Isaías 45:12 - Chayahuita (Shahui)

¹² Cari isoroꞌpaꞌ ninahuë. Yaꞌipi piyapiroꞌsanta cari ninahuë. Piꞌiroꞌtëntaꞌ, cari nëꞌmëtë pëi ótënatë pochin acorahuë. Ca camaitërahuë quëran yaꞌipi tayoraroꞌsa yaꞌhuërin.

Isaías 45:12 ပူးပေါင်းရင်းမြစ်များ

Génesis 2:1

Inapoaton Yosë: Isoroꞌpaꞌ, piꞌiroꞌtëꞌ, yaꞌipi inaquëpita yaꞌhuërinsopitarë chachin tënirin huachi.

Esdras 1:2

“Caso Siroco. Pirsia copirnoco niꞌto, napotaranquëmaꞌ. Siniorosoꞌ Yosë niꞌton, inápaquë huaꞌanëntërin. Ina acorinco nisha nisha nacionoꞌsa huaꞌanëntaꞌhuaso marëꞌ. Camairinco niꞌton, Quirosarinquë ina chinotacaso pëi anitarahuë. Inaso ninanoꞌ, Cota parti yaꞌhuërin.

Nehemías 9:6

Istrasëntaꞌ, Yosë nontaton tapon: “Quëmasáchin Sinioronquën. Quëmari yaꞌipi piꞌiroꞌtë acoran. Yaꞌipi yaꞌhuërinsopitarë chachin ninan. Isoroꞌpaꞌ, marë, inapitanta ninan. Yaꞌipi inaquëpita yaꞌhuërinsopitarë chachin acoran. Quëma nohuanton yaꞌipi yaꞌhuëapi. Quëma nohuanton chachin yaꞌipi nanpiapi. Piꞌiroꞌtëquë yaꞌhuërinsopita chinotarinën.

Salmos 104:2

Quëmasoꞌ noyasáchin nicaton, tahuëri pochin cancantëran. Nëꞌmëtëquë paꞌshintërëso pochin piꞌiroꞌtënta acoran.

Isaías 40:12

Siniorosoꞌ chini chiníquën nanantaton, marë pancaiꞌ nipirinhuëꞌ, aꞌna imiraquëáchin aꞌnirin. Piꞌiroꞌtënta cara cuartaíchin pochin aꞌnirin. Yaꞌipi isoroꞌpaquë amocan yaꞌhuërinsontaꞌ, pëꞌtënacaso marëꞌ aꞌnitiinanquë poꞌmorin. Motopiroꞌsaꞌ, motopiaꞌhuaroꞌsaꞌ, inapitanta pëꞌtënanquë pëꞌtënin.

Isaías 40:22

Yosësoꞌ, piꞌiroꞌtë tahuirinso aipi huaꞌanëntarin. Inatohua quëran canpoasoꞌ sëquërë pochin niꞌninpoaꞌ. Naꞌicaso marëꞌ nëꞌmëtë ótënëso pochin piꞌiroꞌtënta ótënin. Nëꞌmëtë pëi ótënatë pochin nitërin.

Isaías 40:26

Inta nipachin piꞌiroꞌtë nëꞌpëricoꞌ. ¡Nani canpita cari acorahuësoꞌ nitotëramaꞌ! Yaꞌipi inaquë yaꞌhuërinsopita acoato, aꞌnaya aꞌnaya insëquësona nohuantërahuëquë acorahuë. Chini chiníquën nanantato nininëna quëran përapatora, yaꞌipi yaꞌnopi,” tënin.

Isaías 40:28

¡Nani canpitaso nitotëramaꞌ! ¡Nani shaꞌhuitërinënquëmasoꞌ natanamaꞌ! Sinioronënpoasoꞌ, Yosë yaꞌhuëmiatërinsoꞌ. Inari isoroꞌpaꞌ, yaꞌipi yaꞌhuërinsopitarë chachin acorin. Co aso canotaton nëꞌca nëꞌcatosárinhuëꞌ. Nitotërinsontaꞌ, co naninahuanhuëꞌ.

Isaías 42:5

Siniorosoꞌ Yosë niꞌton, piꞌiroꞌtë acorin. Ina acoaton nëꞌmëtë pëi ótënëso pochin nitërin. Isoroꞌpantaꞌ, nani maꞌsha yaꞌhuërinsopitarë chachin acorin. Ina nohuanton piyapiꞌsa inaquë nanpipi. Inari chachin niinta acotërin.

