Isaías 44:3 - Chayahuita (Shahui)

³ Ca nohuanton inotëroquë naꞌcon iꞌ yaꞌhuëapon. Yaniroquëntaꞌ, iꞌshanaroꞌsa yaꞌhuëapon. Canpita quëran pipipisopitanta ispiritonëhuë ayaꞌcoancantarahuë. Inapotahuato naꞌcon catahuaarahuë.

Isaías 44:3 ပူးပေါင်းရင်းမြစ်များ

Copo naporinso' 5:25

Paꞌpi notohuaroꞌ shiparinpita yaꞌhuëtarinquën. Iminquë pacatoro yaꞌhuërinso pochin naꞌaponaꞌ.

Salmos 107:35

Inotëronta napoaponahuëꞌ, noyaroꞌpaꞌ atarantërin. Naꞌa iꞌsharoꞌsaꞌ, sonoroꞌsaꞌ, inapitari tahuitërin.

Salmos 63:1

Quëmasáchin Yosënëhuënquën. Paꞌpi yamororëso pochin cancantato, yanohuitëranquën. Inotëroquë noꞌpaꞌ yanirin. Inaquë shaꞌtohuatëra, co noyatërinhuëꞌ. Ina pochin cancantato noyá nohuitaꞌhuanquë huarëꞌ sano cancantarahuë.

Proverbios 1:23

Cariima pënënanquëmasoꞌ, natëco huachi. Natëhuatamaco, ispiritonëhuë ayaꞌcoancantaranquëmaꞌ. Naporahuaton, yonquirahuësopita anitotaranquëmaꞌ.

Isaías 32:15

Napoaponahuëꞌ, Siniorosoꞌ yaꞌipi nanitapaton, oꞌmantararin catahuainpoaso marëꞌ. Naporoꞌ inotëroquëntaꞌ, noyaroꞌpaquë pochin shaꞌtaponaꞌ. Noyaroꞌparoꞌsantaꞌ, aquëtë huarëꞌ noya noya nicapon.

Isaías 32:2

Aꞌnaya aꞌnaya, ihuan naꞌpitiinan pochin paꞌpoyatapi. Maꞌsha onpocaso tahuëri nipachin, catahuatapi. Yaniroquë sharoꞌsa opotacaiso marëꞌ cashapiso pochin nisapi. Panca natëtë inotëroquë, piꞌi yaꞌcopirinso pochin nisapi.

Isaías 41:17

Popriroꞌsaꞌ, sano piyapiroꞌsaꞌ, inapitaso iꞌsha yonípirinahuëꞌ, co quënanpihuëꞌ. Paꞌpi yamorotonaꞌ, yaniconopirapi. Napopirinahuëꞌ, ca Sinioroco niꞌto, catahuarahuë. Ca Yosënëmaco niꞌto, inapitanta co aꞌpoapohuëꞌ.

Isaías 49:10

Co huachi tanaponahuëꞌ. Co huachi yamoroaponahuëꞌ. Co piꞌiri tëranta piꞌcaton aparisitaponhuëꞌ. Cari nosoroato insëchinsona pacacaisoꞌ, aꞌnotapo. Huinanoꞌsa yaꞌhuërinquë cari quëpapo.

Isaías 55:1

Sinioro tënin: “Yamororëso pochin cancantohuatamaꞌ, huëco anoyacancanchinquëmaꞌ. Co coriqui yaꞌhuëtopirinquëmahuëꞌ, catahuararanquëmaꞌ. Nontohuatamaco cosharo achinitërinso pochachin achincancanaranquëmaꞌ. Huino, ohuaca shoꞌshoiꞌ, inapita achinitërinso pochin asanocancanaranquëmaꞌ.

Isaías 61:9

Inahua quëran pipipisopitasoꞌ, nisha nisha nacionquë nahuinaponaꞌ. Yaꞌipi niꞌpisopitari: ‘Tëhuënchachin isopitasoꞌ Siniorori catahuarin,’ taponaꞌ,” tënin.

