Isaías 54:7 - Chayahuita (Shahui)

⁷ “Co huaꞌqui marëꞌ aꞌporanquëmahuëꞌ. Inapotopiranquëmahuëꞌ, nosoromiatatënquëma naquëranchin maantaranquëmaꞌ.

Isaías 54:7 ပူးပေါင်းရင်းမြစ်များ

Salmos 107:3

Nisha nisha noꞌparoꞌsa quëran ayontoantarinpoaꞌ. Norti quëran, sor quëran, piꞌi pipirin parti quëran, yaꞌconinso parti quëran, yaꞌipi inaquëranpita ayontoninpoaꞌ.

Isaías 40:11

Huaꞌanëni ohuicanënpita aꞌpairin. Carniroaꞌhuaroꞌsaꞌ, iporahuaton quëparin. Nasha huaipisopita oshaquëran quëpaton aꞌcarin. Ina naporinso pochin canpoantaꞌ, Sinioro noya aꞌpaiarinpoaꞌ,” itocoꞌ.

Isaías 49:13

Piꞌiroꞌtëquë yaꞌhuëpisopita, capa cancanchinaꞌ. Capa cancantatonaꞌ: ‘yai,’ charaꞌinaꞌ. Isoroꞌpaquëntaꞌ, inapochachin capa cancanchinaꞌ. Motopiroꞌsa quëran huarëꞌ piyapiꞌsa pochin capa cancantatonaꞌ, ‘yai,’ charaꞌinaꞌ. Sinioro piyapinënpita parisitapisoꞌ, inari noya acoantarin. Nosoroaton napotarin niꞌton, ina pochin nicoꞌ,” itërin.

Isaías 49:18

Quirosarinquë yaꞌhuëramasopita itohuaran itohuaran noya notëtocoꞌ. Nisha nisha parti israiroꞌsa quëpapisopita huëantarapi. Caso Sinioroco yaꞌhuëárahuë niꞌton, noꞌtëquën shaꞌhuitaranquëmaꞌ: Yaꞌipi israiroꞌsa huëꞌpachina, nitapaantaranso pochin acoarinën. Nanon yasoꞌyaton nitaparinso pochin nitarinën.

Isaías 49:21

Napotohuachinëmaꞌ, canpitaso yonquinëmaquë napoapomaꞌ: ‘¡Isopitasoꞌ, co yaꞌhuëhuanoꞌsahuëꞌ! Quirosarinquë yaꞌhuëraisopitasoꞌ, quiquirinacoi. Inapoatoi Quirosarinsoꞌ, tananhuantárin patërai. Co onpo naꞌacaꞌhuaisohuëꞌ nitërinacoi. Isopita huëꞌpisopitasoꞌ, co isëquë soꞌsopihuëꞌ. ¡Intohuaranso aꞌna huëꞌmaraiꞌ!’ tosaramaꞌ,” tënin.

Isaías 50:1

Ina quëran Sinioro napoantarin: “Israiroꞌsanquëmaꞌ. Carimaso naꞌcon yaaꞌchintatënquëma yonípiranquëmahuëꞌ, co quënananquëmahuëꞌ. Përápiranquëmahuëꞌ, co aꞌpaniramacohuëꞌ. ‘Nihuitërinsoꞌ pahuërëtacaso marëꞌ paꞌanatë pochin nitërinpoaꞌ,’ topiramahuëꞌ. Oshahuanama niꞌton, paꞌanatë pochin nitëranquëmaꞌ. Co natantochináchinhuëꞌ cancantëramaso marëꞌ aꞌpoatë pochin nitëranquëmaꞌ. ¡Natëramaco naporini, carima nichaꞌëitënquëmahuëꞌ! Marënta camaihuatora, aꞌnaroáchin yanirin. Iꞌrosanta yanitonaꞌ, inotëro taranapi. Napohuachina, samiroꞌsanta yamorori tëpapon. Inapoatona chiminpachinaꞌ, chanataponaꞌ.

Isaías 60:10

Nisharoꞌsari Quirosarin pairanën anoyataantaponaꞌ. Copirnonënapitantaꞌ, canpita marëꞌ sacataponaꞌ. Sinioro noꞌhuitënquëma anaꞌintopirinquëmahuëꞌ, naporoso paꞌpi nosoroarinquëma huachi.

Isaías 60:4

Yaꞌipi tahuitërinquëmasoꞌ, noya niꞌcoꞌ. Niyontonahuatona huëcapaiarinëmaꞌ. Huiꞌnamapita áquë quëran huëcapayaponëmaꞌ. Sanapiꞌsa nipisopitanta noya aꞌpaiatonaꞌ, quësapi. Iporahuatona quësapi.

Isaías 63:7

Onpopinsona Sinioro nosorotërinso yonquiato, shaꞌhuiarahuë. Maꞌpitaquësona catahuarinpoaso yonquiato, cantarahuë. Israiro huënton nosoromiatërinso marëꞌ napoarahuë. Paꞌpi nosoroaton catahuarinso marëꞌ inapoarahuë.

