Isaías 43:1 - Chayahuita (Shahui)

¹ Israiroꞌsanquëmaꞌ, nininquëmasoꞌ nontarinquëma natancoꞌ. Canpitaso Cacopo shinpitanquëma niꞌtomaꞌ, noya natancoꞌ: “Carinquëma nichaꞌëranquëma niꞌton, ama tëꞌhuacosohuëꞌ. Carima nininëma quëran përaranquëma niꞌton, huaꞌanëntëranquëmaꞌ.

Isaías 43:1 ပူးပေါင်းရင်းမြစ်များ

Génesis 32:28

Naporoꞌ ina quëmapirisoꞌ itapon: —Co huachi Cacopo itarinënhuëꞌ. Ipora quëran huarëꞌ Israiro itarinën. Yosë chinitëran, piyapiꞌsanta chinitëran. Chinitaton canatëran niꞌton, ina pochin nohuitarinën, itërin.

Salmos 100:3

Yosëíchin chini chiníquën nanantërin. Ina nitotoco canpitantaꞌ. Inaso nininpoa niꞌton, huaꞌanëntërinpoaꞌ. Ina piyapinënpoa canpoasoꞌ. Ohuicaroꞌsa huaꞌanëni aꞌpairinso pochin noya aꞌpairinpoaꞌ.

Éxodo 15:13

Paꞌpi nosoromiatërancoi niꞌton, nichaꞌërancoi. Chiníquën nanantaton quëparancoi. Yaꞌhuëcaꞌhuaiso marëꞌ huayonanquë chachin quëparancoi.

Éxodo 15:16

Catahuacoi Sinioro. Nisha nisha nacionoꞌsa tëꞌhuachina huachi. Naꞌpi co pacaritërinsohuë pochin, quëma nohuanton niinaꞌ. Piyapinënpitacoi noꞌpanëna naꞌhuëtaꞌhuai huarëꞌ napoꞌinaꞌ.

Éxodo 33:17

—Natëranco niꞌton, nosororanquën. Napoaton caꞌtanaranquëmaꞌ, itërin Yosëri.

Isaías 41:14

Canpitaso israiroꞌsanquëmaꞌ, co naꞌashanquëmahuëꞌ. Chaꞌcho co chinirinsohuë pochin nipiramahuëꞌ, carima chachin catahuaranquëmaꞌ. Caso Yosëco noyasáchin ninahuë niꞌton, chinotëramaco. Carinquëma nichaꞌësaranquëmaꞌ.

Isaías 42:6

Ina chachin piyapinën nontaton itaantapon: “Carinquën acoranquën nohuantërahuësoꞌ nicacaso marëꞌ. Imirahuë quëran sëꞌquëatë pochin, carinquën achiniaranquën. Quëmá quëran piyapiroꞌsa nichaꞌëcaꞌhuaso marëꞌ acoranquën. Inapitaroꞌco anoyatërahuëso ayonquiamaso marëꞌ acoranquën. Yaꞌipi nacionoꞌsa aꞌpintatë pochin noꞌtëquën anitotaran.

Isaías 43:21

Piyapinëhuëpitasoꞌ, chinotiinacoso marëꞌ cari acorahuë.

Isaías 43:5

Ama tëꞌhuacosohuëꞌ, carinquëma caꞌtanaranquëmaꞌ. Piꞌi pipirin parti quëran, yaꞌconin parti quëran, inaquëranpita yaꞌhuëramaquë chachin quëantaranquëmaꞌ.

Isaías 43:7

Inapitasoꞌ ca pochachin ninintopi. Cari chachin inapitaso acorahuë. Catahuarahuëso nicatonaꞌ, yaꞌipiya quëran paꞌyatiinacoso marëꞌ acorahuë.

Isaías 45:11

Caso Sinioroco noyasáchin ninahuë niꞌton, Israiro chinotërinco. Carima canpitasoꞌ, piyapinëhuëpita nicamaso marëꞌ acoranquëmaꞌ. Huiꞌnahuëpita maꞌsona onpotaꞌhuasoꞌ yonquirahuësoꞌ, ¡co naniarin quëran huarëꞌ natanamacoso yaꞌhuërinhuëꞌ! Maꞌsona nicacaꞌhuaso marëntaꞌ, ¡co canpita camaiamacoso yaꞌhuërinhuëꞌ!

Isaías 49:1

Sinioro piyapinën naporin: “Marë soꞌtonoꞌsaquë yaꞌhuëramasopita natancoꞌ. Aquë nacionoꞌsaquë yaꞌhuëramasopita noya natancoꞌ. Caso Sinioro marëꞌ pënëntërahuë. Coꞌhuara nasichátërasocohuëꞌ, ina marëꞌ Sinioro acorinco. Yoꞌnanquë nicasoco chachin nininëhuë acotochinarinco.

Isaías 49:26

Aparisitërinëmasopita, cari camaiarahuë inahuara noshinëna capatë pochin inahuara capini nitëpacaisoꞌ. Huënainënantaꞌ, huino oꞌotona noꞌpipiso pochin noꞌhuitonënaquë co nitënorocaisohuëꞌ camaiarahuë. Inapotohuato, yaꞌipi piyapiroꞌsa nichaꞌëranquëmasoꞌ nitotaponaꞌ: ‘Sinioro niꞌton, Cacopo quëran pipipisopita nichaꞌërin. Chiníquën nanantaton naporin,’ tosapi,” tënin.

