Isaías 41:2 - Chayahuita (Shahui)

² ¡Ca nohuanton piꞌi pipirinso parti aꞌnara copirno yaꞌconapon! Inasoꞌ, yaꞌipi inimiconënpita minsëapon. Cari catahuarahuë niꞌton, nisha nisha nacionoꞌsa huaꞌanëntapon. Nisha nisha copirnoroꞌsa camaiapon. Sahuëninën, pëꞌchinanën, inapita quëran ahuëaton, trico toꞌnorahuatëra piꞌpitën paꞌsarëso pochin nitapon.

Isaías 41:2 ပူးပေါင်းရင်းမြစ်များ

Génesis 11:31

Tarisoꞌ, Orë ninano quëran pipirin. Cartioroꞌsa yaꞌhuërin quëran pipirahuaton, Canaan parti chinoton, paꞌnin. Huiꞌnin Apran itopiso Sarairë chachin quëparin. Naporahuaton, shionta Noto itopiso quëparin. Paꞌsapirinahuëꞌ, Aran ninanoquë canconpachinara, inaquë quëparitonpi.

Génesis 17:1

Apran iscon shonca iscon piꞌipitasoꞌ, Siniorori yaꞌnotahuaton, itapon: —Caso Yosëco, yaꞌipi nanitaparahuë. Natëtonco, nohuantërahuësoráchin niquëꞌ.

2 Samuel 22:43

Amocan paꞌsarëso pochin inimicoroꞌsa canarahuë. Cachiquë chipiroꞌ iꞌnatërëso pochin inimicoroꞌsa nitërahuë.

Esdras 1:2

“Caso Siroco. Pirsia copirnoco niꞌto, napotaranquëmaꞌ. Siniorosoꞌ Yosë niꞌton, inápaquë huaꞌanëntërin. Ina acorinco nisha nisha nacionoꞌsa huaꞌanëntaꞌhuaso marëꞌ. Camairinco niꞌton, Quirosarinquë ina chinotacaso pëi anitarahuë. Inaso ninanoꞌ, Cota parti yaꞌhuërin.

Isaías 40:24

Ina marësoꞌ huaꞌanoꞌsantaꞌ, sharoꞌsa nasha pichopitopiso pochin niconpi. Ipora huarëꞌ itëaꞌhuain pipiarinso pochin, co manta chinipihuëꞌ. Siniorori pihuitë pochin nitohuachina, chiminatona ahuiánahuanapi. Panca ihuan paꞌpachina, trico shaꞌhuëtë quiquirinso pochin nitërin.

Isaías 41:25

Piꞌi pipirinso parti quëran aꞌnara copirno huëꞌsarin. Nininën quëran përápato huëꞌsarin. Huëꞌsahuaton nortitaquëchin canquipon. Tëshitonaꞌpi noꞌpaꞌ toꞌcarinso pochin, inaso copirnoroꞌsa nitëriapon. Co incari tëranta chinitaponhuëꞌ.

Isaías 41:3

Inimiconënpita imapachin, yanponatë pochin pacaton co oshataponhuëꞌ icantacasoꞌ.

Isaías 42:6

Ina chachin piyapinën nontaton itaantapon: “Carinquën acoranquën nohuantërahuësoꞌ nicacaso marëꞌ. Imirahuë quëran sëꞌquëatë pochin, carinquën achiniaranquën. Quëmá quëran piyapiroꞌsa nichaꞌëcaꞌhuaso marëꞌ acoranquën. Inapitaroꞌco anoyatërahuëso ayonquiamaso marëꞌ acoranquën. Yaꞌipi nacionoꞌsa aꞌpintatë pochin noꞌtëquën anitotaran.

Isaías 45:1

Pirsia copirno nicacaso marëꞌ Siniorori Siro acorin. Imirin quëran sëꞌquëatë quëparëso pochin nacionoꞌsa minsëcaso marëꞌ inari catahuararin. Copirnonënapitanta ahuëtacaiso marëꞌ ohuarapisoꞌ, matapon. Ina nohuanton ninano yaꞌcoanaroꞌsa iꞌsoataponaꞌ. Iꞌsoatohuachinaꞌ, co incari tëranta oncotaponhuëꞌ. Ipora chachin ina shaꞌhuitaton itapon:

Isaías 45:13

Pirsia copirno Siro itopiso ca nohuanton yaꞌconaton minsëtapon. Maꞌpitaso yanipachina, co sacai quëran nisáponhuëꞌ. Ina camaitërin quëran Quirosarin anoyataantaponaꞌ. Inaso ninanoꞌ, ca ninanonëhuë. Co pahuërë maꞌpataponahuëꞌ, piyapinëhuëpita quëpapisoꞌ aꞌpapon. Co manta nicanapirinahuëꞌ, aꞌpapon. Ca Sinioroco yaꞌipi nanitapato napoarahuë,” tënin.

Isaías 46:11

Piꞌi pipirinso parti aꞌnara quëmapi yaꞌhuëapon. Tahuëri nanihuachin, përápato huëꞌsarin. Inasoꞌ huëꞌpachin, panca onian áquë quëran huëꞌsarinso pochin nisarin. Yaꞌipi yonquirahuësopita inari nicapon. Maꞌsona nicaꞌhuasoꞌ nani yonquirahuë. Yonquirahuëso chachin yaꞌhuëapon.

Hebreos 7:1

Miriquisosoꞌ iráca yaꞌhuërin. Co cotio piyapihuëꞌ niponahuëꞌ, noya Yosë imarin. Sarimoquë yaꞌhuëpisopita huaꞌanëntërin. Naporahuaton, Yosë nohuanton, corto huaꞌan yaꞌconin. Piyapi marëꞌ Tata Yosë nontërin. Iráca Apraani nohuitërin. Inimico copirnoroꞌsaꞌ minsërahuaton, oꞌmantahuachina, Miriquisori nacapirin. Nacapirahuaton, Apraan noya nontërin. Ina quëran corto huaꞌan niꞌton, Yosë nontërin Apraan noya noya yaꞌhuëcaso marëꞌ.

Apocalipsis 16:12

Ina quëran aꞌna anquënintaꞌ paꞌsahuaton, minëquë yaꞌhuërinsoꞌ panca iꞌquë tëꞌyaitërin, Iyopiratisiiꞌ itopiquë. Inaquë tëꞌyaitohuachina, pancaiꞌ niponahuëꞌ, huinquintomaton, yaniromarin. Copirnoroꞌsaꞌ noya pëntonacaiso marëꞌ yaniromarin. Piꞌi pipirin parti quëran huëꞌsapi quira nicacaiso marëꞌ.

Apocalipsis 7:2

Ina quëran aꞌnanaya aꞌna anquënintaꞌ yaꞌnoantarin. Piꞌi pipirinsoꞌ parti quëran huëꞌsahuaton, huaꞌnaꞌhuaya quësarin Tata Yosë marcanën acocaso marëꞌ. Inasoꞌ catapini anquëniroꞌsaꞌ shaꞌhuitërin: