Isaías 44:6 - Chayahuita (Shahui)

⁶ Siniorosoꞌ yaꞌipi nanitaparin. Inasoꞌ, israiroꞌsa nichaꞌësahuaton huaꞌanëntërin. Ina nontatënquëma naporin: “Coꞌhuara isoroꞌpaꞌ yaꞌhuëyátërasohuëꞌ, caꞌton yaꞌhuërahuë. Nani maꞌsha yaꞌhuërinsopita taꞌhuantopiriontaꞌ, caso yaꞌhuëápo. Casáchin Yosëco.

Isaías 44:6 ပူးပေါင်းရင်းမြစ်များ

Isaías 33:22

Siniorosoꞌ coisënënpoa niꞌton, maꞌpitaso nicacasoꞌ pënëninpoaꞌ. Inasoꞌ copirnonënpoa niꞌton, nichaꞌësarinpoaꞌ. Ina nohuanton inimicoroꞌsa nanchanënaquë pancara nara ahuanipisoꞌ, co chiniaponhuëꞌ. Sihuirinënpita ananahuatërin niꞌton, ihuani pihuicasoꞌ nëꞌmëtëntaꞌ, saꞌmoconin. Inapohuachina, inimicoroꞌsa maꞌshanëna osërëtarihuaꞌ. Somarayaroꞌsa quëran huarëꞌ maꞌsha macaponaꞌ. Sonpacharoꞌsanta maꞌsha mamiataponaꞌ.

Isaías 40:18

¡Co aꞌnaya tëranta Yosë pochin yaꞌhuërinhuëꞌ! ¡Co inso mamanshi tërantaꞌ, ina pochin yaꞌhuërinhuëꞌ! Mamanshisoꞌ, huaꞌna asoquirahuatona nipi. Nitapacaisoꞌ ninaꞌpiri oro quëran pashitërin. Inapotahuaton prata quëran catinaaꞌhuaroꞌsa apëꞌpëconotërin.

Isaías 41:14

Canpitaso israiroꞌsanquëmaꞌ, co naꞌashanquëmahuëꞌ. Chaꞌcho co chinirinsohuë pochin nipiramahuëꞌ, carima chachin catahuaranquëmaꞌ. Caso Yosëco noyasáchin ninahuë niꞌton, chinotëramaco. Carinquëma nichaꞌësaranquëmaꞌ.

Isaías 41:21

Israiroꞌsa copirnonënasoꞌ, Sinioro chachin. Inari mamanshiroꞌsa përaton: “Mamanshiroꞌsanquëmaꞌ, piyapinëhuëpitaroꞌco nihuëntonahuëquë, huëco canpitanta noncoꞌ. Natëaꞌhuainquëmaso marëꞌ canpitanta chiniatoma noncoꞌ.

Isaías 41:4

Casáchin Yosëco niꞌto, inapita acorahuë. Ca nohuanton nani maꞌsha isoroꞌpaquë onpopi. Ca Sinioroco naporahuë. Coꞌhuara isoroꞌpaꞌ yaꞌhuëyátërasohuëꞌ, caꞌton yaꞌhuërahuë. Nani maꞌsha yaꞌhuërinsopita taꞌhuantopiriontaꞌ, caso yaꞌhuëápo.

Isaías 42:8

Ina quëran Sinioro taantarin: “Caso Sinioroco. Ina mini nininëhuë. Casáchin noya noyaco niꞌton, paꞌyatiinacoso yaꞌhuërin. Co mamanshiroꞌsasoꞌ noya nicatona natëcaiso yaꞌhuërinhuëꞌ.

Isaías 43:1

Israiroꞌsanquëmaꞌ, nininquëmasoꞌ nontarinquëma natancoꞌ. Canpitaso Cacopo shinpitanquëma niꞌtomaꞌ, noya natancoꞌ: “Carinquëma nichaꞌëranquëma niꞌton, ama tëꞌhuacosohuëꞌ. Carima nininëma quëran përaranquëma niꞌton, huaꞌanëntëranquëmaꞌ.