Isaías 52:9

Quirosarin ninanoquë yaꞌhuëantaramasopita, capa cancantatoma cantaco huachi. Sinioro ayontoantarinquëma niꞌton, inapocoꞌ. Nichaꞌërinquëma niꞌton, inapocoꞌ.

Isaías 63:16

¡Quëmasoꞌ, tatahuëi pochin ninan! Apraanso co aꞌna nohuitomarincoihuëꞌ. Cacoponta co aꞌna yonquimarincoihuëꞌ. Quëmaso Sinioro tatahuëi pochin ninan. Iráca quëran huarëꞌ nichaꞌërancoi.

Malaquías 3:17

Inapita yonquiaton Sinioro tapon: “Inapitaso noya yonquirinaco niꞌton, noya nicato piyapinëhuëpita pochachin niantarahuë. Anaꞌintaꞌhuaso tahuëri nanihuachin, inapitaso noya noya nicato, nichaꞌësarahuë. Huiꞌnini noya natëhuachin, paꞌpini nosororinso pochachin inapitantaꞌ, nosoroarahuë.

Hechos 27:20

Ina quëran naꞌa tahuëri co piꞌi quënanaihuëꞌ. Tayorantaꞌ co yaꞌnorinhuëꞌ. Intohuasoꞌ quëparincoi nimara. Co nitotëraihuëꞌ. Chiníquën ihuantarin niꞌton: “Tëhuënchachin chimiitarihuaꞌ; co chaꞌësarihuahuëꞌ,” topiraihuëꞌ.

Hechos 27:25

Napoaton iyaroꞌsaꞌ chiníquën cancantocoꞌ. Tëhuënchachin Yosë natërahuë. Co inasoꞌ nonpintërinpoahuëꞌ. Shaꞌhuitërincoso chachin co aꞌnayanpoa tërantaꞌ chimiitarihuahuëꞌ.

Efesios 2:10

Yosë anoyacancantërinpoaꞌ. Anoyacancantahuatonpoaꞌ, acorinpoaꞌ nóya nicacaso marëꞌ. Quisocristo catahuahuachinpoaꞌ, noya nisarëhuaꞌ. Iráca quëran huarëꞌ yonquirinpoaꞌ ina pochin nicacasoꞌ. Ina marëꞌ nichaꞌërinpoaꞌ.

Deuteronomio 32:15

Noya nocomarinquëma niꞌton, israiroꞌsanquëma amonamaꞌ. (Maꞌsha amomiataton tomapiin tomapiin nininso pochin ninamaꞌ.) Napoaponahuëꞌ, cahuario yatoꞌtatërinso pochin, Yosë chachin acopirinquëmahuëꞌ, aꞌporamaꞌ. Noya paꞌpoyatënquëma nichaꞌëpirinquëmahuëꞌ, nocanamaꞌ.

Deuteronomio 32:6

¡Co napochitomahuë pora! Napotatomaꞌ, co yonquiramahuë pochin niconamaꞌ. ¡Ina canpitaso nininquëmaꞌ! ¡Huiꞌninpita pochachin aꞌpairinquëmaꞌ! ¡Coꞌta ina acorinquëmaꞌ! ¡Ina nohuanton nacion ocoiramaꞌ!

2 Timoteo 2:19

Yosë nanamënso nipirinhuëꞌ yaꞌhuárin, Yosë chachin acorinsoꞌ. Natëricho pëiꞌ achinirinsoꞌ pochin niꞌton, yaꞌhuëmiatarin. Cato quëran chachin ninshitopi. “Yaꞌipi imapisopita Yosëri nohuitërin,” tënin. “Quisocristo imapisopita nóya cancanchinaꞌ. Yaꞌipi co noyahuëꞌ yonquipisopita nanianchinaꞌ,” tënin antaꞌ.

Tito 2:14

Iráca canpoa marëꞌ chiminin oshanënpoaꞌ inquitinpoaso marëꞌ. Anoyacancantërinpoaꞌ piyapinënpita nicacaso marëꞌ. Huëntonënquë chachin yaꞌconpatëhuaꞌ, noya nicacasoráchin nohuantarihuaꞌ.

Apocalipsis 5:9

Chinotatonaꞌ, inahuara yonquinëna quëran nasha cantanën cantarapi. “Noya noyanquën, Sinioro, niꞌton, nanan yaꞌhuëtërinquën quirica niꞌcamasoꞌ. Toꞌni iꞌshotohuatan, nani maꞌsha anitotarancoi. Iráca tëparinënquën. Chiminaton, piyapiꞌsaꞌ sopai quëran ocoiran Yosë imacaiso marëꞌ. Napoaton quëmasáchin nanitëran yaꞌipiya huaꞌanëntacasoꞌ. Nisha nisha parti yaꞌhuëpirinahuëꞌ, imarinënquën, Sinioro. Nisha nisha nananquë nonpisopita imarinënquën. Nisha nisha copirnori huaꞌanëntërinsopita niponaraihuëꞌ, natërinënquën.