Isaías 5:7 - Chayahuita (Shahui)

⁷ Israiroꞌsaꞌ, Cota huënton israiroꞌsanpoaꞌ, canpoasoꞌ, Sinioro yaꞌipi nanitaparinsoꞌ oparonën pochin ninëhuaꞌ. Napoaton: “Inapitasoꞌ, pënëntërahuësoꞌ natëtona noya nicacaiso yaꞌhuërin,” topirinhuë Siniorosoꞌ. Nitëpacasoráchin tëhuënchinsoꞌ paꞌyatërëhuaꞌ. Noya nicacasoꞌ ninapirinhuëꞌ, maꞌsha nionpotatëhua nitësharárëhuaꞌ.

Isaías 5:7 ပူးပေါင်းရင်းမြစ်များ

Génesis 4:10

Napotohuachina, Siniorori itapon: —¿Onpoatonta naporan? Iyaya tëpaton, paꞌpi co noyahuëꞌ ninan. Huënainën aꞌpatëran niꞌton, co huachi noya yaꞌhuëcamaso marëhuëꞌ shaꞌhuitaranquën.

2 Samuel 7:10

Naporahuaton, canpita yaꞌhuëcamaso marëꞌ noꞌpaꞌ taparahuë. Inaquë yaꞌhuëcamaso marëꞌ acoranquëmaꞌ. Isëquësoꞌ, co insonta apiponquëmahuëꞌ. Co noyahuëꞌ nipisopita co aparisitaponquëmahuëꞌ. Shimashonëmapitasoꞌ iso Canaan noꞌpaquë yaꞌnan yaꞌhuëaponaꞌ, aparisitopi. Canpitaso ipora co huachi inapotarinënquëmahuëꞌ.

Salmos 80:15

Quëmaora chachin shacatë pochin nitërancoi. Quëma chachin aꞌpairancoi.

Éxodo 3:7

Napoaponahuëꞌ, Yosëri aquëtë chachin shaꞌhuitaantarin: —Piyapinëhuëpita israiroꞌsa itopisoꞌ, Iquipitoroꞌsari chiníquën asacatatona aparisitomiatapi. Sacato huaꞌanoꞌsari, ahuëanaquëranchin asacatapi. Napoaton catahuaꞌhuaso marëꞌ chiníquën nontërinaco. Ina natanato, inapita nichaꞌëcaꞌhuaso marëꞌ oꞌmarahuë. Iquipitoroꞌsari huaꞌanëntopirinahuëꞌ, ocoirahuato panca noꞌpaꞌ nininquë quëparahuë. Inaquësoꞌ, co manta pahuaninhuëꞌ. Iporasoꞌ inaquë: Cananoꞌsaꞌ, itiroꞌsaꞌ, amororoꞌsaꞌ, huirisëroꞌsaꞌ, iporoꞌsaꞌ, quiposoroꞌsaꞌ, inapita yaꞌhuërapi. Ina huëntonoꞌsasoꞌ, co chinotërinacohuëꞌ.

Isaías 1:21

Naquëranchin Sinioro pënëninquëmasoꞌ natancoꞌ: “Iráca Quirosarinquë yaꞌhuëpisopita casáchin cancantërinaco. ¡Iporaso nipirinhuëꞌ, monshihuantë sanapi pochin cancantëramaꞌ! Iracasoꞌ, yaꞌipi inaquë yaꞌhuëpisopita noyasáchin nipi. Noꞌtëquënáchin yonquipi. Inapopirinahuëꞌ, iporasoꞌ, tëpatoroꞌsaráchin pochin yaꞌhuëramaꞌ.

Isaías 46:12

Canpitasoꞌ, co natantochináchinhuëꞌ cancantëramaꞌ. Napoapomarahuëꞌ, noya natancoꞌ. Canpitaso naporamaꞌ: ‘Co nimara aꞌnaroáchin Yosë nichaꞌësarinpoahuëꞌ,’ tënamaꞌ. Napopiramahuëꞌ, co huaꞌquiya quëranhuëꞌ, nichaꞌëcaꞌhuanquëmaso marëꞌ maꞌsha nisarahuë. Co huaꞌquiya quëranhuëꞌ, nichaꞌësaranquëmaꞌ. Quirosarinquë yaꞌhuëpisopita cari nichaꞌësarahuë. Yaꞌipi Cota huëntonquë yaꞌhuëpisopitantaꞌ, napotarahuë. Israiro noꞌpaquë yaꞌhuëpisopita noya noya yaꞌnorahuësoꞌ, aꞌnotarahuë,” tënin.