Isaías 43:9

Yaꞌipi nacionquë yaꞌhuëramasopita niyontoncoꞌ. Nisha nisha piyapiroꞌsanquëma niyontonatomaꞌ, shaꞌhuicoꞌ: ¡Co insonquëma tëranta aꞌna tahuëri maꞌsona onpocasoꞌ, shaꞌhuichinamahuëꞌ! Iracanta naporinsopita, co insonta inapocaso shaꞌhuichininhuëꞌ. Co noꞌtëquën nonahuë nipachinsoꞌ, niꞌpisopitari noꞌtëquën shaꞌhuiinaꞌ,’ itarahuë.

Isaías 44:24

Siniorosoꞌ nichaꞌërinquëmaꞌ. Coꞌhuara nasichátërasënquëmahuëꞌ acorinquëmasoꞌ, naporin: “Ca mini Sinioroco. Yaꞌipi maꞌsha cari acorahuë. Cari piꞌiroꞌtë nëꞌmëtë pëi pochin ótënahuë. Ca nohuanton isoroꞌpanta chinirin. Caoraíchin acorahuë. Co insonta catahuarincohuëꞌ.

Isaías 44:8

Ama tëꞌhuacosohuëꞌ, chiníquën cancantocoꞌ. Coꞌta cari iráca quëran huarëꞌ maꞌsona onpoamasoꞌ nani shaꞌhuitëranquëmaꞌ. Canpitaso nani natanamaco. Casáchin Yosëco. Co aꞌna yosë ca pochin paꞌpoyatonaꞌpi yaꞌhuërinhuëꞌ,” tënin.

Isaías 54:5

Nininquëmasoꞌ, saꞌatatë pochin nitarinquëmaꞌ. Inasoꞌ nininën, Sinioro yaꞌipi nanitaparinsoꞌ. Inasoꞌ Yosë, noyasáchin ninin niꞌton, Israirori chinotërin. Ina nichaꞌërinquëmaꞌ. Yaꞌipi isoroꞌpaꞌ huaꞌanëntaton napotarinquëma niꞌton, yaꞌipi inapita naniantaramaꞌ.

Isaías 63:16

¡Quëmasoꞌ, tatahuëi pochin ninan! Apraanso co aꞌna nohuitomarincoihuëꞌ. Cacoponta co aꞌna yonquimarincoihuëꞌ. Quëmaso Sinioro tatahuëi pochin ninan. Iráca quëran huarëꞌ nichaꞌërancoi.

Malaquías 1:14

Aꞌnaquëma pëꞌtahua huëntonëma quëran noya nininsoꞌ, huayonahuatomaꞌ: ‘Iso pëꞌtahua Sinioro marëꞌ acoarahuë,’ tënamaꞌ. Napoapomarahuëꞌ, naponin nininso quëshitomaco, ca marëꞌ tëparamaꞌ. Ina pochin nonpintësoꞌ, paꞌpi co noyahuëꞌ nicato ama huachi noya yaꞌhuëcaso marëhuëꞌ, shaꞌhuitarahuë. Yaꞌipi copirnoroꞌsa quëran, caso chini chiníquën nanantërahuë. Yaꞌipi isoroꞌpaquë nisha nisha piyapiꞌsa yaꞌhuërinsoꞌ, tëꞌhuatatonaco natërinaco. Caso Sinioroco yaꞌipi nanitapato, ina pochin shaꞌhuitaranquëmaꞌ,” itërin.

Mateo 25:34

Ina quëran inchinanëhuë quëran acorahuësopita itarahuë: ‘Yaꞌipinquëmaꞌ huëcatomaꞌ, Yosë huaꞌanëntërinquë yaꞌconquicoꞌ. ¡Ma noyacha Tata Yosë nosororinquëma paya! Isoroꞌpaꞌ ninin quëran huarëꞌ yonquirinquëmaꞌ huaꞌanëntërinquë ayaꞌcoinquëmaso marëꞌ.

Mateo 27:37

Onporinso marësona tëparapisontaꞌ ninshitopi. isosoꞌ quisoso, cotioroꞌsaꞌ copirno taꞌcasoꞌ, ninshitopi. Inapotahuatonaꞌ, corosëquë chachin motën pëtëcha achinpitopi.

Deuteronomio 32:39

Casáchin Yosëco. Mamanshiroꞌsasoꞌ, co ca pochin nipihuëꞌ. Ca nohuanto piyapiꞌsa nanpirapi, ca nohuanto chiminapi. Ca nohuanto piyapiꞌsa maꞌsha onpopi. Ca nohuanto chachin noyataantapi. Anaꞌintaꞌhuaso chinotohuato, co insonta chaꞌëtarincohuëꞌ. Chini chiníquënco niꞌto, anaꞌintarahuë.

