Isaías 44:23 - Chayahuita (Shahui)

²³ Piꞌiroꞌtëꞌ, quëmanta piyapi pochin nicaton cantaquëꞌ. Sinioro naporinso yonquiaton cantaquëꞌ. Capa cancantaton, inapoquëꞌ. Noꞌpaꞌ acoporonta piyapi pochin nicaton, “yai, yai,” charaꞌin. Motopiroꞌsaꞌ, tananoꞌsaꞌ, yaꞌipi nararoꞌsaꞌ, canpitanta capa cancantocoꞌ. Nichaꞌësahuatonpoaꞌ, Sinioro chiníquën nanantërinsoꞌ aꞌnotërinpoaꞌ.

Isaías 44:23 ပူးပေါင်းရင်းမြစ်များ

Salmos 148:7

Isoroꞌpaquë yaꞌhuëramasopitantaꞌ, Sinioro chinotocoꞌ. Yaꞌipi marë anpotërinsopita, inaquë panca maꞌsharoꞌsa yaꞌhuërinsoꞌ,

Salmos 148:9

motopiroꞌsaꞌ, motopiaꞌhuaroꞌsaꞌ, yaꞌipi nonararoꞌsaꞌ, huayo nararoꞌsaꞌ,

Salmos 65:13

Canonamatëroꞌsaquë pëꞌtahua huëntonoꞌsa naꞌarin. Motopianaroꞌsantaꞌ, tricororoꞌsari imotërin. Capa cancantatona noncaropiso pochin nipi. Yaꞌipi inapita cantapiso pochin nipi.

Salmos 69:34

Inápaquë yaꞌhuëpisopitarintaꞌ, Sinioro chinochinaꞌ. Isoroꞌpaꞌ, marë, inaquëpita yaꞌhuëpisopitantaꞌ, yaꞌipiya quëran ina chinochinaꞌ.

Salmos 69:35

Quëmari chachin Quirosarinquë yaꞌhuëpisopita nichaꞌësaran. Cota huënton noꞌpanënaquë ninanoroꞌsa yaꞌhuërinsontaꞌ, anoyataantaran. Quëma nohuanton piyapinënpita iso noꞌpa chachin huaꞌanëntaponaꞌ. Huaꞌanëntatonaꞌ, inaquë yaꞌhuëapona huachi.

Salmos 89:13

Quëmasoꞌ chini chiníquën nanantëran. Inchinan tanpanënsoꞌ chiníquën niꞌton, yáminsëtëran.

Isaías 43:1

Israiroꞌsanquëmaꞌ, nininquëmasoꞌ nontarinquëma natancoꞌ. Canpitaso Cacopo shinpitanquëma niꞌtomaꞌ, noya natancoꞌ: “Carinquëma nichaꞌëranquëma niꞌton, ama tëꞌhuacosohuëꞌ. Carima nininëma quëran përaranquëma niꞌton, huaꞌanëntëranquëmaꞌ.

Isaías 43:7

Inapitasoꞌ ca pochachin ninintopi. Cari chachin inapitaso acorahuë. Catahuarahuëso nicatonaꞌ, yaꞌipiya quëran paꞌyatiinacoso marëꞌ acorahuë.

Isaías 49:13

Piꞌiroꞌtëquë yaꞌhuëpisopita, capa cancanchinaꞌ. Capa cancantatonaꞌ: ‘yai,’ charaꞌinaꞌ. Isoroꞌpaquëntaꞌ, inapochachin capa cancanchinaꞌ. Motopiroꞌsa quëran huarëꞌ piyapiꞌsa pochin capa cancantatonaꞌ, ‘yai,’ charaꞌinaꞌ. Sinioro piyapinënpita parisitapisoꞌ, inari noya acoantarin. Nosoroaton napotarin niꞌton, ina pochin nicoꞌ,” itërin.

Isaías 49:3

Sinioro chachin nontatonco: ‘Quëmasoꞌ Israironquën. Piyapinëhuënquën. Quëmá quëran noya noya ninahuësoꞌ aꞌnoarahuë,’ itërinco.

Isaías 52:9

Quirosarin ninanoquë yaꞌhuëantaramasopita, capa cancantatoma cantaco huachi. Sinioro ayontoantarinquëma niꞌton, inapocoꞌ. Nichaꞌërinquëma niꞌton, inapocoꞌ.

Isaías 60:21

Yaꞌipi inaquë yaꞌhuëramasopita, noya nicatënëmaꞌ, natëponëmaꞌ. Noꞌpanëma huaꞌanëntomiataramaꞌ. Shanëhuë, papoyantërinso pochin nisaramaꞌ. Chini chiníquën nanantërahuësoꞌ aꞌnocaꞌhuaso marëꞌ carima noya noya acoaranquëmaꞌ.

