Isaías 54:13 - Chayahuita (Shahui)

¹³ Yaꞌipi inaquë yaꞌhuëcaiso nipisopita cari aꞌchintarahuë. Yaꞌipi inaquë yaꞌhuëpisopitasoꞌ, noya yaꞌhuëatona sano yaꞌhuëaponaꞌ.

Isaías 54:13 ပူးပေါင်းရင်းမြစ်များ

Isaías 11:9

Yaꞌipi huaꞌanëntërinquë noyasáchin nicaponaꞌ. Co insonta aꞌnapita maꞌsha onpotaponhuëꞌ. Marë iꞌshari mëntaitërinso pochachin yaꞌipiroꞌpaquënta Sinioro nohuitapi.

Isaías 2:3

Notohuaroꞌ piyapiroꞌsa huëꞌsahuatonaꞌ: “Huëco Sinioro motopinënquë pantaꞌahuaꞌ. Israiroꞌsari chinotërinso pëinënquë pantaꞌahuaꞌ. Pënëntërinsopita aꞌchinchinpoaꞌ. Aꞌchintohuachinpoa noya natëahuaꞌ. Sion motopi quëran Yosë chachin aꞌchintarinpoaꞌ. Quirosarin ninano quëran nanamën aꞌchinapi,” tëcaponaꞌ.

Isaías 28:9

Canta yonquiatonaco napopi: “¡Isaiasëntachi yaaꞌchintërinpoaꞌ! ¡Sinioro anitotërincoso aꞌchinchinquëmaꞌ! taꞌton atosárin. Huaꞌhuaroꞌsa quirica nontacaso nitotahuachinara: ‘ta ta tata të të tëtë ti ti titi to to toto,’ tosápi. Inapita pochin cancantatonpoa napotápirinpoahuëꞌ, ¡macari natanapon!” topi.

Isaías 50:4

Sinioro piyapinën naporin: “Canotërëso pochin cancantopisopita achinicancanacaso marëꞌ, Sinioro aꞌchintërinco. Nani tashiramiachin taꞌtato natantaꞌhuaso marëꞌ catahuarinco.

Isaías 54:12

Torinënpitantaꞌ, nopi itopisoꞌ naꞌpi quëran, acoarahuë. Yaꞌcoananënpitantaꞌ, piriro itopiso naꞌpiroꞌsa quëran acoarahuë. Pairanënpitanta nisha nisha paꞌton nininsopita naꞌpiroꞌsa quëran acoarahuë.

Isaías 55:12

Canpitaso quëparinëma quëran, noya cancantatoma huënantaramaꞌ. Yaꞌhuëramaso noꞌpaquë chachin sano cancan quëran huënantaramaꞌ. Motopiroꞌsaꞌ, motopiaꞌhuaroꞌsaꞌ, inapitanta piyapi pochin capa cancantatona cantaponaꞌ. Yaꞌipi nararoꞌsanta piyapi pochin pincaroponaꞌ.

Jeremías 31:34

Co huachi insonta aꞌnapita aꞌchintaponhuëꞌ. Co iin nontaton: ‘Sinioro nohuitëquëꞌ,’ co itaponhuëꞌ. Yaꞌipiya quëran nohuitarinaco. Huaꞌhuishinoꞌsa quëran mashoroꞌsaquë huarëꞌ nohuitarinaco niꞌton, co huachi niaꞌchintaponahuëꞌ. Inapitasoꞌ co noyahuëꞌ nicatona oshahuanpirinahuëꞌ, oshanëna inquitato nanan anoyatarahuë. Ca Sinioroco shaꞌhuitaranquëmaꞌ,” tënin.

Ezequiel 34:25

Noya yaꞌhuëcaiso marëꞌ inapitaroꞌco anoyatarahuë. Ca nohuanton niꞌniroꞌsa ayapon. Ama ohuicanëhuëpita apicaiso marëhuëꞌ napoapon. Inapohuato tananoꞌsaquë topinan huëꞌëponaꞌ. Co manta tëꞌhuatapihuëꞌ.

Ezequiel 34:28

Co huachi nisha piyapiroꞌsari huaꞌanëntapihuëꞌ. Co niꞌniroꞌsari tëranta caponahuëꞌ. Co incari tëranta aꞌpayanaponhuë niꞌton, co huachi tëꞌhuarëꞌna yaꞌhuëaponahuëꞌ.

Ezequiel 37:26

Ama tëꞌhuarëꞌna yaꞌhuëcaiso marëhuëꞌ, inapitaroꞌco anoyatarahuë. Inapitaroꞌco anoyatërahuësoꞌ, yaꞌhuëmiatarin. Ca nohuanton notohuaroꞌ naꞌaponaꞌ. Naporahuaton chinotërinacoso pëiꞌ, inapita yaꞌhuëpiso huáncana acoarahuë.

