Isaías 5:2 - Chayahuita (Shahui)

² Noꞌpaꞌ ohuërërahuaton, naꞌpiranënpita inquitërin. Noya noya oparoꞌsa paꞌhuëquën huayonaton, apitërin. Imin huáncana tori acorin. Nanpinta toꞌpoitacaso marëꞌ naꞌpi quëran nitërin. ‘Cashi cashin opa nitapon,’ taꞌton, noya ancantaton ninarin. Napoaponahuëꞌ, áin opasáchin nitërin.

Isaías 5:2 ပူးပေါင်းရင်းမြစ်များ

2 Samuel 7:10

Naporahuaton, canpita yaꞌhuëcamaso marëꞌ noꞌpaꞌ taparahuë. Inaquë yaꞌhuëcamaso marëꞌ acoranquëmaꞌ. Isëquësoꞌ, co insonta apiponquëmahuëꞌ. Co noyahuëꞌ nipisopita co aparisitaponquëmahuëꞌ. Shimashonëmapitasoꞌ iso Canaan noꞌpaquë yaꞌnan yaꞌhuëaponaꞌ, aparisitopi. Canpitaso ipora co huachi inapotarinënquëmahuëꞌ.

Salmos 80:8

Opa paꞌhuë ocoirëso pochin piyapinëpitacoi Iquipito quëran ocoirancoi. Inpio nacionoꞌsaquë yaꞌhuëpisopita aꞌparahuaton, noꞌpanënaquë shacatë pochin nitërancoi.

Salmos 80:9

Noꞌpaꞌ taparoatë shaꞌtërëso pochin nitohuatancoira, itëhuanatë pochin nisahuatoi, aꞌshinai. Inaporahuatoi yaꞌipi iso noꞌpaꞌ yaꞌhuëtërai.

Éxodo 33:16

Quëma chachin caꞌtanpatancoi, yaꞌipi iso parti yaꞌhuëpisopita, nohuitarinacoi. Piyapinënpitacoi nicatoi nishatëraisonta nitotapi. Inapotohuatancoi, naporo huarëꞌ co aꞌnapita nacionoꞌsa pochin nisaraihuëꞌ, itërin.

Isaías 1:8

Quirosarin ninanoáchin quëparitërin. Oparo aꞌpaicaiso marëꞌ ina huancánachin pëi acopiso pochin quëparitërin. Pipinoroꞌ huáncana naꞌicaiso marëꞌ pëi acopiso pochin ninin. Inimicoroꞌsari ninano tancapitërinso pochin inaora quëparitërin,” tënin Sinioro.

Isaías 5:7

Israiroꞌsaꞌ, Cota huënton israiroꞌsanpoaꞌ, canpoasoꞌ, Sinioro yaꞌipi nanitaparinsoꞌ oparonën pochin ninëhuaꞌ. Napoaton: “Inapitasoꞌ, pënëntërahuësoꞌ natëtona noya nicacaiso yaꞌhuërin,” topirinhuë Siniorosoꞌ. Nitëpacasoráchin tëhuënchinsoꞌ paꞌyatërëhuaꞌ. Noya nicacasoꞌ ninapirinhuëꞌ, maꞌsha nionpotatëhua nitësharárëhuaꞌ.

Jeremías 2:21

Noya noya opa shaꞌnëso pochin canpitaso acoranquëmaꞌ. Huayonatë shaꞌnëso pochin nitëranquëmaꞌ. Inapotopiranquëmahuëꞌ, canpitaso coꞌchachin nishatëramaꞌ. Napoatoma co huachi onpo nohuitochináchinhuëꞌ ninamaꞌ.

Miqueas 4:8

Quirosarinquë yaꞌhuëpisopitasoꞌ, Sion motopiquë noyá niacorapipi. Inapoaton ohuica aꞌpainaꞌpiroꞌsa torinën pochin ninin. Inaquë chachin canta huënsëato huaꞌanëntarahuë niꞌton, iráca pochachin niantapon,” tënin.

Números 23:9

Inápa natëtëroꞌsa quëran notërahuë. Motopiaꞌhuaroꞌsa quëraonta nocorahuë. Co aꞌnapita piyapiroꞌsa pochinhuëꞌ inahuaso nicatonaꞌ, Yosë marëꞌ nanpicaisoꞌ nohuantopi.

Mateo 21:19

Aquë quëran iquira nara quënanin, ira yonsanquë huanirinsoꞌ. “Inaya tërantaꞌ nitërinsoꞌ maꞌto caꞌi,” taꞌton paꞌpirinhuëꞌ. Naꞌcon monohuanaponahuëꞌ, co mantaꞌ nitërinhuëꞌ. Ina niꞌsahuaton: —Ama huachi iso nara nichinsohuëꞌ, tënin Quisoso. Napohuachina, nara aꞌnaroáchin ahuirin.