Ezequiel 36:24

Carima yaꞌipi inapita noꞌparoꞌsa quëran ocoiaranquëmaꞌ. Nisha nisha piyapiꞌsa yaꞌhuëpi quëran ocoirahuatënquëmaꞌ, ayontonaranquëmaꞌ. Inapotatënquëmaꞌ, yaꞌhuëramaso noꞌpaquë chachin quëpaantaranquëmaꞌ.

Miqueas 4:6

Sinioro chachin shaꞌhuitaantarinpoaꞌ: “Piyapinëhuëpita anaꞌintërahuë niꞌton, nisha nisha nacionoꞌsaquë quëpapi. Inaquë naꞌcon aparisitopi. Niꞌniri ohuicaroꞌsa yaꞌcontaton ayanquëtërinso pochin piyapinëhuëpita nitërahuë. Inapotopirahuëꞌ, huaꞌanëntaꞌhuaso caniaritohuato cari chachin anaꞌintërahuë quëran, caraya chaꞌëpisopita ayontoantarahuë. Inapitaroꞌco aꞌnara panca nacion ocoiarahuë. Ca chachin Sinioroco, piyapinëhuëpita huaꞌanëntarahuë. Sion motopiquë yaꞌhuërahuë quëran, huaꞌanëntarahuë. Co huachi onporo tëranta aꞌnapitari huaꞌanëntarinhuëꞌ.

Mateo 23:37

Ina quëran taantarin: “¡Yaꞌipi Quirosarinquë yaꞌhuëramasopita yonquiatënquëmaꞌ, chiníquën sëtërahuë! Naꞌa pënëntonaꞌpiroꞌsaꞌ Yosë aꞌpatërinquëmaꞌ pënëinënquëmaso marëꞌ. Aꞌpapirinhuëꞌ, tëparamaꞌ. Aꞌnaquën naꞌpiquë tëꞌyaratomaꞌ, tëparamaꞌ. Yaꞌipinquëmaꞌ nosoroatënquëmaꞌ, naꞌaroꞌ yacatahuapiranquëmahuëꞌ, co ca tërantaꞌ nohuantëramacohuëꞌ. Atari huaꞌhuin toꞌcohuëtërinso pochin yapaꞌpoyapiranquëmahuëꞌ, co nohuantëramacohuëꞌ.

2 Corintios 4:17

Tëhuënchachin iporasoꞌ piꞌpian parisitapirëhuahuëꞌ, co huaꞌquiꞌ isoroꞌpaquë yaꞌhuarihuahuëꞌ. Yosëꞌpaꞌ paꞌpatëhuaꞌ, co onporontaꞌ pipiarëhuahuëꞌ. Imarëhuaso marëꞌ parisitapirëhuahuëꞌ, inapaquësoꞌ noya noya cancantarihuaꞌ. Yosë pochachin cancantarihuaꞌ.

Efesios 1:10

Ina tahuërinën nanihuachin, Quisocristo yaꞌipiya huaꞌanëntarin. Isoroꞌpaquë yaꞌhuërinsopita, inápaquë yaꞌhuërinsopita inapita huaꞌanëntarin. Aꞌna huëntoínchin pochin acoarin. Ina Yosë naꞌcon nohuantërin.

Deuteronomio 30:3

Inapohuatamaꞌ, co huachi Sinioro anaꞌintarinquëmahuëꞌ. Nosoroatënquëma noya acoantarinquëmaꞌ. Shiparimapitanta inimicoroꞌsari nisha nisha nacionoꞌsaquë ayanquëpirinahuëꞌ, Siniorori ayontoantarin.

Santiago 4:6

Sacaiꞌ Yosëíchin yonquicaso nipirinhuëꞌ, inari chachin inaora nohuanton catahuarinpoaꞌ ina pochin cancantacasoꞌ. “Caora noya ninahuë,” topatëhuaꞌ, co Yosë noya niꞌsarinpoahuëꞌ. Nipirinhuëꞌ, “Co caora nanitërahuëꞌ noya nicaꞌhuasoꞌ. Catahuaco Sinioro,” topatëhuaꞌ, Yosë catahuarinpoaꞌ. Nosoroatonpoaꞌ, catahuarinpoaꞌ, tënin Yosë quiricanënquë.

2 Pedro 3:8

Isontaꞌ iyaroꞌsaꞌ yonquicoꞌ. “Aꞌna tahuërisoꞌ aꞌnaroáchin naꞌhuërin. Huaranca piꞌipisoꞌ huaꞌquiꞌ,” tënëhuaꞌ. Yosëso nipirinhuëꞌ co canpoa pochin yonquirinhuëꞌ. Huaranca piꞌintaꞌ nipirinhuëꞌ, Yosërisoꞌ aꞌna tahuëriáchin pochin niꞌnin. Huaranca piꞌipi, aꞌna tahuërirëꞌ napopianachin pochin niꞌnin.