Oseas 2:18

Naporo tahuëriꞌsa nanihuachin, israiroꞌsa catahuacaꞌhuaso marëꞌ tanan maꞌsharoꞌsarëꞌco anoyatarahuë. Inairaroꞌsaꞌ, yaꞌhuanoꞌsaꞌ, inapitarëꞌconta inapoarahuë. Ama piyapinëhuëpita maꞌsha onpotacaiso marëhuëꞌ napoarahuë. Pëꞌchinan, sahuëni, inapitanta co huachi niahuëcaiso marëꞌ Israiro noꞌpaquë ohuaraponahuëꞌ. Napohuachina piyapinëhuëpitasoꞌ, sano yaꞌhuëapona huachi,” itërin.

Miqueas 4:2

Notohuaroꞌ nisha nisha piyapiꞌsa huëcapona pochin: “Huëco pantatëhua Sion motopiquë Sinioro chinotahuaꞌ. Inaquë pëinën yaꞌhuërin niꞌton, yaꞌipi israiroꞌsari chinotërin. Inasoꞌ nanamën aꞌchintarinpoaꞌ. Onpopinsona nanpicasoꞌ, anitotarinpoaꞌ,” tosapi. Ninapotatonaꞌ, Quirosarinquë paponaꞌ. Inaquë Sinioro nanamën aꞌchinapi niꞌton, paꞌsapi. Inaquë Siniorosoꞌ piyapinënpita nanamën anitotarin.

Mateo 16:17

—Ma noyacha iyasha Yosë catahuarinquën niꞌton, naporan. Napoaton noya cancantëran. Co quëmaora yonquinën quëran nitotëranhuëꞌ. Tata Yosë chachin anitotërinquën. Quëmasoꞌ Conasë huiꞌninquën. Simon itopirinënquënhuëꞌ,

Lucas 24:45

Yosë quiricaquë naporinsopita aꞌchintaantarin. Aꞌchintaton, catahuarin noꞌtëquën yonquicaiso marëꞌ.

Juan 16:33

Nani naꞌcon shaꞌhuitëranquëmaꞌ sano cancantacamaso marëꞌ. Casáchin yonquihuatamaco, sano cancantaramaꞌ. Co paꞌyanaramahuëꞌ. Piyapiꞌsaꞌ aparisitopirinënquëmahuëꞌ, catahuaranquëmaꞌ niꞌton, chiníquën cancantocoꞌ. Yaꞌipi isoroꞌpaquë co noyahuëꞌ nipisopita nani minsëarahuë, itërincoi Quisoso.

Juan 6:45

Pënëntonaꞌpiroꞌsaꞌ iráca ninshitopi. “Yaꞌipi piyapiꞌsaꞌ Yosëri aꞌchintarin,” topi, ninshitatonaꞌ. Tatahuë natanatomaꞌ natëhuatamaꞌ, imasaramaco.

Hechos 2:39

Yosë nohuanton, Ispirito Santo aꞌpatimarinpoaꞌ. Canpitantaꞌ yaꞌcoancantarinquëmaꞌ. Huiꞌnamapitantaꞌ yaꞌcoancantarin. Aꞌnaquëontaꞌ aquë yaꞌhuëpirinahuëꞌ, Yosë nohuanton, imasapi. Imapachinaꞌ, Ispirito Santori yaꞌcoancantarin inahuantaꞌ, itërin.

Romanos 14:17

Yosë noya huaꞌanëntërinpoaꞌ. Ina imapatëhuaꞌ, noya nisarëhuaꞌ. Asanocancanarinpoaꞌ niꞌton, co ninoꞌhuicasoꞌ yaꞌhuërinhuëꞌ. Yosësoꞌ, caꞌnëhuasoꞌ, oꞌorëhuasoꞌ, inapita co onpopinchin yonquirinhuëꞌ. Ispirito Santo catahuarinpoaꞌ noya cancantahuasoꞌ. Catahuahuachinpoaꞌ, capa cancantarihuaꞌ.

Romanos 15:13

Yosëíchin tëhuënchachin catahuarinpoaꞌ chiníquën cancantacasoꞌ. Canpitantaꞌ catahuainquëmaꞌ nóya cancantacamaso marëꞌ. Asanocancainquëmaꞌ. Inasáchin yonquihuatamaꞌ, catahuarinquëmaꞌ. Ispirito Santo yaꞌipi nanitaparin. Catahuahuachinquëmaꞌ, chini chiníquën cancantatomaꞌ, noya ninaramaꞌ.

Romanos 5:1

“Sinioro Quisocristoíchin nichaꞌësarinpoaꞌ,” taꞌtëhuaꞌ, imarëhuaꞌ. Oshanënpoaꞌ inquitërinpoaꞌ niꞌton, Yosë noya niꞌninpoaꞌ. Co inimiconënpita pochin niꞌninpoahuëꞌ.