Isaías 61:3

Quirosarinquë yaꞌhuëpisopita canapi niꞌton sëtápirinahuëꞌ, inahua yaꞌhuërëꞌ canatohuachinaꞌ, yancotë yancopiso pochin acoarahuë. Naꞌnërápirinahuëꞌ, noya acancantaantarahuë. Co napion ancantápirinahuëꞌ, catahuarahuë niꞌton, Sinioro chinotatona cantaponaꞌ. Nisha nisha piyapiꞌsari: ‘Ma noyacha Siniorosoꞌ nanitapaton, piyapinënpita shacatë pochin nitërin. Noyanpinanyanchin nopri nararoꞌsa pochin acorin,’ taꞌcaiso marëꞌ ina pochin catahuapo.

Jeremías 31:11

Siniorori Cacopo quëran pipipisopita nichaꞌërin. Chiníquën nanantërinsoꞌ nacioni huaꞌanëntopirinhuëꞌ, nichaꞌërin.

Ezequiel 36:1

(-) (Aꞌna tahuëri Sinioro nontatonco: “Israiroꞌsa yaꞌhuëpiquë chachin yaꞌhuëaponaꞌ, co noyahuëꞌ nipi. Inapoatona noꞌpaꞌ quëtërahuëso tapipi. Napopiso marëꞌ noꞌhuirahuë. Anaꞌintato nisha nisha noꞌparoꞌsaquë aꞌparahuë. Napoaponahuëꞌ, insëquësona paꞌpiquë piyapiꞌsa naponin yonquirapirinaco: ‘Isopitaso Sinioro piyapinënpita nipirinahuëꞌ, yaꞌhuëpiso noꞌpa quëran ocoipi,’ topi. Napoatona piyapiꞌsa co noyahuëꞌ yonquirapirinaco niꞌton, sëtërahuë,” itërinco.)

Efesios 3:21

“Ma noyacha Tata Yosëso paya,” itahuaꞌ. Quisocristo noya imapatëhuaꞌ, aꞌnapitantaꞌ nicatënënpoaꞌ, Yosë yonquiapi. Yaꞌipi piyapiꞌsari ina chinochinaꞌ. Ama onporontaꞌ ina naniantahuasohuëꞌ. Ipora quëran huarëꞌ inasáchin yonquiaꞌahuaꞌ. Amen.

1 Pedro 4:11

Aꞌnaquën Yosë nohuanton, nitotopi pënëntacaisoꞌ. Nitotohuatamaꞌ, Yosë noninso chachin pënëntocoꞌ. Aꞌnaquëontaꞌ Yosë nohuanton, caniaꞌpiroꞌsaꞌ, saꞌahuaroꞌsaꞌ, inapita catahuapi. Yosë catahuarinquëmaꞌ niꞌton, ina yonquiatomaꞌ, aꞌnapita noya catahuacoꞌ. Maꞌsona tërantaꞌ nipatamaꞌ, yaꞌipi cancanëma quëran nicoꞌ. Piyapiꞌsaꞌ nicatënënquëmaꞌ Yosë noya noya yonquicaiso marëꞌ inapocoꞌ. Yosësoꞌ noya noya ninin. Chini chiníquën nanantërin. Yaꞌipi piyapiꞌsari ina chinochinaꞌ. Quisocristo catahuarinpoaꞌ ina pochin cancantacasoꞌ. Amen.

Apocalipsis 12:12

Napoaton inápaquë yaꞌhuëpisopita noya cancanchinaꞌ. Yaꞌipiroꞌpaquë, marëquë, inaquëpita yaꞌhuëpisopitaso nipirinhuëꞌ, parisitapi. ¡Maꞌhuantacha nisapi paya! Sopai paꞌsárin minsëcaso marëꞌ. ‘Co huaꞌquiya quëranhuëꞌ Yosë anaꞌintarinco,’ taꞌton, chiníquën noꞌhuitërin. Noꞌhuitaton, piyapiꞌsaꞌ yaminsërin.”

Apocalipsis 18:20

Yaꞌipi inápaquë yaꞌhuëramasopitaso nipirinhuëꞌ, ama ina marëꞌ sëtocosohuëꞌ. Imaramaꞌ niꞌton, noya cancantocoꞌ. Aparisitopirinënquëmahuëꞌ, nani Yosëri anaꞌintërin huachi. Ina marëꞌ Quisoso caꞌtaninsopita, pënëntonaꞌpiroꞌsaꞌ, inapitantaꞌ noya cancanchinaꞌ.