Isaías 49:10 - Chayahuita (Shahui)

¹⁰ Co huachi tanaponahuëꞌ. Co huachi yamoroaponahuëꞌ. Co piꞌiri tëranta piꞌcaton aparisitaponhuëꞌ. Cari nosoroato insëchinsona pacacaisoꞌ, aꞌnotapo. Huinanoꞌsa yaꞌhuërinquë cari quëpapo.

Isaías 49:10 ပူးပေါင်းရင်းမြစ်များ

Isaías 32:2

Aꞌnaya aꞌnaya, ihuan naꞌpitiinan pochin paꞌpoyatapi. Maꞌsha onpocaso tahuëri nipachin, catahuatapi. Yaniroquë sharoꞌsa opotacaiso marëꞌ cashapiso pochin nisapi. Panca natëtë inotëroquë, piꞌi yaꞌcopirinso pochin nisapi.

Isaías 40:11

Huaꞌanëni ohuicanënpita aꞌpairin. Carniroaꞌhuaroꞌsaꞌ, iporahuaton quëparin. Nasha huaipisopita oshaquëran quëpaton aꞌcarin. Ina naporinso pochin canpoantaꞌ, Sinioro noya aꞌpaiarinpoaꞌ,” itocoꞌ.

Isaías 41:17

Popriroꞌsaꞌ, sano piyapiroꞌsaꞌ, inapitaso iꞌsha yonípirinahuëꞌ, co quënanpihuëꞌ. Paꞌpi yamorotonaꞌ, yaniconopirapi. Napopirinahuëꞌ, ca Sinioroco niꞌto, catahuarahuë. Ca Yosënëmaco niꞌto, inapitanta co aꞌpoapohuëꞌ.

Isaías 43:19

Aꞌna huachi nasha nisarahuë. Ipora chachin naporahuësoꞌ niꞌsaramaꞌ. Naquëranchin inotëroquë ira aꞌpatë pochin nisarahuë. Co manta maꞌsha noyatërinquëhuëꞌ, iroꞌsa acoarahuë.

Isaías 52:12

Napoaponahuëꞌ yapipihuatamaꞌ, co manorahuatoma pipipomahuëꞌ. Co taꞌarëso pochin nisaramahuëꞌ. Sinioro chinotërëhuaso chachin, yaꞌipi parti paꞌnamaquë noya aꞌpaiarinquëmaꞌ.

Isaías 54:10

Motopiroꞌsa nacontopirinahuë tërantaꞌ, motopiaꞌhuaroꞌsanta nipaꞌtanpirinahuë tërantaꞌ, nosororanquëmasoꞌ, inachachin nisápon. Noya ninicatëhua yaꞌhuëcaso marëꞌ, nani canpitaroꞌco anoyatërahuë. Naporëhuasoꞌ, co onporo tapiarahuëꞌ. Sinioro nosororinquëmaso naporin,” tënin.

Isaías 54:8

Aꞌnanaya noꞌhuitó tënahuëquë, naꞌpitatë pochin nitëranquëmaꞌ. Napoaporahuëꞌ, co huaꞌqui marëꞌ naporahuëꞌ. Nosoromiatatënquëmaꞌ, yonquiantaranquëmaꞌ,” tënin Sinioro nichaꞌërinquëmasoꞌ.

Isaías 58:11

Carima noꞌtën ira quëpatáponquëmaꞌ. Co piyapi yaꞌhuërinquëhuë niponahuëꞌ, natëaquë huarëꞌ aꞌcaponquëmaꞌ. Ca nohuanton chiníquën nisaramaꞌ. Yancoroꞌ noyá oporapitërëso pochin nisaramaꞌ. Huinan co yanirinsohuë pochin nisaramaꞌ.

Jeremías 31:9

Orarëꞌnachin, naꞌnërëꞌnachin, huëꞌsapi. Cari chiniiꞌ yaꞌhuërinquë quëpaarahuë. Noyá tapapinan ira quëshihuato co iꞌpaponahuëꞌ. Ca mini israiroꞌsa paꞌpina pochin ninahuë. Inapitantaꞌ, paninanëhuë pochin nipi,” tënin.

Ezequiel 34:23

Ca nohuanto piyapinëhuë Tapi itërahuësoꞌ, huënantapon. Inaíchin yaꞌipi ohuicanëhuëpita noya aꞌpaiapon.

Jonás 4:8

Piꞌi pipihuachina Yosësoꞌ: “¡Ipora tahuëri paꞌpi chiníquën piꞌi piꞌcachin!” tënin. Napohuachina, paꞌpi chiníquën piꞌi piꞌcataton Conasë yatëparin. Piꞌi tapinantochináchin ninatanaton yachiminin: —Chiminahuë naporini, noya noya niitonhuëꞌ, tënin noꞌhuitaton.

Mateo 5:6

Tanarëso pochin, yamororëso pochin cancantatomaꞌ, Yosë naꞌcon nohuantocoꞌ. Ina pochin cancantacasoáchin nohuantohuatamaꞌ, noya niꞌsarinquëmaꞌ. Catahuarinquëmaꞌ ina pochin cancantacamaso marëꞌ. Sano cancantaramaꞌ.

Juan 6:35

—Ca inaco. Casoꞌ cosharo pochinco niꞌto, piyapiꞌsaꞌ ananpitomiatarahuë. Imapatamaco, co huachi tanarëso pochin cancantaramahuëꞌ. Natëhuatamaco, co huachi yamororëso pochin cancantaramahuëꞌ. Yosë nohuitohuatamaꞌ, sano cancantaramaꞌ.