Isaías 44:17 - Chayahuita (Shahui)

¹⁷ Ina yaꞌsorin quëran chachin mamanshi niantarin. Nani nipachina, isonahuaton noꞌpaquë huarëꞌ monshorin quëran mosharin. Paꞌpi nohuantaton itapon: “Quëmaso yosënëhuënquën niꞌton, nichaꞌëco,” itërin.

Isaías 44:17 ပူးပေါင်းရင်းမြစ်များ

1 Reyes 18:26

Napotohuachina inahuasoꞌ, aꞌnara toroaꞌhua huayonpi. Ina tëparahuatona artaro aipi acopi. Inapotahuatona tashiramiachin quëran camotëchin huarëꞌ Paaro nontápi: “¡Paaro aꞌpanicoi!” tosápi. Napoapona pochin, artaro conitatona pashi pashitërapi. Napopirinahuëꞌ co aꞌpanitërinhuëꞌ.

1 Reyes 18:28

Napotápirinhuëꞌ, inapitaso chiníquën: “Yai, yai,” tëcapona pochin conitapi. Cosoroaꞌhuaroꞌsaquë, nahuacaroꞌsaquë, inaquëpita inahuara niohuanpitërapi. Inachintopi niꞌton, huënaiꞌ amaquë huarëꞌ inapopi.

Isaías 44:15

Aꞌnëhuachinara, napopinchin pëiquë quëpatona aꞌpëpi. Aꞌpëhuachinara napëntopi. Inaquë chachin paonta anpipi. Inapotápirinahuëꞌ, napopinchin masahuatona yosëroꞌsa nonanpi. Nani tënihuachinara, moshacaiso marëꞌ isonahuatonaꞌ, noꞌpaquë huarëꞌ monshomapi.

Isaías 44:16

Ina nara chachin aꞌpërinquë, nosha cancatërinso anpiaton caꞌnin. Nani caꞌpachina natërin. Naporahuaton napëntërarin quëran tapon: “Ma noyacha pënso paya. Nani huënocatarahuë,” tënin.

Isaías 45:20

Naquëranchin Sinioro nontaantarinpoaꞌ: “Canpitaso taꞌhuantamaso nipirinhuëꞌ, chaꞌëramasopita huëcatoma niyontonco shaꞌhuichinquëmaꞌ. Naꞌa piyapi yaꞌhuërin co manta yonquipisohuëꞌ. Inapitasoꞌ nara quëran mamanshi nipiso pitënahuatona ichiconipi. Inapitasoꞌ co piꞌpian tëranta nichaꞌëcasoꞌ nanitopihuëꞌ. Napopirinahuëꞌ, ina chinotatona nontopi.

Isaías 46:6

Aꞌnaquën, tanpanantëna quëran naꞌa oro ocoipi. Pratanta ocoiatona pëꞌtënanquë pëꞌtënpi. Ina quëran huaꞌnaquë sacatërinsoꞌ yonípi. Inari mamanshi nitohuachina, monshorahuatona moshapi.

Jeremías 2:27

Nara nipirinhuëꞌ, ‘quëmaso tatahuëinquën,’ itëramaꞌ. Naꞌpinta nipirinhuëꞌ, ‘quëmasoꞌ mamahuëinquën,’ itëramaꞌ. Inapoatoma caso co huachi tahuërëtëramacohuëꞌ. Napoapomarahuëꞌ maꞌsha onpohuatamara: ‘¡Nichaꞌëcoi Sinioro!’ itaantaramaco.

Daniel 3:29

Napoaton inso tëranta isopita huiꞌnapiꞌsa Yosë chinotopiso pinopachin, tëpaꞌinaꞌ. Inapotahuatona yaquiꞌinaꞌ. Pëinëonta amoro tëꞌyatacaiso marëꞌ yaꞌhuëapon. Intohuasona yaꞌhuëpirinahuë tërantaꞌ, inapochinaꞌ. Ma nananquësona nonpachinantaꞌ, inapotacaiso yaꞌhuërin. Co aꞌna yosë ina pochin nichaꞌëcaso nanitërinhuëꞌ niꞌton, inapochinaꞌ,” tënin.

Daniel 6:16

Napotohuachinara, camaitërin: “Naniri quëcatomaꞌ, paꞌpiniꞌ yaꞌhuërinquë tëꞌyatocoꞌ,” tënin. Coꞌhuara tëꞌyachátërasoihuëꞌ: —Quëmaso Naniri, Sinioroíchin cancantaton natëran. Ina nichaꞌëinquën, itërin.

Daniel 6:27

Inaíchin nichaꞌëtonaꞌpisoꞌ. Isoroꞌpaquë, piꞌiroꞌtëquë, inaquëpita co nanitapacasohuëꞌ nininsopita ninin. Naniri paꞌpiniquë tëꞌyatopiraihuëꞌ, inari nichaꞌërin niꞌton, co manta onpotopihuëꞌ,” tënin ninshitaton.

Miqueas 5:12

Pënotatoma naporamasopitantaꞌ, acopitarahuë. Ninotonaꞌpiroꞌsantaꞌ, co huachi yaꞌhuëtarinquëmahuëꞌ.

Habacuc 2:19

Mamanshi nara quëranhuë nipon, naꞌpi quëranhuë nipon ninamasoꞌ nontatomaꞌ: ‘Nichaꞌëcoi quiyantaꞌ,’ itëramaꞌ. Napotopiramahuëꞌ, ¡inapitaso co manta aꞌpaniponquëmahuëꞌ! Oro quëran, prata quëran inaquëranpita pashitopirinahuëꞌ, co manta pacaritaponahuëꞌ. Naporamaso marëꞌ carinquëma anaꞌintaranquëma niꞌton, ¡maꞌhuantacha nisarama paya!

Hechos 19:27

Napohuachinaꞌ, co huachi noya niꞌsarinënpoahuëꞌ. Co onpopinchin canarihuahuëꞌ. Artimisaontaꞌ naniantapi. Inasoꞌ chini chiníquën nanantërin. Yaꞌipi asiaroꞌsaꞌ moshapisoꞌ. Yaꞌipi parti quëran nohuitopi. Aquëtë chachin Paono natëhuachinaꞌ, co huachi moshato pëiquë huëꞌsapihuëꞌ. Artimisa nóya nipirinhuëꞌ, co huachi moshaapihuëꞌ,” itërin.