Isaías 49:4 - Chayahuita (Shahui)

⁴ Caso nipirinhuë napopirahuëꞌ: ‘Topinan quëran caso chiníquën sacatato canotomarahuë,’ topirahuë. Napopirahuë Siniorosoꞌ, onpopinsona sacatërahuëso nitotërin. Tëhuënchachin Siniorosoꞌ, chiníquën nanantërin. Chiníquën nanantaton, noꞌtëquën acanararinco.

Isaías 49:4 ပူးပေါင်းရင်းမြစ်များ

1 Reyes 19:10

“Quëmaso Sinioro Yosënquën, yaꞌipi nanitaparan. Napoaton paꞌpi aꞌpitëranquën. Israiroꞌsarëꞌquën anoyatëranso aꞌpopi. Artaronënpitantaꞌ, ohuatopi. Quëma marëꞌ pënëntopisopitantaꞌ, sahuëniquë tëpapi. Casáchin nipirinhuëꞌ, tëpainacoso marëꞌ yonisarinaco,” itërin Iniasëri.

Isaías 35:4

Tëꞌhuanaꞌpiroꞌsanta shaꞌhuitatomaꞌ: “¡Chiníquën cancantocoꞌ! ¡Ama paꞌyancosohuëꞌ! Sinioro oꞌmararin nichaꞌëinquëmaso marëꞌ. Inimiconëmapitasoꞌ, noꞌtëquën iꞌhuërëtarin,” itocoꞌ.

Isaías 40:10

Chiníquën nanantaton oꞌmararin. Yaꞌipi minsërahuaton, piyapinënpita isëquë chachin quëantarin. Nisharoꞌsari huaꞌanëntopirinahuëꞌ, inapita quëran nichaꞌërin.

Isaías 40:27

Israiroꞌsanquëmaꞌ, canpitaso Cacopo shinpitanquëmaꞌ. Canpitaso naporamaꞌ: “¡Sinioroso co huachi tahuërëtërinpoahuëꞌ! Parisitápirëhuahuëꞌ co nonininpoahuëꞌ,” tënamaꞌ. ¡Co ina pochin yonquicamaso yaꞌhuërinhuëꞌ!

Isaías 61:10

¡Sinioro yonquiato, capa cancantërahuë! Inasoꞌ Yosënëhuë niꞌton, acapacancaninco. Nichaꞌërinco niꞌton, naporahuë. Noꞌtëquën yonquinaꞌpi pochin acorinco. Saꞌanaꞌpi yancotë ayancotopiso pochin ninahuë. Nanonta soꞌyacaso marëꞌ nisha nishaquë nitaparinso pochin ninahuë.

Isaías 65:2

Co natantochináchinhuëꞌ cancantopisopita catahuacaꞌhuaso marëꞌ, nani tahuëri imirahuë ihuëtatë pochin nitërahuë. Inahuara nohuantopisoꞌ nicatona pëshonpirinahuëꞌ, inapotërahuë.

Isaías 65:23

Co topinan quëran sacatapihuëꞌ. Huiꞌnahuanpachinarantaꞌ, co topinan quëran huiꞌnahuanaponahuëꞌ. Tahuërinën naniquë huarëꞌ chiminaponaꞌ. Siniorori noya yonquirapirinso shiina niꞌton, napoaponaꞌ. Inahuanta huiꞌnahuaantahuachinaꞌ, ina chachin niantaponaꞌ.

Ezequiel 3:19

Shaꞌhuitopiranhuëꞌ inachachin nisápachinsoꞌ, inasoꞌ oshanën marëꞌ chiminapon. Quëmaso napoaponahuëꞌ, ina chimininsoꞌ, co naꞌintarinquënhuëꞌ.

Mateo 17:17

—¡Maꞌhuantacha ninama paya! Canpitasoꞌ co Yosë natëramahuëꞌ. Co natëtochináchinhuëꞌ cancantëramaꞌ. Nani huaꞌquiꞌ aꞌchintopiranquëmahuëꞌ, ¿onporo huarëtaꞌ yanatëramaco? itahuaton, —Huaꞌhuasha quëshico, itërin Quisosori.