Deuteronomio 4:39

Napoaton noya yonquirahuatomaꞌ: ‘Sinioroíchin Yosësoꞌ. Inápaquë huaꞌanëntërinso pochachin isoroꞌpaquënta huaꞌanëntarin. Co aꞌna ina pochin yaꞌhuërinhuëꞌ,’ tocoꞌ.

Deuteronomio 6:4

Iporasoꞌ, yaꞌipi israiroꞌsanquëma natancoꞌ. Yosëíchin huaꞌanëntërinpoaꞌ. Inasáchin natërëhuaꞌ. Inasoꞌ Sinioro niꞌton, ina naꞌcon naꞌcon nosorocaso yaꞌhuërin. Yaꞌipi cancanëma quëran, huaꞌyanëma quëran, chinirama quëran, yaꞌipi inaquëranpita nosoromiatocoꞌ.

1 Timoteo 3:16

Iráca co Yosë nohuitopirëhuahuëꞌ, iporasoꞌ Quisocristo anohuitërinpoaꞌ: “Ma noyacha inaso paya,” tënëhuaꞌ. Yosë huiꞌnin isoroꞌpaquë oꞌmaton, piyapi chachin nasitimarin. Ispirito Santo chachin anitotërinpoaꞌ Yosë huiꞌnin nininsoꞌ. Nanpiantahuachina, anquëniroꞌsarintaꞌ quënanpi. Imapisopitari yaꞌipi parti paatonaꞌ, nanamën shaꞌhuiraꞌpiapi. Naꞌa piyapiꞌsaꞌ natëpi. Iporasoꞌ Yosëꞌpaꞌ noya yaꞌhuërin. Inatohuaꞌ Yosëri quëpantarin.

Apocalipsis 1:11

Nontatonco, shaꞌhuitërinco: —Apira nani maꞌsha aꞌnotaranquën, quiricaquë ninshitëquëꞌ. Ina quëran canchisë ninanoroꞌsaquë aꞌpatëquëꞌ imarinacosopita nonchinaꞌ. Ipisoquë, Ismirinaquë, Pircamoquë, Tiatiraquë, Sartisiquë, Piratiripiaquë, Naotisiaquë inaquëpita yaꞌhuëpisopita aꞌpatëquëꞌ nitochinaꞌ, itërinco.

Apocalipsis 1:8

Yosë chachin shaꞌhuitërinpoaꞌ: “Caꞌton yaꞌhuërahuë. Coꞌhuara isoroꞌpaꞌ yaꞌhuëyátërasohuëꞌ, yaꞌhuárahuë. Aꞌna tahuërintaꞌ yaꞌipi maꞌsharoꞌsaꞌ taꞌhuantopirinahuëꞌ, casoꞌ yaꞌhuápo. Iráca quëran huarëꞌ yaꞌhuërahuë. Ipora huantaꞌ nanpiárahuë. Co onporontaꞌ taꞌhuantapohuëꞌ, yaꞌhuërápo. Chini chiníquën nanantërahuë,” tënin.

Apocalipsis 2:8

Ina quëran shaꞌhuitaantarinco: —Ansiano Ismirinaquë yaꞌhuërinsontaꞌ ninshitëquëꞌ nonchin imapisopita natainaꞌ. “Ca Quisosoco quirica aꞌpataranquëmaꞌ, niꞌcoꞌ. Iráca quëran huarëꞌ yaꞌhuërahuë. Co onporontaꞌ taꞌhuantarahuëꞌ. Chiminaporahuëꞌ, nanpiantarahuë.

Apocalipsis 22:13

Caꞌton yaꞌhuërahuë. Coꞌhuara isoroꞌpaꞌ yaꞌhuëyátërasohuëꞌ, yaꞌhuárahuë. Aꞌna tahuërintaꞌ yaꞌipi maꞌsharoꞌsaꞌ taꞌhuantopirinahuëꞌ, casoꞌ yaꞌhuápo. Iráca quëran huarëꞌ yaꞌhuárahuë. Co onporontaꞌ taꞌhuantarahuëꞌ,” tënin.