Isaías 44:15 - Chayahuita (Shahui)

¹⁵ Aꞌnëhuachinara, napopinchin pëiquë quëpatona aꞌpëpi. Aꞌpëhuachinara napëntopi. Inaquë chachin paonta anpipi. Inapotápirinahuëꞌ, napopinchin masahuatona yosëroꞌsa nonanpi. Nani tënihuachinara, moshacaiso marëꞌ isonahuatonaꞌ, noꞌpaquë huarëꞌ monshomapi.

Isaías 44:15 ပူးပေါင်းရင်းမြစ်များ

Isaías 44:10

Huaꞌna asoquirahuatona mamanshi nipachinara, topinan quëran napoapi. Inasoꞌ yosë pochin chinotopirinahuëꞌ, co catahuaponhuëꞌ.

Isaías 44:14

Aꞌnaquëontaꞌ, nonararoꞌsa shaꞌpi. Oꞌnanápachina noya aꞌshinpi. Nohuantohuachinasoꞌ, siprisë narahuë nipon, nopri narahuë nipon shaꞌpi. Inapotatonaꞌ, aꞌpaipi niꞌton, aaꞌshinpi.

Isaías 44:16

Ina nara chachin aꞌpërinquë, nosha cancatërinso anpiaton caꞌnin. Nani caꞌpachina natërin. Naporahuaton napëntërarin quëran tapon: “Ma noyacha pënso paya. Nani huënocatarahuë,” tënin.

Isaías 44:17

Ina yaꞌsorin quëran chachin mamanshi niantarin. Nani nipachina, isonahuaton noꞌpaquë huarëꞌ monshorin quëran mosharin. Paꞌpi nohuantaton itapon: “Quëmaso yosënëhuënquën niꞌton, nichaꞌëco,” itërin.

Isaías 45:20

Naquëranchin Sinioro nontaantarinpoaꞌ: “Canpitaso taꞌhuantamaso nipirinhuëꞌ, chaꞌëramasopita huëcatoma niyontonco shaꞌhuichinquëmaꞌ. Naꞌa piyapi yaꞌhuërin co manta yonquipisohuëꞌ. Inapitasoꞌ nara quëran mamanshi nipiso pitënahuatona ichiconipi. Inapitasoꞌ co piꞌpian tëranta nichaꞌëcasoꞌ nanitopihuëꞌ. Napopirinahuëꞌ, ina chinotatona nontopi.

Isaías 46:6

Aꞌnaquën, tanpanantëna quëran naꞌa oro ocoipi. Pratanta ocoiatona pëꞌtënanquë pëꞌtënpi. Ina quëran huaꞌnaquë sacatërinsoꞌ yonípi. Inari mamanshi nitohuachina, monshorahuatona moshapi.

Apocalipsis 9:20

Naꞌa piyapiꞌsaꞌ chiminpirinahuëꞌ, co naporo tërantaꞌ aꞌnapitasoꞌ yonquiapihuëꞌ. Niꞌsaponaraihuëꞌ, inachachin co noyahuëꞌ cancantapi. Aquëtë chachin sopairoꞌsaꞌ chinotapi. Nisha nisha mamanshi moshapi. Oro quëran, prata quëran, huaꞌna quëran, naꞌpi quëran, nara quëran, ina quëranpita nipisoꞌ. Co inapitasoꞌ quënantopihuëꞌ, co natantopihuëꞌ, co iratopihuëꞌ. Co nanpipirinahuëꞌ, mosharapi.

Jueces 2:19

Napoaponahuëꞌ, ina huaꞌan chiminpachina, naquëranchin Sinioro aꞌpoantapi. Ina aꞌporahuatonaꞌ, mamanshiroꞌsa moshaantapi. Shimashonëna quëran aquë aquëtë co noyahuëꞌ nicoantapi. Inapoatonaꞌ, co natantonoꞌsahuë pochin cancantopi.