Isaías 52:12 - Chayahuita (Shahui)

¹² Napoaponahuëꞌ yapipihuatamaꞌ, co manorahuatoma pipipomahuëꞌ. Co taꞌarëso pochin nisaramahuëꞌ. Sinioro chinotërëhuaso chachin, yaꞌipi parti paꞌnamaquë noya aꞌpaiarinquëmaꞌ.

Isaías 52:12 ပူးပေါင်းရင်းမြစ်များ

Éxodo 12:33

Iquipitoroꞌsantaꞌ: “Yaꞌipicoi chiminapoi nimara,” taꞌtonaꞌ, israiroꞌsa amanorapi.

Éxodo 12:39

Iquipitoroꞌsari yaꞌhuëpi quëran pipicaisoꞌ amanotopi. Napoaton, co caracaiso tëranta anpiaponaraihuëꞌ, pipipi. Napoaton pan co ahuëpocatopinanhuë nicacaiso marëꞌ tapapisoꞌ mapi. Masahuatonaꞌ, huancopi anpipi huachi.

Éxodo 14:8

Sinioro nohuanton copirno co natantochináchinhuëꞌ cancantaton, israiroꞌsa imasarin. Chiníquën nanantatona pipipisoꞌ nani nicaponahuëꞌ, imasarin.

Isaías 28:16

Napoaton Sinioro naporin: “Niꞌquëꞌ. Sionquë aꞌnara naꞌpi acoarahuë. Noyá huayonpinan nisahuaton, paꞌpi paꞌton. Inari pëi achiniarin. Ina, pëi simintonën pochin nisarin. Insosona natëhuachinco, co tëꞌhuarëꞌna yaꞌhuëaponhuëꞌ.

Isaías 42:16

Somarayaroꞌsanta ira co nohuitopisohuëꞌ, quëpatarahuë. Inapita marëꞌ tashinantërinsoꞌ, tahuëriya pochin atarantarahuë. Naꞌpiro iraroꞌsantaꞌ, siminto ira pochin atarantarahuë. Onpopionta inapochin acotarahuë.

Isaías 45:2

“Intohuaso paꞌpatan, ca quëchitërapo. Motopiroꞌsanta canon atarantarahuë. Panca yaꞌcoanaroꞌsa shaꞌpi huaꞌna quëran nipirinahuëꞌ, cari paꞌquiarahuë. Huaꞌnananoꞌsa quëran paꞌshintopirinahuë tërantaꞌ, opa opantarahuë.

Isaías 49:10

Co huachi tanaponahuëꞌ. Co huachi yamoroaponahuëꞌ. Co piꞌiri tëranta piꞌcaton aparisitaponhuëꞌ. Cari nosoroato insëchinsona pacacaisoꞌ, aꞌnotapo. Huinanoꞌsa yaꞌhuërinquë cari quëpapo.

Isaías 49:11

Motopiroꞌsataquëchin ira acoarahuë. Iraroꞌsanta yaꞌhuërinsoꞌ, noya noya acoarahuë.

Isaías 58:8

Napohuatamaꞌ, noya noya yaꞌhuëarama huachi. Tahuërihuachina piꞌi aꞌpininso pochin nicapon. Nisha nisha maꞌsha onporamasopitantaꞌ, co shia noyatarinhuëꞌ. Naporoꞌ noyasáchin ninamasoꞌ, quëchitaton quëpaatë pochin nitarinquëmaꞌ. Huënaratërahuësonta imaatë pochin nitarinquëmaꞌ.

Miqueas 2:13

Cari chachin quëchitato inapita quëpararahuë. Inapitasoꞌ natëponaco huachi. Paꞌpachinaꞌ, ninano yaꞌcoanataquëchin pipiponaꞌ. Caso huaꞌanënaco niꞌto, Yosënënaco,” tënin.

Josué 4:11

Naní quëran pëntonpachinara, corto huaꞌanoꞌsanta pëntonpi huachi. Siniororëꞌ anoyatopiso caposonën, pitënpi quëran pëntonpi. Nani pëntonahuatona naquëranchin quëchitaantapi.

Jueces 4:14

Naporoꞌ Tiporari Paraco itapon: —Pashi tëquë huachi. Ipora mini Sinioro catahuararinquën. Sisara sontaronënpitarë chachin minsëcamaso marëꞌ napotarinquën. Sinioro chachin quëchitaton quëma sontaronënpita maꞌsona nicacaisoꞌ anitotarin, itërin. Naporoꞌ Paracosoꞌ, Taporo motopi quëran nohuaramarin. Shonca huaranca sontaronënpitarë chachin oꞌmarin.