Mateo 21:33

Ina quëran itaantarin: “Aꞌnantaꞌ pënënto nanan, aꞌchinchinquëmaꞌ, natancoꞌ. Aꞌna quëmapi pancana imianatërin. Inaquë oparachin shaꞌnin. Nani pairapirahuaton, naꞌpi quëran nanpi ninin opa toꞌpoitonaꞌ huino nicacaiso marëꞌ. Naporahuaton, tori ninin. Inaquë piyapinën yaꞌhuaton nocorarin ama ihuacaiso marëhuëꞌ. Nani tiquihuachina, inpriatoroꞌsaꞌ acorin aꞌpaicaiso marëꞌ. ‘Sacatëramaso marëꞌ patoma nitërinsoꞌ canpitaoranquën marëꞌ macoꞌ. Patomachin cantaꞌ acotoco,’ itërin. Itahuaton, aꞌna parti paꞌnin huachi.

Mateo 21:34

Ina quëran nani nitohuachina, aquë yaꞌhuërin quëran piyapinënpita aꞌparin patoma nitërinsoꞌ maꞌpacaiso marëꞌ.

Marcos 11:13

Aquëran iquira nara quënanin. Naꞌa monohuanin niꞌton: “Inaya tërantaꞌ nitërinsoꞌ caꞌi,” taꞌton, paahuapirinhuëꞌ, co mantaꞌ nitërinhuëꞌ. Monoquënachin quënanconin. Co tahuërinën naniyatërarinhuëꞌ niꞌton, co nitërinhuëꞌ.

Marcos 12:1

Ina quëran Quisosori pënënto nanan shaꞌhuitaantarin: “Aꞌna quëmapi pancana iminaton, oparotërin. Nani pairapirahuaton, naꞌpi quëran nanpi ninin opa toꞌpoitonaꞌ, huino nicacaiso marëꞌ. Naporahuaton, naꞌpi quëran chachin tori ninin. Inaquë piyapinën yaꞌhuaton, nocorarin ama ihuacaiso marëhuëꞌ. Nani tiquihuachina, inpriatoroꞌsaꞌ acorin aꞌpaicaiso marëꞌ. ‘Sacatëramaso marëꞌ nitërinsoꞌ patomachin canpitaora marëꞌ macoꞌ. Patomachin cantaꞌ acotoco,’ itërin. Itahuaton, aꞌna parti paꞌnin.

Marcos 12:2

Nitërinsoꞌ nani cayahuachina, piyapinën aꞌparin patoma nitërinsoꞌ maꞌpacaiso marëꞌ.

Romanos 9:4

Piyapinënpita nicacaiso marëꞌ Yosëri acorin. Israiro shinpita nipi. Iráca quëran huarëꞌ Yosëri nohuantërin niꞌton, huiꞌninpita pochin nicacaiso marëꞌ acorin. Huënaráchin huënaráchin aꞌpintohuachina, shimashonënpitari quënanpi. Iráca chachin piyapinënpita nicacaiso marëꞌ inapitarëꞌ anoyatërin. Naporahuaton, pënëntërinso nanan shaꞌhuitërin. Noya chinotacaiso marëntaꞌ aꞌchintërin. Naꞌcon shaꞌhuitërin nichaꞌëcaso marëꞌ.

1 Corintios 9:7

Niꞌcoꞌ, iyaroꞌsaꞌ. Sontaro yaꞌconpachinara, co cosharonën paꞌanacasoꞌ yaꞌhuërinhuëꞌ. Capacasoꞌ, aꞌmocasoꞌ, inapita topinan quëtopi. Inapochachin opa shaꞌpachina, huaꞌanëni inaora macaton, irorin. Co ina marëꞌ pahuërëtacasoꞌ yaꞌhuërinhuëꞌ. Ohuica pëꞌtahuanaꞌpintaꞌ nohuantohuachina, ohuica shoꞌshoiꞌ shiꞌshiaton, oꞌorin.

Deuteronomio 32:6

¡Co napochitomahuë pora! Napotatomaꞌ, co yonquiramahuë pochin niconamaꞌ. ¡Ina canpitaso nininquëmaꞌ! ¡Huiꞌninpita pochachin aꞌpairinquëmaꞌ! ¡Coꞌta ina acorinquëmaꞌ! ¡Ina nohuanton nacion ocoiramaꞌ!

Jueces 16:4

Aꞌna tahuëri Sansonsoꞌ, aꞌna yaꞌhuërëꞌ sanapi quënaantarin. Inasoꞌ sanapi Tarira itopi. Sorico motopiana itopiquë yaꞌhuërin.