Isaías 44:24

Siniorosoꞌ nichaꞌërinquëmaꞌ. Coꞌhuara nasichátërasënquëmahuëꞌ acorinquëmasoꞌ, naporin: “Ca mini Sinioroco. Yaꞌipi maꞌsha cari acorahuë. Cari piꞌiroꞌtë nëꞌmëtë pëi pochin ótënahuë. Ca nohuanton isoroꞌpanta chinirin. Caoraíchin acorahuë. Co insonta catahuarincohuëꞌ.

Isaías 45:18

Siniorosoꞌ Yosë niꞌton, piꞌiroꞌtë acorin. Isoroꞌpanta acohuachina, noyá acorin. Co topinan nicacaso marëꞌ acorinhuëꞌ. Piyapiroꞌsari yaꞌhuëtacaiso marëꞌ acorin. Ina chachin nontatonpoaꞌ: “Caso Sinioroco. Co aꞌninquëchin yaꞌnorahuëꞌ. Co aꞌna ca pochin yaꞌhuërinhuëꞌ.

Deuteronomio 4:32

Shimashonëmapita nosoroaton huayoninquëmaꞌ. Chiníquën nanantaton Iquipito quëran nichaꞌërinquëmaꞌ. Aꞌnapitaso canpita quëran chini chiníquënoꞌsaꞌ. Napopirinahuëꞌ, canpitari yaꞌhuërëtamaso marëꞌ inapitaso noꞌpanëna quëran Yosëri aꞌpararin. Ipora tahuëriꞌsa napoarinso chachin aꞌpararin. Inta nipachin yonquiricoꞌ: Coꞌhuara canpita yaꞌhuëyátërasënquëmahuëꞌ, yaꞌnan piyapi Yosëri ninin quëran huarëꞌ napopisoꞌ yonquiricoꞌ. Naporahuaton nisha nisha piyapiꞌsa isoroꞌpaquë yaꞌhuëpisopita natanicoꞌ. Natanpiramahuëꞌ: ¡Co onporo tëranta inahuasoꞌ, canpoa Yosë catahuamiatërinpoaso pochin catahuarinsoꞌ, shaꞌhuitaponënquëmahuëꞌ! Canpoasoꞌ, Yosë chachin pën huáncana quëran nontërinpoaso natanëhuaꞌ. Natanarihuarahuë co chiminëhuahuëꞌ. ¡Co inso nacionquë tëranta inapopihuëꞌ! Canpoasoꞌ, aꞌnapita nacionoꞌsa quëran Yosë huayoninpoaꞌ. Huayonatonpoaꞌ, acorinpoaꞌ piyapinënpita nicacaso marëꞌ. Ina marëꞌ iquipitoroꞌsa Yosëri tëniton, aparisitërin. Nisha nisha maꞌsha sacai nininsopita aꞌnotërin. Ina, yaꞌhuërënamënpoa iquipitoroꞌsa ahuëaton, aꞌpayanin. Inapoaton chiníquën nanantërinsoꞌ aꞌnotërinpoaꞌ. ¡Tëhuënchachin co intopa tëranta Yosë pochin mamanshiroꞌsa nipihuëꞌ! ‘Sinioroíchin Yosësoꞌ. Co aꞌna ina pochin yaꞌhuërinhuëꞌ,’ taꞌcamaso marëꞌ nani maꞌsha ninin. Inápa quëraonta pënënainquëmaso marëꞌ nontërinquëmaꞌ. Isoroꞌpaquëntaꞌ, panca pën aꞌnotërinpoaꞌ. Ina huáncana quëran nontërinpoasonta natanëhuaꞌ.

Hebreos 11:3

“Yosë noꞌtëquën nontërinpoaꞌ,” taꞌtëhuaꞌ, natërëhuaꞌ. Inaora yonquinën quëran yaꞌipi isoroꞌpaꞌ acorin. Co mantaꞌ yaꞌhuëpirinhuëꞌ, “Yaꞌhuëꞌin,” topachina, maꞌsha yaꞌhuërin. Yaꞌipi niꞌnëhuasopita co inaora yaꞌhuërinhuëꞌ. Yosëri nininsoꞌ. Quiricanën quëran anitotërinpoaꞌ.