1 Corintios 2:10

Imarëhuasopitaso nipirinhuëꞌ, nitotërëhuaꞌ. Yosë nohuanton, Ispirito Santo anitotërinpoaꞌ. Yaꞌipi Yosë yonquirinsopita Ispirito Santo nitotërin.

Gálatas 5:22

Nipirinhuëꞌ, Ispirito Santo natëhuatëhuaꞌ, catahuarinpoaꞌ ninosorocasoꞌ. Catahuahuachinpoaꞌ, Yosë nohuitatëhuaꞌ, capa cancantarihuaꞌ. “Yosë noya niꞌsarinco,” taꞌtëhuaꞌ, sano cancantarihuaꞌ niꞌton, noya ninicatëhuaꞌ yaꞌhuarihuaꞌ. Piyapiꞌsaꞌ noꞌhuipirinpoahuëntaꞌ, co yanoꞌhuirihuahuëꞌ. Maꞌsha onpohuatëhuantaꞌ, ahuantarihuaꞌ. Nosoroatëhuaꞌ, nóya nontarihuaꞌ. Ispirito Santo catahuahuachinpoaꞌ, noya nicarihuaꞌ. Noꞌtëquën nontarihuaꞌ; co piꞌpisha tërantaꞌ nonpintarihuahuëꞌ.

Efesios 4:21

Inasoꞌ noꞌtëquën anitotërinpoaꞌ. Nanamën nani natanamaꞌ.

Filipenses 4:7

Apira apira Yosë nontohuatamaꞌ, asanocancanarinquëmaꞌ. Co imapisopitasohuëꞌ nipirinhuëꞌ co sano cancantopihuëꞌ. Maꞌsha onpohuachinara, aꞌnaroáchin paꞌyanpi. Canpoaso nipirinhuëꞌ Quisocristo imarëhuaꞌ niꞌton, ina yonquiatëhuaꞌ, sano cancantarihuaꞌ.

1 Tesalonicenses 4:9

Imaramasopita capini noya ninosorocoꞌ. Nani nitotëramaꞌ niꞌton, co aquëtëꞌ shaꞌhuitaꞌhuanquëmasoꞌ yaꞌhuërinhuëꞌ. Yosë chachin cancanëmaquë anitotërinquëmaꞌ ninosorocamasoꞌ.

Hebreos 8:10

Ina quëran itantarin: “Tahuëri nanihuachin, nasha quëran anoyataantarahuë. Naporoꞌ anoyacancantarahuë noya yonquicaiso marëꞌ. Nasha cancan quëtarahuë ca pochin cancantacaiso marëꞌ. Casáchin chinotarinaco niꞌton, noya aꞌpaiarahuë. Ca pochin cancantatonaꞌ, piyapinëhuëpita chachin nisapi.

Hebreos 8:11

Iráca aꞌnaya aꞌnaya yanohuitohuachinacora, aꞌnapitari aꞌchintopi. ‘Yosë nohuitocoꞌ,’ itopirinahuëꞌ, co yaꞌipi nanamëhuë nitochátërapihuëꞌ. Aꞌna tahuëriso nipirinhuëꞌ nitotapi. Nasha cancan yaꞌhuëtohuachinaꞌ, cancanëna quëran chachin nohuitarinaco. Insopita tërantaꞌ nasha quëran anoyatërahuëso imapachinaꞌ, nohuitarinaco. Huaꞌanoꞌsahuë nipon, topinan piyapiꞌsahuë nipon nohuantohuachinaꞌ, nohuitarinaco.

1 Juan 2:20

Canpitaso nipirinhuëꞌ imaramaꞌ. Quisocristo nohuanton, Ispirito Santo yaꞌcoancantërinquëmaꞌ. Napoaton noꞌtëquën yonquiramaꞌ.

1 Juan 2:27

Canpitaso nipirinhuëꞌ Ispirito Santo yaꞌhuëtërinquëmaꞌ. Quisocristo imaramaꞌ niꞌton, ina nohuanton, yaꞌcoancantërinquëmaꞌ. Nani tahuëri aꞌchintarinquëmaꞌ. Cancanëmaquë Yosë nanamën aꞌchintarinquëmaꞌ. Co onporontaꞌ nonpintërinquëmahuëꞌ. Noꞌtëquën aꞌchintërinquëmaꞌ niꞌton, co aꞌnapita aꞌchintinquëmasoꞌ yaꞌhuërinhuëꞌ. Ina natëhuatamaꞌ, noꞌtëquën yonquiaramaꞌ. Shaꞌhuitërinquëmaso pochachin Quisocristo imamiatocoꞌ.