Isaías 65:23

Co topinan quëran sacatapihuëꞌ. Huiꞌnahuanpachinarantaꞌ, co topinan quëran huiꞌnahuanaponahuëꞌ. Tahuërinën naniquë huarëꞌ chiminaponaꞌ. Siniorori noya yonquirapirinso shiina niꞌton, napoaponaꞌ. Inahuanta huiꞌnahuaantahuachinaꞌ, ina chachin niantaponaꞌ.

Ezequiel 34:26

Huaꞌanëntaꞌhuaso marëꞌ motopi acorahuësoꞌ tahuirinquë, ohuicanëhuëpita acoarahuë. Cari chachin catahuaarahuë niꞌton, nohuantasoi chachin oꞌnan yaꞌhuëtaponaꞌ.

Ezequiel 36:27

Ispiritonëhuë chachin ayaꞌcoancantaranquëma niꞌton, pënëntërahuësopita natëaramaꞌ. Nanamëhuënta natëaramaꞌ.

Joel 2:28

Naquëranchin Sinioro taantarin: “Ina tahuëriꞌsa naꞌhuërinso piquëran, ispiritonëhuë yaꞌipi piyapinëhuëpita ayaꞌcoancantarahuë. Inapotohuato, huiꞌnamapita quëmapiꞌsaꞌ, sanapiꞌsaꞌ, yonquirahuëso shaꞌhuiponaꞌ. Mashoyaroꞌsanta huaꞌnataponaꞌ. Huiꞌnapiꞌsanta huaꞌnarëso pochin aꞌnotërahuësoꞌ, niꞌsapi.

Joel 3:1

Ina quëran Sinioro taantarin: “Ina tahuëri nanihuachin, Cota huëntonquë yaꞌhuëpisopita, Quirosarin ninanoquë yaꞌhuëpisopita, inapitaso yaꞌhuëpiquë chachin noya noya yaꞌhuëantaponaꞌ.

Joel 3:18

Cota huënton inimiconënpita anaꞌintërahuëso piquëran, paꞌpi notohuaroꞌ oparoroꞌsa yaꞌhuëapon. Napoaton huino sacóshin nicaponaꞌ. Pastoroꞌsantaꞌ noya noyatapon niꞌton, ohuacaroꞌsa notohuaroꞌ shoꞌshoiꞌ matapi. Motopiroꞌsaꞌ, motopiaꞌhuaroꞌsaꞌ, inaquëpita iꞌsharoꞌsa paꞌirin. Ina paꞌirinso pochin huino, shoꞌshoiꞌ, inapita yaꞌhuëapon. Iꞌsharoꞌsanta Cota huënton noꞌpanënquë yaꞌhuërinsoꞌ, panca pancairoꞌsa nicaponaꞌ. Chinotërinacoso pëiquë chachin, noꞌpa quëran iꞌsha pipipon. Inasoꞌ pancaitahuaton, Sitin motopiana itopisoꞌ, paꞌtapon.

Miqueas 5:7

Naporoꞌ aꞌnapitaso nisha nisha nacionquë quëpapirinahuëꞌ, yaꞌhuëhuanoꞌsa ahuëaponaꞌ. Oꞌnan, poroncayo, inapitaso co piyapiꞌsa nohuantaiquë huarëꞌ anotërinhuëꞌ. Siniorori aꞌpaimahuachina anotërin. Inapochachin inapitantaꞌ, yaꞌhuëhuanoꞌsa ahuëatona napotaponaꞌ.

Mateo 12:43

Ina quëran Quisosori aꞌchintaantarin. “Aꞌna quëmapi sopairi yaꞌcoancantopirinhuëꞌ, ina quëran pipirin. Pipihuachina, inotëroꞌ parti paꞌsárin. Insëquësona yaꞌhuëcaso marëꞌ yonisapirinhuëꞌ, co quënaninhuëꞌ.

