoꞌ nanihuachin, canpitaroꞌco nasha pochin oꞌoantarahuë. Naporoꞌ noya noya cancantarihua huachi, itërin.

Mateo 5:6

Tanarëso pochin, yamororëso pochin cancantatomaꞌ, Yosë naꞌcon nohuantocoꞌ. Ina pochin cancantacasoáchin nohuantohuatamaꞌ, noya niꞌsarinquëmaꞌ. Catahuarinquëmaꞌ ina pochin cancantacamaso marëꞌ. Sano cancantaramaꞌ.

Hechos 8:20

Pitrorisoꞌ itapon: —Maꞌpitacha yonquiran paya. Coriqui marëꞌ Ispirito Santo ¿yamaꞌparanco ti? Co ina marëꞌ Yosë quëtërinpoahuëꞌ. Co inasoꞌ paꞌanëhuëꞌ. Ina pochin yonquihuatan, parisitopiquë paꞌsaran. ¡Coriquirëꞌquën chachin inaquë paꞌsaran!

Romanos 3:24

Nipirinhuëꞌ, inaora nohuanton, Yosë nosororinpoaꞌ. Nosoroatonpoaꞌ, Quisocristo aꞌpaimarin nichaꞌëinpoaso marëꞌ. Ina imapatëhuaꞌ, Yosë noya niꞌsarinpoaꞌ.

1 Corintios 3:2

Niꞌcoꞌ. Huaꞌhuishin shoꞌshoíchin nanpitërin. Co coshachatërarinhuëꞌ. Inapochachin canpitasoꞌ ninamaꞌ. Yaꞌnan aꞌchintaponquëmaꞌ, piꞌpian aꞌchintëranquëmaꞌ. Aquëtëꞌ yaaꞌchintopiranquëmahuëꞌ, co nanichátëraramahuëꞌ noꞌtëquën yonquicamasoꞌ. Iporahuantaꞌ co nanitëramahuëꞌ.

1 Pedro 2:2

Yosë huëntonënquë yaꞌconpatëhuaꞌ, huaꞌhuasha nasha huaipiso pochin ninëhuaꞌ. Niꞌcoꞌ. Canopiaꞌhuaya shoꞌsho apira apira nayarin. Shoꞌshotaton, noya chinirarin. Inapochachin canpitantaꞌ Yosë noninso chachin naꞌcon naꞌcon nohuantocoꞌ. Ina yonquihuatamaꞌ, oshaquëran noya noya nisaramaꞌ. Chiníquën cancantatomaꞌ, noya chaꞌësaramaꞌ. Yosë nanamënáchin achinicancaninpoaꞌ.

Apocalipsis 21:6

Ina quëran itantarinco: —Nani yaꞌipiya anoyatërahuë. Caꞌton yaꞌhuërahuë. Coꞌhuara isoroꞌpaꞌ yaꞌhuëyátërasohuëꞌ, yaꞌhuárahuë. Aꞌna tahuërintaꞌ yaꞌipi maꞌsharoꞌsaꞌ taꞌhuantopirinahuëꞌ, casoꞌ yaꞌhuápo. Iráca quëran huarëꞌ yaꞌhuárahuë. Co onporontaꞌ taꞌhuantarahuëꞌ. Napoaton nontoco catahuainquëmaꞌ. Niꞌquëꞌ. Chiníquën yamorohuatëra, oꞌorëꞌ. Oꞌopatëra, chiníquën cancantërëꞌ. Inapochachin cantaꞌ catahuaranquëmaꞌ. Yamororëso pochin cancantohuatamaꞌ, nanpirin iiꞌ quëchinquëmaꞌ noya cancantacamaso marëꞌ. Caora nohuanto, catahuaranquëmaꞌ. Insonquëma tërantaꞌ nohuantohuatamaco, huëcoꞌ anoyacancanchinquëmaꞌ.

Apocalipsis 22:1

Ina quëran Yosë nohuanton, huaꞌnarëso pochin niantarahuë. Nasha Quirosarin niantahuato, anquëni pancaiꞌ aꞌnotërinco, noyápiachin nininsoꞌ. Inasoꞌ, Nanpirin iiꞌ itopisoꞌ. Yosë huaꞌanëntërin quëran pipirarin. Inaquë Carniroaꞌhuantaꞌ huaꞌanëntarin.

Apocalipsis 22:17

Yaꞌipi Quisoso imarëhuasopita: “Oꞌmantaquëꞌ Sinioro,” itërëhuaꞌ. Ispirito Santontaꞌ, inachachin tënin. Natanamasopitantaꞌ, “Oꞌmantaquëꞌ Sinioro,” itocoꞌ. Yamororëso pochin cancantohuatamaꞌ, huëcoꞌ nanpirin iiꞌ quëchinquëmaꞌ. Achinirinpoaso pochin quëtarinquëmaꞌ noya cancantacamaso marëꞌ. Co mantaꞌ paꞌtërinhuëꞌ.

Apocalipsis 3:18

Napoaton pënënanquëmaꞌ. Chiníquën nontoco catahuainquëmaꞌ. Niꞌcoꞌ. Oro aꞌpëhuatëra, yaꞌipi nëꞌhuë inquirin. Orosachin quëparitërin, noyasáchin nininsoꞌ. Inapochachin canpitantaꞌ nontoco catahuainquëmaꞌ noya yonquicamaso marëꞌ. Naꞌcon pahuantarinquëmaꞌ Yosë pochin nicacamasoꞌ. Casáchin yonquico Yosë noya niꞌinquëmaꞌ. Yonquihuatamaco, huiríchin aꞌmorëso pochin noya nisaramaꞌ. Somaraya pochin cancantëramaꞌ niꞌton, co tëhuënchachin nohuitëramacohuëꞌ. Nimirioquë acorayatërëso pochin anoyacancanchinquëmaꞌ cancanëma quëran nohuitamacoso marëꞌ.

Rota naporinso' 4:1

Ina quëran Poososo paꞌsahuaton, ninano yaꞌcoanaquë huënsëconin. Inaquë piyapiꞌsa yániyontonpi niꞌton, huënsëconin. Naporo chachin Poosori Rota shaꞌhuitaton: “Inaso soꞌyanco marëꞌ yaꞌcariꞌ quëmopi,” itërinsoꞌ quëmapi naꞌhuëarin. Quënanahuaton përarin: —Iyasha. Huëquë huënsëriaquëꞌ, itërin. Napotohuachina, inaso huënsëconin.