Isaías 5:6 - Chayahuita (Shahui)

⁶ Inapotahuato patarahuë. Co incari pacarapiponhuëꞌ. Co incari yaquisëꞌpaponhuëꞌ. Nahuanoꞌsaꞌ, pacatoroꞌ, inapitari imotapon. Chitoronta camaihuato, co inaquë oꞌnanaponhuëꞌ,” tënin nosororahuësoꞌ.

Isaías 5:6 ပူးပေါင်းရင်းမြစ်များ

1 Reyes 17:1

Carata parti, Tisipi ninanoquë aꞌnara pënëntonaꞌpi yaꞌhuërin. Inasoꞌ, Iniasë itopi. Aꞌna tahuëri inasoꞌ, Acapo paaparahuaton itapon: “Sinioro chinotërëhuaso yaꞌhuërin niꞌton, caso inasáchin natërahuë. Ina camairinco niꞌton, noꞌtëquën shaꞌhuitaranquën. Ipora quëran huarëꞌ co huachi oꞌnanaponhuëꞌ. Co poroncayo tëranta yaꞌhuëaponhuëꞌ. Ca shaꞌhuiantaꞌhuarëꞌ yaꞌhuëantapon. Co Sinioro natëtonhuëꞌ oshahuananso marëꞌ ina pochin anaꞌintarinquën,” itërin.

1 Reyes 8:35

Aꞌna tahuëri israiroꞌsa co natëtënënhuëꞌ, oshahuaantapi. Inapopiso marëꞌ quëma nohuanton co huachi oꞌnan yaꞌhuëarinhuëꞌ. Napohuachina: ‘Co noyahuëꞌ ninëhuaso marëꞌ Yosë anaꞌintarinpoaꞌ,’ taꞌtonaꞌ, chinotaantarinën. Oshanëna aꞌporahuatona pëinën parti notëtopi quëran nontaantarinën. Inapotohuachinën, yaꞌhuëran quëran natanahuaton, piyapinënpita oshanën inquitëquëꞌ. Nanan anoyatahuaton aꞌchintëquë onpopinsona imainënsoꞌ. Naporahuaton quëma nohuanton oꞌnantaꞌin. Ama taquiatonaraihuëꞌ, noꞌpaꞌ huaꞌanëntopiso niyaꞌhuërëtápaiso marëꞌ.

Isaías 32:10

Iporaso mini noya yaꞌhuëapiramahuëꞌ, aꞌna piꞌi naꞌcon quëran pochin, paꞌyanatoma ropatapomaꞌ. Cosharoꞌ, oꞌoiꞌ, inapita pahuantaponquëma niꞌton, napoaramaꞌ.

Isaías 49:19

Canpitaso noꞌpanëma tapimiatopi. Inapotopirinahuëꞌ, notohuaro naꞌasarama niꞌton, noꞌpanëma pahuan pahuantaponquëmaꞌ. Ninanonëma ataꞌhuantopisopitasoꞌ, nani áquë huëshiramaꞌ.

Isaías 55:13

Sarsaroꞌsa yaꞌhuërënamën, pino nararoꞌsa aꞌshinapon. Ihuatatëroꞌsa yaꞌhuërënamën, arayan nararoꞌsa aꞌshinapon. Inapohuato: ‘¡Ma noyacha Sinioroso paya!’ tëcaponaꞌ. Ina pochin acorahuësoꞌ, yaꞌhuëmiatapon. Co incari tëranta ataꞌhuantaponhuëꞌ,” tënin Sinioro.

Isaías 7:19

Canquihuachina, motopi casonantëroꞌsaquë, yaꞌhuëintaponaꞌ. Natëtëanaroꞌsaquë, shihuarinoroꞌsaquë, ohuacaroꞌsa oꞌorinquë, inaquëpita yaꞌhuëintaponaꞌ.

Jeremías 14:1

Piꞌisárinso marëꞌ Sinioro itaponco:

Jeremías 14:22

Inpioroꞌsasoꞌ, nisha nisha mamanshiroꞌsa moshapi. Co inapita nohuanton oꞌnaninhuëꞌ. ¡Co piꞌiroꞌtë tëranta nohuanton oꞌnaninhuëꞌ! Quëma Sinioro Yosënëhuëinquën niꞌton, oꞌnan aꞌpaimaran. Quëma nohuanton yaꞌipi inapita yaꞌhuërin. Napoaton quëmasáchin ninarainquën, itërahuë.

Oseas 3:4

Inapochachin israiroꞌsantaꞌ, huaꞌqui co copirnohuanhuëꞌ nicaponaꞌ. Co maꞌsha huaꞌan tëranta yaꞌhuëtaponahuëꞌ. Chinotacaiso marëntaꞌ, co maꞌsha tëpaponahuëꞌ. Naꞌpiraꞌhuaroꞌsa Yosë nohuantërinsoꞌ nitotacaiso marëntaꞌ, co huachi yaꞌhuëaponhuëꞌ. Co huachi aꞌnaya tëranta corto huaꞌan yaꞌhuëaponhuëꞌ. Pëinënaquë mamanshiroꞌsa yaꞌhuëtopisopitantaꞌ, capa nisarin.

Joel 1:7

Yaꞌipi oparonënpoapita pëꞌyapi. Yaꞌipi iquiraroꞌsanta pëꞌyapi. Shaꞌhuëtën quëran huarëꞌ capatonaꞌ, ironantërin. Sëꞌpainpitantaꞌ, huirinantaquë huarëꞌ aꞌporin.

Amós 4:7

Naquëranchin Sinioro taantarin: “Ca nohuanton oꞌnaonta pahuantërinquëmaꞌ. Shaꞌtëramasoꞌ nanitacaso marëꞌ cara yoqui pahuanapirinhuëꞌ, aꞌnaquën ninanonëmaquë aoꞌnanahuë. Aꞌnaquëso nipirinhuëꞌ, co oꞌnaninhuëꞌ. Aꞌna iminquësoꞌ oꞌnanin. Aꞌnaquëso nipirinhuëꞌ, oꞌnan pahuanin quëran noꞌpaꞌ yanirin.

Lucas 21:24

Inimicoroꞌsaꞌ huëcatonaꞌ, naꞌa piyapiꞌsaꞌ sahuëniquë tëparapi. Nisha nisha sontaroꞌsari yaꞌhuëpiquë quëparapi asacatacaiso marëꞌ. Nisha piyapiꞌsaꞌ Quirosarinquë yaꞌconahuatonaꞌ, camaitapi. Huaꞌquiꞌ inaquë yaꞌhuaponaꞌ. Tahuërinën nanihuachina, Yosë nohuanton, pipiapi.

Apocalipsis 11:6

Iráca pënëntonaꞌpiroꞌsaꞌ nani maꞌsha nipi piyapiꞌsaꞌ ayonquicaiso marëꞌ. Inapochachin catoyaꞌpi Yosëri aꞌparinsoꞌ, nani maꞌsha nanitapaapi. Yosë nontahuachinaꞌ, co oꞌnanaponhuëꞌ. Inapotatonaꞌ, pënëntáponaꞌ. Tëquëiontaꞌ nontahuachinaꞌ, huënaiꞌ taranapon. Ina quëran Yosë nohuanton, nisha nisha canioroꞌsaꞌ acorapi Yosë yonquicaiso marëꞌ.