Hechos 10:45

Ina nohuanton, nisha nisha nananquë nonsapi. Co nitotaponaraihuëꞌ, Ispirito Santo nohuanton, napoapi. “Ma noyacha Yosëso paya,” tosapi. Natanahuatonaꞌ, cotioroꞌsaꞌ Pitro caꞌtanpisopita paꞌyanpi: “Nisha piyapiꞌsaꞌ niponaraihuëꞌ, Yosë nohuanton, Ispirito Santori yaꞌcoancantërin,” topi.

Hechos 2:17

‘Aꞌna tahuëri ispiritonëhuë aꞌpamarahuë nisha nisha piyapiꞌsaꞌ yaꞌcoancantacaso marëꞌ. Yaꞌcoancantohuachin, huiꞌnamapita nanamëhuë shaꞌhuirapi. Huiꞌnapiꞌsantaꞌ co huëꞌëponaraihuëꞌ, huaꞌnarëso pochin quënanapi. Mashoroꞌsantaꞌ huaꞌnarapi.

Hechos 2:33

Ina quëran Yosëri inápaquë quëpantarin. Chiníquën nanantërin niꞌton, inchinanën quëran ahuënsërin. Inapotahuaton, shaꞌhuitërin: ‘Ispirito Santo aꞌpamaquëꞌ piyapiꞌsaꞌ yaꞌcoancanchin. Iꞌhua shaꞌhuitëranquënsoꞌ,’ itërin. Ina quëran Quisosori Ispirito Santo aꞌpaimarin, yaꞌcoancantërincoi, niꞌnamaꞌ. Napoaton nisha nisha nananquë nonai, natanamaꞌ.

Hechos 2:39

Yosë nohuanton, Ispirito Santo aꞌpatimarinpoaꞌ. Canpitantaꞌ yaꞌcoancantarinquëmaꞌ. Huiꞌnamapitantaꞌ yaꞌcoancantarin. Aꞌnaquëontaꞌ aquë yaꞌhuëpirinahuëꞌ, Yosë nohuanton, imasapi. Imapachinaꞌ, Ispirito Santori yaꞌcoancantarin inahuantaꞌ, itërin.

Apocalipsis 21:6

Ina quëran itantarinco: —Nani yaꞌipiya anoyatërahuë. Caꞌton yaꞌhuërahuë. Coꞌhuara isoroꞌpaꞌ yaꞌhuëyátërasohuëꞌ, yaꞌhuárahuë. Aꞌna tahuërintaꞌ yaꞌipi maꞌsharoꞌsaꞌ taꞌhuantopirinahuëꞌ, casoꞌ yaꞌhuápo. Iráca quëran huarëꞌ yaꞌhuárahuë. Co onporontaꞌ taꞌhuantarahuëꞌ. Napoaton nontoco catahuainquëmaꞌ. Niꞌquëꞌ. Chiníquën yamorohuatëra, oꞌorëꞌ. Oꞌopatëra, chiníquën cancantërëꞌ. Inapochachin cantaꞌ catahuaranquëmaꞌ. Yamororëso pochin cancantohuatamaꞌ, nanpirin iiꞌ quëchinquëmaꞌ noya cancantacamaso marëꞌ. Caora nohuanto, catahuaranquëmaꞌ. Insonquëma tërantaꞌ nohuantohuatamaco, huëcoꞌ anoyacancanchinquëmaꞌ.

Apocalipsis 22:17

Yaꞌipi Quisoso imarëhuasopita: “Oꞌmantaquëꞌ Sinioro,” itërëhuaꞌ. Ispirito Santontaꞌ, inachachin tënin. Natanamasopitantaꞌ, “Oꞌmantaquëꞌ Sinioro,” itocoꞌ. Yamororëso pochin cancantohuatamaꞌ, huëcoꞌ nanpirin iiꞌ quëchinquëmaꞌ. Achinirinpoaso pochin quëtarinquëmaꞌ noya cancantacamaso marëꞌ. Co mantaꞌ paꞌtërinhuëꞌ.