Isaías 54:1 - Chayahuita (Shahui)

¹ Quirosarin ninanoquë yaꞌhuëramasopitasoꞌ, sanapi co huaꞌhuanaꞌpihuë pochin nipiramahuëꞌ, capa cancantatomaꞌ, noncarocoꞌ. Capa cancantatoma cantacoꞌ. Co huaitoma iquin natanpiramahuëꞌ, Sinioro chachin naporin: “Aꞌpopiso sanapi, soꞌyahuanoꞌsa quëran, naꞌcon naꞌcon huaꞌhuinpita yaꞌhuëtapon,” tënin.

Isaías 54:1 ပူးပေါင်းရင်းမြစ်များ

Génesis 21:6

Naporoꞌ Sara yonquirin: “Yosë catahuarinco niꞌton, capa cancantato, tëhuarahuë. Aꞌnapitantaꞌ, huaꞌhuanahuëso nitotohuachinaꞌ, yaꞌipiya quëran capa cancantatona tëhuaponaꞌ.

Isaías 44:23

Piꞌiroꞌtëꞌ, quëmanta piyapi pochin nicaton cantaquëꞌ. Sinioro naporinso yonquiaton cantaquëꞌ. Capa cancantaton, inapoquëꞌ. Noꞌpaꞌ acoporonta piyapi pochin nicaton, “yai, yai,” charaꞌin. Motopiroꞌsaꞌ, tananoꞌsaꞌ, yaꞌipi nararoꞌsaꞌ, canpitanta capa cancantocoꞌ. Nichaꞌësahuatonpoaꞌ, Sinioro chiníquën nanantërinsoꞌ aꞌnotërinpoaꞌ.

Isaías 49:13

Piꞌiroꞌtëquë yaꞌhuëpisopita, capa cancanchinaꞌ. Capa cancantatonaꞌ: ‘yai,’ charaꞌinaꞌ. Isoroꞌpaquëntaꞌ, inapochachin capa cancanchinaꞌ. Motopiroꞌsa quëran huarëꞌ piyapiꞌsa pochin capa cancantatonaꞌ, ‘yai,’ charaꞌinaꞌ. Sinioro piyapinënpita parisitapisoꞌ, inari noya acoantarin. Nosoroaton napotarin niꞌton, ina pochin nicoꞌ,” itërin.

Isaías 49:19

Canpitaso noꞌpanëma tapimiatopi. Inapotopirinahuëꞌ, notohuaro naꞌasarama niꞌton, noꞌpanëma pahuan pahuantaponquëmaꞌ. Ninanonëma ataꞌhuantopisopitasoꞌ, nani áquë huëshiramaꞌ.

Isaías 49:20

Aꞌnaquën yaꞌhuëhuanoꞌsa quëpapi niꞌton, ayatatë pochin nitopiranhuëꞌ, huënantarahuatonaꞌ, quëmaora chachin shaꞌhuitaponën: ‘Iso noꞌpanënpoa co onpopinchin pancanayahuëꞌ. Onpopinquë tërantaꞌ, yaꞌhuëcaꞌhuaiso marëꞌ acocoi,’ itaponën.

Zacarías 9:9

Sinioro chachin naporin: “Sion motopiaꞌhuaquë yaꞌhuëramasopita, capa cancantomiatocoꞌ. Quirosarinquë yaꞌhuëramasopitantaꞌ, capa cancantatoma cantacoꞌ. Niꞌcoꞌ. Copirnonëma huëꞌsarin. Inaso noyasáchin ninin. Yaꞌipi inimicoroꞌsa minsërin. Ina niponahuëꞌ, topinan piyapi pochin mora huiꞌnapishinquë yaꞌmitëahuaton, huëꞌsarin.

Gálatas 4:27

Iráca Yosë quiricanënquë ninshitaton, naporin: “Co huaꞌhuanaꞌpinquënhuëꞌ niponahuëꞌ, nóya cancantëquëꞌ. Co huaꞌhuanaton iquitaponahuëꞌ, capa cancantëquëꞌ. Aꞌnaꞌton soꞌyaton, huaꞌhuanin. Quëmaso nipirinhuëꞌ, naꞌcon naꞌcon amiparinpita yaꞌhuëtarinquën. Ina marëꞌ capa cancantëquëꞌ,” itërin.

1 Samuel 2:5

Aꞌnaquënsoꞌ, huaꞌhuayátërahuë cosharohuanpi. Napoaton, pëꞌsotai huarëꞌ coshatopi. Inapopirinahuë iporasoꞌ pahuantopi niꞌton, piꞌpian tëranta capacaiso marëꞌ patrohuanpi. Aꞌnaquënso tanarápirinahuëꞌ, iporaso noyá coshatopi. Co huaꞌhuanaꞌpihuë sanapintaꞌ, canchisë huarëꞌ huaꞌhuanpitërarin. Naꞌa huaꞌhuanaꞌpiso nipirinhuëꞌ, co huachi huaꞌhuanatonhuëꞌ, copi tënin.