Isaías 5:2

Noꞌpaꞌ ohuërërahuaton, naꞌpiranënpita inquitërin. Noya noya oparoꞌsa paꞌhuëquën huayonaton, apitërin. Imin huáncana tori acorin. Nanpinta toꞌpoitacaso marëꞌ naꞌpi quëran nitërin. ‘Cashi cashin opa nitapon,’ taꞌton, noya ancantaton ninarin. Napoaponahuëꞌ, áin opasáchin nitërin.

Miqueas 6:8

Napopiramahuëꞌ, co inapita Siniorosoꞌ nataninquëmahuëꞌ. Nani inaso maꞌsona nicacasoꞌ shaꞌhuitërinpoaꞌ. Piyapiꞌsa nosoroatëhua paꞌpoyacaso yaꞌhuërin. Maꞌsona nicacasoꞌ shaꞌhuihuatëra, ananicaso yaꞌhuërin. Naporahuaton: “Caora co nanitërahuë noya nicaꞌhuasoꞌ,” taꞌtëhuaꞌ, Sinioroíchin natëcaso yaꞌhuërin.

Habacuc 1:3

Piyapiꞌsa maꞌsha onpotatonacoi aparisitarinacoi. ¡Catahuacoi huachi ama napotaꞌinacoisohuëꞌ! Naꞌcon maꞌsha onpotatonacoi, yaataꞌhuantërinacoi. Piyapiꞌsa nanan yaꞌhuëtatona coisëroꞌsaquë niquëparápi.

Mateo 23:23

Canpitaso nonpintënquëma niꞌton, ¡maꞌhuantacha nisarama paya! ‘Nani maꞌsha quëran, diesmo Yosë quëtacasoꞌ yaꞌhuërin,’ itërinpoaꞌ Moisësë. Ina natëpiramahuëꞌ, nonpintënquëmaꞌ canpitasoꞌ. Napoaton maꞌsha shaꞌpatamara, piꞌpian quëtëramaꞌ. Yaꞌipi cosharo apimotacaso marëꞌ shaꞌnamaꞌ quëran huarëꞌ diesmo quëtëramaꞌ. Inasoꞌ noya nipirinhuëꞌ, Yosë naꞌcon naꞌcon nohuantërinsosoꞌ naniantëramaꞌ. Co noꞌtëquën nonamahuëꞌ. Co saꞌahuaroꞌsaꞌ nosororamahuëꞌ. Naporahuaton, co cancanëma quëran huarëꞌ Yosë natëramahuëꞌ. Ina marëꞌ anaꞌintarinquëmaꞌ.

Lucas 18:7

¡Yosëso nipirinhuëꞌ nóya niꞌton, huayoninsopita naꞌcon catahuarin! Aꞌnapitari aparisitohuachinaꞌ, Yosëri noꞌtëquën anaꞌintarin. Tahuërirë chachin, tashirë chachin ina nontopi niꞌton, catahuaarin. Co naniantarinhuëꞌ.

Juan 15:2

Aꞌna sëꞌpaquën co nitohuachinahuëꞌ, nishitëtërin. Aꞌnaquënso nipirinhuëꞌ piꞌpian nitërin. Ina sëꞌparaꞌhuainpita piꞌpian niꞌquitërin naꞌcon naꞌcon nitacaso marëꞌ. Co niꞌquitohuatërahuëꞌ, co noya nitërinhuëꞌ.

Santiago 5:4

Piyapinëmapita nonpintëramaꞌ. Iminëmaquë asacatopiramahuëꞌ, co noꞌtëquën pahuërëtëramahuëꞌ. Inapitasoꞌ Yosëquë shaꞌhuirapirinënquëmaꞌ. Shanëmapita nitërinsoꞌ mapirinahuëꞌ, co pahuërëtëramahuëꞌ. Inapohuatamaꞌ, Yosë nitotarin. Inasoꞌ chini chiníquën nanantërin niꞌton, noꞌtëquën iꞌhuërëtarinquëmaꞌ.