Mateo 23:37

Ina quëran taantarin: “¡Yaꞌipi Quirosarinquë yaꞌhuëramasopita yonquiatënquëmaꞌ, chiníquën sëtërahuë! Naꞌa pënëntonaꞌpiroꞌsaꞌ Yosë aꞌpatërinquëmaꞌ pënëinënquëmaso marëꞌ. Aꞌpapirinhuëꞌ, tëparamaꞌ. Aꞌnaquën naꞌpiquë tëꞌyaratomaꞌ, tëparamaꞌ. Yaꞌipinquëmaꞌ nosoroatënquëmaꞌ, naꞌaroꞌ yacatahuapiranquëmahuëꞌ, co ca tërantaꞌ nohuantëramacohuëꞌ. Atari huaꞌhuin toꞌcohuëtërinso pochin yapaꞌpoyapiranquëmahuëꞌ, co nohuantëramacohuëꞌ.

Lucas 24:26

Cristo parisitacasoꞌ yaꞌhuërin. Nani parisitohuachina, naporo huarëꞌ Yosëꞌpaꞌ noya noya acoarin huachi, itërin Quisosori.

Juan 1:11

Noꞌpanënquë chachin oꞌmapirinhuëꞌ, co piyapinënpitari nohuantopihuëꞌ. Nipirinhuëꞌ,

Romanos 10:21

Israiroꞌsaso nipirinhuëꞌ co yanatëpihuëꞌ. Inapita yonquiaton, Isaiasë quëran taantarin: “Iráca quëran huarëꞌ yacatahuarahuë. Imirahuë ihuëtatë pochin nitato: ‘Huëcoꞌ catahuainquëmaꞌ,’ itopirahuëꞌ, co yanatërinacohuëꞌ. Co natantochináchinhuëꞌ cancantopi, tënin Yosë,” itërin.

2 Corintios 12:15

Napoaton co mantaꞌ maꞌparanquëmahuëꞌ. Noya cancantato, sacatarahuë cosharoꞌ paꞌanaꞌhuaso marëꞌ. Ina quëran parisitaporahuëꞌ, aꞌchintaranquëmaꞌ noya imacamaso marëꞌ. Carimasoꞌ naꞌcon naꞌcon nosoropiranquëmahuëꞌ, canpitasoꞌ co onpopinchin nosororamacohuëꞌ topirahuëꞌ.

2 Corintios 2:15

Quisocristosoꞌ pimóchin nininsoꞌ aꞌpërahuaton, Yosë chinotërin. Ina pimoanahuaninso pochin yaꞌipi parti nanamën aꞌchinai. Aꞌchinpatëira, Yosëri nohuantërinsopita noya natanpi niꞌton, nichaꞌësarin. Co nohuantërinsopitahuëntaꞌ natanpirinahuëꞌ, topinan quëran natanpi niꞌton, parisitopiquë paꞌsapi.

Gálatas 4:11

Noꞌtëquën iyaroꞌsaꞌ aꞌchintopiranquëmahuëꞌ, naniantëramaꞌ nimara, tënahuë. “Topinan quëran aꞌchintërahuë nimara,” taꞌto sëtërahuë.

Filipenses 2:16

Quisocristo nanamën chachin aꞌchintocoꞌ. Ina imapatëhuaꞌ, Yosë nohuitatëhuaꞌ, nanpimiatarihuaꞌ. Ina quëran Quisocristo oꞌmantahuachin, co atapanaramacohuëꞌ. “Parisitaporahuëꞌ, co topinan quëran Yosë nanamën aꞌchintërahuëꞌ, noya imamiatopi,” taꞌto, nóya cancantarahuë huachi.

Hebreos 12:2

Quisocristo naꞌcon yonquiaꞌahuaꞌ. Inasáchin catahuarinpoaꞌ Yosë natëcasoꞌ. Naporahuaton, inasáchin catahuarinpoaꞌ noya noya natëtacasoꞌ. Isoroꞌpaquë oꞌmahuachina, chiníquën parisitërin. Corosëquë parisitohuachina, naꞌcon tëhuapirinahuëꞌ, co ina yonquirinhuëꞌ. “Chiminpato, piyapiꞌsaꞌ nichaꞌësarahuë,” taꞌton, nóya cancantërin. Ina quëran inápaquë panantarahuaton, Yosë inchinanën quëran chachin huënsëarin.