Isaías 45:14 - Chayahuita (Shahui)

¹⁴ Naquëranchin Siniorosoꞌ israiroꞌsa nontaton itapon: “Iquipitoquë imin camayoroꞌsa yaꞌhuërinsoꞌ, Itiopiaquë nicatonoꞌsa yaꞌhuërinsoꞌ, Sapaquë yaꞌhuëpisopitanta naporopi mashoráchin nicaponaraihuëꞌ, tëꞌhuataponënquëmaꞌ. Tëꞌhuatatënëmaꞌ, canpitarë anoyataponaꞌ. Inapoatoma canpita piquëran pacacaiso marëꞌ, catinaquëtaramaꞌ. Isonahuatona nosorochináchin nontaponënquëmaꞌ: ‘Canpitasáchin Yosë catahuarinquëmaꞌ. Co aꞌna ina pochin yaꞌhuërinhuëꞌ,’ itarinënquëmaꞌ,” itërin.

Isaías 45:14 ပူးပေါင်းရင်းမြစ်များ

Génesis 27:29

Huaꞌhuayátërahuë piyapiꞌsa camaiquëꞌ. Nacionoꞌsanta tëꞌhuatatënën natëinënquën. Iyaparinpitanta camaiquëꞌ. Tëꞌhuatatënën inapitanta natëinënquën. Noꞌhuitënën co huachi noya yaꞌhuëcamaso marëhuëꞌ shaꞌhuitohuachinën, Yosërinta inapotarin. Inpitasona noya yaꞌhuëcaso marëꞌ shaꞌhuitohuachinën, Yosërinta inapotarin,” itërin.

Éxodo 11:8

Inapotohuachinquëmaꞌ, yaꞌipi catahuarinënquënso huaꞌanoꞌsaꞌ, paapaponaco. Paapatonaco isonahuatona moshaponaco: ‘Paquë huachi. Israiroꞌsanta quëpaquëꞌ,’ itaponaco. Naporo huarëꞌ isëran paꞌsarahuë,” itërin. Noya noꞌhuitahuaton, Moisësë copirno pëinën quëran pipirin.

Isaías 43:3

Caso Sinioroco niꞌto, napoarin. Carima nichaꞌësaranquëmaꞌ. Caso Yosëco noyasáchin ninahuë niꞌton, Israiro chinotërinco. Aꞌnapita huaꞌanëntapirinënquëmahuëꞌ, cari paꞌananquëmaꞌ. Iquipito, Itiopia, Sapa, inapita nacionoꞌsa pahuërë pochin quëtato, paꞌananquëmaꞌ.

Isaías 44:8

Ama tëꞌhuacosohuëꞌ, chiníquën cancantocoꞌ. Coꞌta cari iráca quëran huarëꞌ maꞌsona onpoamasoꞌ nani shaꞌhuitëranquëmaꞌ. Canpitaso nani natanamaco. Casáchin Yosëco. Co aꞌna yosë ca pochin paꞌpoyatonaꞌpi yaꞌhuërinhuëꞌ,” tënin.

Isaías 49:23

Copirnoroꞌsanta huiꞌninpita pochin nitarinquëmaꞌ. Inahua huiꞌninpita sanapi nipisopitantaꞌ, nocomatënquëma asoꞌsoarinquëmaꞌ. Inapitasoꞌ noya nicatënëmaꞌ, moshaponëmaꞌ. Isonpi quëran noꞌpaquë huarëꞌ monshorahuatonaꞌ, canpitasáchin natëinëmasoꞌ anitotarinënquëmaꞌ. Inapoatonaꞌ: ‘Tëhuënchachin Siniorosoꞌ chini chiníquën nanantërin. Naporahuaton inasáchin ninapisopitasoꞌ, co onporonta taparo nisapihuëꞌ,’ tëcaponaꞌ,” tënin.

Isaías 54:3

Inchinan quëran, apancanataramaꞌ. Ahuënan quëraonta inapotaramaꞌ. Canpita quëran pipipisopita naꞌa nacionoꞌsa canaponaꞌ. Ninanoroꞌsa tanahuantapisopitantaꞌ, yaꞌhuëtaantaponaꞌ.

Isaías 55:5

Natanco israiroꞌsanquëmaꞌ. Canpitaso nisha piyapiroꞌsa co nohuitapomarahuëꞌ, përasaramaꞌ. Nisha nisha nacionoꞌsaquë yaꞌhuëpisopita co nohuitopirinëmahuëꞌ, taꞌarëꞌnachin huëcapaiarinënquëmaꞌ. Caso Sinioroco noya niꞌnanquëma niꞌton, napotarinënquëmaꞌ,” tënin Sinioro.

Isaías 60:3

Noyasáchin nicatomaꞌ, tahuëri pochin nisaramaꞌ. Napoaton nisha nisha piyapiꞌsa huëcapayaponëmaꞌ. Tahuërianpitërëso pochin cancantëramaso marëꞌ, nisha nisha copirnoroꞌsa huëcapaiarinëmaꞌ.

Isaías 61:9

Inahua quëran pipipisopitasoꞌ, nisha nisha nacionquë nahuinaponaꞌ. Yaꞌipi niꞌpisopitari: ‘Tëhuënchachin isopitasoꞌ Siniorori catahuarin,’ taponaꞌ,” tënin.

Joel 3:8

Huiꞌnamanta quëmapiaꞌhuaroꞌsaꞌ, sanapiaꞌhuaroꞌsaꞌ, inapita Cota huënton israiroꞌsa paꞌantatë pochin nitarahuë. Inapotohuato, inahuarintaꞌ Sapa piyapiroꞌsa paꞌantaponaꞌ. Inahuasoꞌ, inotëro parti yaꞌhuëpi. Ca Sinioroco shaꞌhuitaranquëmaꞌ,” tënin.

Números 13:32

Naporahuatona aꞌnapita israiroꞌsaꞌ, apaꞌyanacaiso marëꞌ itaponaꞌ: —Noꞌpaꞌ nahuipoi paꞌpiraihuëꞌ, paꞌpi co noyahuëꞌ niꞌconai. Inatohuasoꞌ, chimirin yaꞌhuërin. Yaꞌipi yaꞌhuëhuanoꞌsa niꞌconaisoꞌ, mashoinaꞌ huanipi.

1 Corintios 14:25

Cancanëna quëran yonquipisopita aꞌninquëchin shaꞌhuitapi niꞌton, ina yonquiatonaꞌ, oshanëna marëꞌ sëtapi. Isonahuatonaꞌ, Yosë chinotapi: “Tëhuënchachin Yosë catahuarinquëmaꞌ,” itarinënquëmaꞌ.

1 Tesalonicenses 1:9

Inapita chachin canpita naporamasoꞌ shaꞌhuiantapi: “Paono niꞌquihuachincoira, noya aꞌchintërincoi. Noya natanatoi, aꞌnaroáchin natërai. Mamanshi aꞌporahuatoi, Tata Yosëíchin chinotërai. Ina imarai huachi. Yosësoꞌ nanpirárin. Inasáchin chinotacasoꞌ yaꞌhuërin.

Apocalipsis 3:9

Aꞌnaquën nonpintatënënquëmaꞌ, ‘Yosë piyapinënpitacoi quiyantaꞌ,’ itopirinënquëmahuëꞌ, Satanasë huëntonënquë yaꞌconpi. Aꞌna tahuëri ca nohuanto, inapitantaꞌ isonahuatonaꞌ, noya nontarinënquëmaꞌ. ‘Tëhuënchachin noꞌtëquën imaramaꞌ. Quisocristo nosororinquëmaꞌ,’ itarinënquëmaꞌ.